ەلوردا • 28 قىركۇيەك، 2020

نۇر-سۇلتاندا ءمجا اياسىندا جاڭا بالاباقشا اشىلدى

28 رەت كورسەتىلدى

بۇگىن ەلوردادا اbadan جەكەمەنشىك بالاباقشاسى اشىلدى. مەكەمەنىڭ جالپى اۋدانى – 1،6 گا. مەملەكەتتىك-جەكە مەنشىك ارىپتەستىك اياسىندا سالىنعان عيماراتتىڭ اۋماعى – 8 مىڭ شارشى مەتر. جەكە ينۆەستيتسيالار سوماسى 2 ملرد تەڭگەنى قۇرايدى، دەپ حابارلايدى Egemen.kz ەلوردا اكىمدىگىنە سىلتەمە جاساپ.

"بالاباقشانىڭ ەرەكشەلىگى – 18 توپقا ارنالعان. الداعى ۋاقىتتا ساباقتاردى اعىلشىن تىلىندە وتكىزۋ جوسپارلانىپ وتىر. ياعني، بالالارمەن اعىلشىن تىلىندە وقۋ-تاربيە پروتسەسىن جۇرگىزەتىن ماماندار شاقىرىلادى. سونداي-اق بالالارعا ارنالعان كەڭ ورىندار قاراستىرىلعان: اكت زالى، باسسەين، سپورت زالى. ءار توپ ءۇشىن جەكە جاتىن بولمە، شەشىنەتىن بولمە بار"، دەدى نۇر-سۇلتان قالاسى ءبىلىم باسقارماسىنىڭ مەكتەپكە دەيىنگى ۇيىمدار ءبولىمىنىڭ باسشىسى ايگۇل ەرەجەپوۆا.

بالاباقشا 360 ورىنعا ارنالعان. بۇل مەكەمەدە 36 تاربيەشى جانە 10-عا جۋىق ارنايى مامان جۇمىسقا كىرىسەدى دەپ كۇتىلۋدە. ولار – بەينەلەۋ ونەرى، دەنە شىنىقتىرۋ مۇعالىمدەرى، اعىلشىن ءتىلىن تاسىمالداۋشىلار.

شەكتەۋ شارالارىنا بايلانىستى 15 ادامنان تۇراتىن كەزەكشى توپتار جۇمىس ىستەيدى.

"اتا-انالاردان وتىنىشتەر ءتۇسىپ جاتىر. قازىردىڭ وزىندە 15 بالا بار. باس مەملەكەتتىك سانيتارلىق دارىگەردىڭ قاۋلىسى بويىنشا، سانيتارلىق نورمالار ساقتالدى"، دەدى ايگۇل ەرەجەپوۆا.

بالاباقشادا ءجۇزۋ، فۋتبول، كاراتە، شاحمات، حورەوگرافيا، بەينەلەۋ ونەرى، روبوتوتەحنيكا، تەاتر ونەرى جانە قىش ونەرى سياقتى 10-عا جۋىق ۇيىرمە بار.

سونىمەن قاتار بالاباقشادا ەكى وقشاۋلاعىش جانە تۇز بولمەسى، مەديتسينالىق بلوك، پسيحولوگ پەن لوگوپەد كابينەتتەرى، اس ءبولىمى، كىر جۋاتىن بولمە، سونداي-اق ينفراقىزىل ساۋناسى بار باسسەين قاراستىرىلعان.

سوڭعى جاڭالىقتار

ۇقساس جاڭالىقتار