پالەستينانىڭ بۇرىنعى باسشىسى ياسير ارافاتتىڭ ءولىمىنىڭ سەبەپتەرى انىقتالدى. بۇل تۋرالى يتار-تاسس حابارلادى.
پالەستينانىڭ مۇڭىن مۇڭداپ, جوعىن جوقتاعان ياسير ارافاتتىڭ ءولىمى نەدەن بولعانىنا جاۋاپ ىزدەگەن حالىقارالىق كوميسسيا ونىڭ پولوني زاتىنان ۋلانىپ, كوز جۇمعانىن دالەلدەدى.
مارقۇمنىڭ بەيىتى 2012 جىلى قايتا قازىلىپ الىپ, ونىڭ ىشكى اعزالارىنا ساراپتاما جۇرگىزىلگەن. ونىڭ دەنەسىن تەكسەرگەن فرانتسيا, شۆەيتساريا جانە رەسەي ماماندارى زەرتتەۋ كەزىندە ونىڭ كيىمدەرىنەن الگى ۋلى زاتتىڭ بەلگىلەرىن تاپقان. سوندىقتان تەكسەرۋ كوميسسياسىنىڭ باسشىسى تاۋفيك تيراۋي پالەستينا كوسەمى پولوني-210 دەپ اتالاتىن ەلەمەنتتەن ۋلانىپ ءولۋى مۇمكىن دەپ مالىمدەگەن.
اتالعان ساراپتامانىڭ تولىق قورىتىندىسى پالەستينا ۇكىمەتى مەن ارافاتتىڭ جەسىرى سۋحا ارافاتقا تاپسىرىلعان.
ياسير ارافات 2004 جىلدىڭ 11 قاراشاسىندا 75 جاستان اسقان كەزدە پاريج ماڭىنداعى اۋرۋحانادا قايتىس بولدى. سول كەزدە ونىڭ ولىمىنە قاتىستى ەشقانداي بوتەن اقپارات ايتىلماعان. تەك ونىڭ كەنەتتەن ومىردەن وزعانى عانا حابارلاندى.
جولدىباي بازار.
