ايماقتار • 25 قىركۇيەك، 2020

اليمەنت تولەمەگەن اكە قولعا ءتۇستى

22 رەت كورسەتىلدى

اليمەنت تولەۋدەن قاشىپ، رەسەي فەدەراتسياسىنىڭ ومبى قالاسىندا جاسىرىنىپ جۇرگەن 36 جاستاعى كوكەك اكەنى سولتۇستىك قازاقستان وبلىسىنىڭ پوليتسەيلەرى ىزدەپ تاپتى، دەپ حابارلايدى Egemen.kz

سولتۇستىك قازاقستان وبلىسىنىڭ پوليتسيا دەپارتامەنتى كوشى-قون قىزمەتى باسقارماسىنىڭ قىزمەتكەرلەرى بورىشكەرلەر مەن اليمەنت تولەمەۋشىلەردى ىزدەستىرۋ بويىنشا اكتسيا وتكىزگەن ەدى. ءۇش كۇندىك اكتسيا بارىسىندا ىزدەۋدەگى 13 ادامنىڭ جۇرگەن جەرلەرى انىقتالدى. سولاردىڭ ىشىندە جوعارىدا اتالعان 36 جاسار كوكەك اكەنى ءۋاليحانوۆ اۋداندىق پوليتسيا ءبولىمىنىڭ قىزمەتكەرلەرى انىقتادى. ول كامەلەتكە تولماعان ۇلىنا قامقورلىق جاساۋدى ۇمىتىپ، 2018 جىلدان بەرى ىزدەۋدە بولعان. ەندى سوت ورىنداۋشىلارى بەرەشەكتى ءوندىرىپ الۋ ءۇشىن شارالار قابىلدايتىن بولادى.

"ىزدەۋدەگى ادامنىڭ   باسقا مەملەكەتتە جۇرگەنى تۋرالى اقپارات العاننان كەيىن، وعان مەملەكەتارالىق ىزدەۋ جاريالانادى. ول جەرگە باعىت-باعدار مەن ىزدەستىرۋ تاپسىرمالارى جولدانادى"، دەدى وبلىستىق پوليتسيا دەپارتامەنتى كوشى-قون قىزمەتى باسقارماسىنىڭ اعا ينسپەكتورى ەدىل قازيەۆ.

اتالعان اكتسيانىڭ بارىسىندا تۋىستارىمەن قاتىناسىن ءۇزىپ،  حابارسىز بولىپ كەتكەن ادامداردىڭ دا جۇرگەن جەرلەرى انىقتالدى. ماسەلەن، جامبىل اۋدانىنىڭ پوليتسيا بولىمىنە ۋكراينسكوە اۋىلىنىڭ تۇرعىنى جۇگىنىپ، ەكى جىل بويى جيەنىنىڭ قايدا جۇرگەنىن بىلمەيتىنىن ايتقان. ءتارتىپ ساقشىلارى ونىڭ پەتروپاۆل قالاسىندا جۇرگەنىن انىقتاپ، وعان تۋىس اپاسىنىڭ ىزدەپ جۇرگەنىن حابارلادى جانە بايلانىس مالىمەتتەرىن تابىستادى.

بۇگىنگى تاڭدا ىزدەۋ جاريالانعان تاعى 16 ادام اليمەنت تولەمەۋشىلەردىڭ، ال 32 بورىشكەر جانە تۋىستارىمەن بايلانىسىن جوعالتقان 17 ادام ىزدەستىرىلۋدە.

سوڭعى جاڭالىقتار

ۇقساس جاڭالىقتار