مەديتسينا • 25 قىركۇيەك، 2020

اسحات ايماعامبەتوۆ كوروناۆيرۋسقا قارسى ۆاكتسينا سالدىردى

261 رەت كورسەتىلدى

كوروناۆيرۋس ىندەتىنە قارسى وتاندىق ۆاكتسينا ءبىلىم جانە عىلىم ءمينيسترى اسحات ايماعامبەتوۆكە ءبىر اي بۇرىن ەگىلگەن. بۇل فاكتىنى ءمينيستردىڭ ءوزى راستاپ وتىر، دەپ حابارلايدى Egemen.kz

"كۇن سايىن كلينيكالىق زەرتتەۋلەردىڭ ناتيجەلەرىن الىپ تۇردىم. اناليزدەردىڭ ناتيجەلەرى مەن ۆاكتسينانىڭ تيىمدىلىگىن كورگەن سوڭ، وتاندىق ۆاكتسينانى ەگۋ تۋرالى شەشىم قابىلدادىم. سودان بەرى كوپ ۋاقىت ءوتتى. ءوزىمدى جاقسى سەزىنەمىن، ەشقانداي كاتارالدى قۇبىلىستار مەن دەنە قىزۋى بولعان جوق"، دەدى اسحات ايماعامبەتوۆ.

ءمينيستردىڭ ايتۋىنشا، ول كۆي ۆاكتسيناسىن جاساۋدىڭ ءار كەزەڭىنە قاتىسقان.

"جۇمىس ىستەگەن جىلدار ىشىندە زەرتتەۋشىلەر قاۋىپتى جۇقپالى اۋرۋلارعا قارسى كوپتەگەن پرەپارات پەن ۆاكتسينانى ازىرلەپ، قولدانىسقا ەنگىزدى. ولار ەلىمىزدىڭ شەگىنەن تىس جەرلەرگە دە جەتىپ، بەلسەندى قولدانىلىپ كەلەدى"، دەپ مالىمدەدى ءبىلىم ءمينيسترى.

ەستەرىڭىزگە سالا كەتەيىك، وسى جىلدىڭ 1 تامىزىندا دۇنيەجۇزىلىك دەنساۋلىق ساقتاۋ ۇيىمىنىڭ سايتىندا كانديداتتىق ۆاكتسينا رەتىندە بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتىنىڭ ەكىنشى قازاقستاندىق ۆاكتسيناسى ءساتتى تىركەلگەن ەدى.

سوڭعى جاڭالىقتار

ۇقساس جاڭالىقتار