قازاقستان • 27 قىركۇيەك، 2020

"Balapan" تەلەارناسىنا - 10 جىل

28 رەت كورسەتىلدى

بۇگىن قازاق تەلەۆيزياسى تاريحىنداعى تۇڭعىش بالالار ارناسى "Balapan" تەلەارناسىنا - 10 جىل، دەپ حابارلايدى Egemen.kz

تەلەارنا "قازاقستان" تەلەراديوكورپوراتسياسىنىڭ قۇرامىنان 2010 جىلدىڭ 27 قىركۇيەگىندە قر تۇڭعىش پرەزيدەنتى - ەلباسى ن.ءا.نازارباەۆتىڭ باستاماسىمەن اشىلدى.

10 جىل ىشىندە 246 تەلەۆيزيالىق جوبا، 19 تەلەحيكايا، 17 747 مينۋتتى قۇرايتىن 67 انيماتسيالىق مۋلتحيكايا جاسالدى. قازاق كينويندۋسترياسى تاريحىندا "Balapan" تەلەارناسى تۇڭعىش رەت بالالارعا ارنالعان "سانجار مەن قايسار" تەلەحيكاياسىن، وتاندىق  مۋلتحيكايالار ءتۇسىرۋدى قولعا الدى.

"Balapan" ارناسىن ۇنەمى كورەتىن بالالار كوركەم سويلەي باستادى، سونىمەن بىرگە قازاق ءتىلىنىڭ تەرەڭدىگىن تۇسىنەدى. بالالاردىڭ ءبىلىمدى، زاماناۋي بولىپ قالىپتاسۋى ءۇشىن دە ارنانىڭ اتقارىپ وتىرعان ءرولى زور. "Balapan" ارناسىنىڭ اشىلۋىمەن تەلەۆيزيادان الشاقتاپ كەتكەن ەرتەگى، بەسىك جىرى سياقتى جانرلار قايتا ورالدى. مۇنىڭ جاس ۇرپاقتىڭ بويىنا ۇلتتىق قۇندىلىقتاردى سىڭىرۋدە ماڭىزى زور.

ءبىزدىڭ الدىمىزدا تۇرعان ەڭ ۇلكەن ستراتەگيالىق ماقساتتاردىڭ ءبىرى -  دەنى ساۋ، ءبىلىمدى، تاربيەلى، باسەكەگە قابىلەتتى ۇرپاق تاربيەلەۋ. "Balapan" تەلەارناسى وسى باعىتتا وتە ناتيجەلى جۇمىس ىستەپ جاتىر دەۋگە نەگىز بار"، دەدى  قر پارلامەنتى سەناتىنىڭ توراعاسى ماۋلەن اشىمباەۆ "Qazaqstan" ارناسىنا بەرگەن سۇحباتىندا.

وسى ۋاقىتقا دەيىن "Balapan" ارناسىنىڭ اۋديتورياسى 0-دەن 12 جاسقا دەيىن بولسا، بيىلعى جىلدان باستاپ 0-دەن 8 جاسقا دەيىن وزگەردى.

"بۇل - ۇلكەن زەرتتەۋلەر ناتيجەسىندە جاسالعان قادام. 8 جاسقا دەيىنگى بالالار مۋلتفيلم ىزدەيتىنى انىق. وسى تالاپ ۇدەسىنەن شىعۋ ءۇشىن انيماتسيالىق جوبالار ءوندىرىسىن ارتتىردىق. بيىلعى جىلى ەفيردەگى انيماتسيانىڭ ۇلەسى 80 پايىزدى قۇراپ وتىر جانە بۇل كورسەتكىش جىل ساناپ ارتا بەرەدى. بۇگىندە "Balapan" تەلەارناسىنىڭ انيماتسيالىق ونىمدەرى ەلدەگى جالپى انيماتسيا ءوندىرىسىنىڭ 90 پايىزىن قۇرايدى"، - دەپ اتاپ ءوتتى "قازاقستان" رترك" اق باسقارما ءتورايىمى ل.تانىسباي ءوز سوزىندە.

اشىلعانىنا 10 جىل تولعان ارنا بيىلدان باستاپ ۇزدىك شەتەلدىك مۋلتحيكايالاردىڭ تەلەقۇقىعىمەن قوسا ينتەرنەت قۇقىقتارىن ساتىپ الۋ باستاماسىن العاش بولىپ جۇزەگە اسىردى. جىل سوڭىنا دەيىن ارنا كورەرمەندەرى جالپى سانى 800 بولىمنەن اساتىن انيماتسيالىق تۋىندالاردى "Balapan"-نىڭ You Tube-ارناسىنان قازاق تىلىندە تاماشالاي الادى.

ودان بولەك، ارنا وندىرگەن "تىنىمسىز شوجەلەر"، ء"سابي"، "ەركەلەر"، "شاحمات پاتشالىعى"، "پىراقتار" سىندى 5 انيماتسيالىق جوبا اقش جانە لاتىن امەريكاسى ەلدەرىنىڭ كابەلدىك ارنالارى ارقىلى يسپان، اعىلشىن، پورتۋگال تىلدەرىندە كورسەتىلەدى. كەلىسىمشارت اقش-تىڭ جەلىلىك جانە سپۋتنيكتىك حابار تاراتۋ قىزمەتىن جۇزەگە اسىراتىن "Olympusat" كومپانياسىمەن جاسالدى. ارنا وندىرگەن "كۇلكى ىزدەگەن كۇنەكەي"، ء"سابي"، "ەركەلەر" مۋلتحيكايالارى  تمد-داعى ەڭ تانىمال IVI.RU ونلاين پلاتفورماسىنا سالىنادى.

كۇزگى ماۋسىمدا "Balapan" تەلەارناسى جالپى سانى 253 بولىمنەن تۇراتىن 17 وتاندىق انيماتسيالىق تۋىندى ۇسىنادى. تاۋلىگىنە 17 ساعات حابار تاراتاتىن ارنانىڭ "وtau TV" جەلىسىندە 1 ملن 400 مىڭ ابونەنتى بار، كابەلدىك جەلى ارقىلى 1 ملن كورەرمەن قامتىلادى. ارنا جالپى ەل تۇرعىندارىنىڭ 84 پايىزىنا قولجەتىمدى. 

سوڭعى جاڭالىقتار

ۇقساس جاڭالىقتار