قوعام • 25 قىركۇيەك، 2020

15،3 ملن ادام ءمامس جۇيەسىندە ساقتاندىرىلدى

11 رەت كورسەتىلدى

ىندەت قاۋپى تونگەن توتەنشە جاعداي كەزىندە تابىسىنان ايىرىلعانداردىڭ ساقتاندىرۋ مارتەبەسىن قالپىنا كەلتىرۋ ءۇشىن بىرقاتار ۇسىنىس قاراستىرىلدى. بۇگىندە ەلىمىزدە 15 ملن-نان اسا ادام مىندەتتى الەۋمەتتىك مەديتسينالىق ساقتاندىرۋ جۇيەسىندە ساقتاندىرىلدى.

سۋرەتتى تۇسىرگەن ەرلان وماروۆ، EQ

ورتالىق كوممۋنيكاتسيالار قىزمەتى الاڭىندا الەۋمەتتىك مەديتسينالىق ساقتاندىرۋ قورىنىڭ باسقارما توراعاسى بولات توكەجانوۆ حالىقتىڭ مىندەتتى الەۋمەتتىك مەديتسينالىق ساقتاندىرۋ جۇيەسىنە قاتىسۋى تۋرالى جان-جاقتى مالىمەت بەردى.

ونىڭ ايتۋىنشا، ىندەت ورشى­گەن قىسىلتاياڭ كەزەڭدە حالىق­تىڭ ءبىر بولىگى تابىسىنان ايى­رىلىپ، ولاردىڭ ساقتاندىرۋ مارتەبەسىن قالپىنا كەلتىرۋ ءۇشىن قور ۇكىمەتكە ۇسىنىستار جاسادى. قابىلدانعان شارالار مەديتسينالىق ساقتاندىرۋ جۇيەسىنە 740 مىڭعا جۋىق ادامدى قايتاردى. قازىرگى كەزدە ءمامس-تە 15،3 ملن ادام ساقتاندىرىلعان. 1 قىركۇيەكتەگى جاعداي بويىنشا مەديتسينالىق ساقتاندىرۋ جۇيەسىنەن 3،4 ملن ادام تىس قالىپ وتىر. بۇل – جالپى حالىقتىڭ شامامەن 18 پايىزى. ونىڭ ىشىندە 2 ملن-نان استامى – بىرىڭعاي جيىنتىق تولەمدى تولەۋشىلەر، دەربەس تولەۋشىلەر، جالدامالى جۇمىسشىلار، جەكە كاسىپكەرلەر، جەكە تاجىريبەمەن اينالىساتىندار. ولار تۇراقسىز اۋدارىم سەبەبىنەن جۇيەدەن تىس قالدى.

«2020 جىلدىڭ قاڭتار ايىنان باستاپ 1،3 ملن ادام ءمامس جۇيەسىنە بىردە-ءبىر رەت جارنا مەن اۋدارىم جاساماعان، سوندىقتان بۇل ازاماتتار مەديتسينالىق ساقتاندىرۋ مارتەبەسىنە يە ەمەس. وسى ورايدا ءمامس-تەن تىس قالعان ادامداردى جۇيەگە قاتىسۋعا شاقىرامىن. ساقتاندىرىلعان ازاماتتار ءۇشىن مەديتسينالىق قىزمەتتەردىڭ كولەمى مەن قۇنىنا قاتىستى شەكتەۋ جوق. ءمامس-كە جىلىنا 25 مىڭ تەڭگە كولەمىندە ەڭ تومەنگى تولەم جاساعان پاتسيەنت مەديتسينالىق كومەكتى تەگىن الادى، ال اۋدارعان جارناسىنىڭ سوماسى ماڭىزدى ەمەس. ەگەر ادام ساقتاندىرىلماعان بولسا دا، تەگىن مەديتسينالىق كومەكتىڭ كەپىلدىك بەرىلگەن كولەمى (تمككك) پاكەتى بويىنشا تەگىن مەديتسينالىق كومەك الۋعا قۇقىلى. ودان ەشبىر مەديتسينالىق ۇيىم باس تارتپاۋى كەرەك. ءبىز ازاماتتاردىڭ قورعا جازعان شاعىمدارىن وتە مۇقيات قارايمىز. ازاماتتىڭ سوزىلمالى اۋرۋى بولسا، الەۋمەتتىك ءمانى بار دەرتتەر جانە ديناميكالىق باقىلاۋعا جاتاتىن سوزىلمالى اۋرۋلار بويىنشا ەسەپتە تۇرسا، وندا بەيىندى ماماننىڭ قابىلداۋى تمككك پاكەتى بو­يىنشا جۇزەگە اسىرىلادى»، دەدى ب.توكەجانوۆ.

قور باسشىسى كەيىنگى كەزدە Qoldau 24/7 قوسىمشاسى جانە الەۋمەتتىك جەلىلەر ارقىلى ەمحانالاردا كەپىلدەندىرىلگەن كومەك كورسەتۋدەن باس تارتۋ تۋرالى شاعىمدار جيىلەپ كەتكەنىن، الايدا تمككك پاكەتىنە كىرەتىن كومەكتەن باس تارتۋعا بولمايتىنىن باسا ايتتى.

ءمامس پاكەتىندە مەديتسينا­لىق كورسەتكىشتەر بويىنشا ينفاركت، ينسۋلت، ءتۇرلى جاراقاتتار مەن وپەراتسيالاردان كەيىن، سونداي-اق بالالاردىڭ سوزىلمالى اۋرۋلارى كەزىندە پاتسيەنتتەر ءۇشىن مەديتسينالىق وڭالتۋ قولجەتىمدى. بيىل دەنساۋلىق ساقتاۋ جۇيەسى ءۇشىن ۇلكەن سىناق بولدى. پاندەميا مەديتسينالىق ساق­تاندىرۋ ەسەبىنەن ۇسىنى­لا­­تىن كونسۋلتاتسيالارعا، دياگ­نوستيكاعا، وڭالتۋعا قول­جە­­تىم­دى­لىكتى ارتتىرۋ بويىنشا جوس­پارلاردى وزگەرتتى. ال ەندى ەمحانالار مەن اۋرۋحانالار قالىپتى رەجىمگە ورالىپ، حا­لىق­قا جوس­پارلى تۇردە كومەك كورسەتىپ جاتىر.

سونىمەن قاتار بولات توكە­جانوۆ ىندەتتىڭ ەكىنشى تولقىنىنا دايىندىق تۋرالى ءسوز قوزعادى. ول كوروناۆيرۋس ينفەكتسياسىن ەمدەۋگە بايلانىستى تمككك جانە ءمامس پاكەتتەرىنە وزگە­رىس­تەر ەنگىزىلگەنىن، COVID-19-عا شالدىققان پاتسيەنتتەرگە جانە COVID-19 ىندەتىنە كۇدىكتى جاع­دايدا ءموبيلدى بريگادا مەن ستاتسيونارلىق قىزمەت ۇيدە كورسەتىلەتىنىن، بۇل قىزمەتتەر ساق­تاندىرۋ مارتەبەسىنە قاراماس­تان قامتىلاتىنىن اتاپ ءوتتى.

قازىر قور تاراپىنان كوروناۆيرۋس پەن پنەۆمونياعا قارسى كۇرەس بويىنشا ءىس-شارالار ءۇشىن 159 ملرد تەڭگەدەن اسا قارجى قاراستىرىلعان. ونىڭ ىشىندە كوروناۆيرۋسپەن اۋىراتىن ناۋقاستاردى ەمدەۋگە – 50،5 ملرد تەڭگە، ەپيدەمياعا قارسى شارالارعا تارتىلعان مەديتسينا قىزمەتكەرلەرىنە ۇستەمەاقىعا – 91،9 ملرد تەڭگە، ستاتسيونارلىق دەڭگەيدەگى پتر-زەرتتەۋگە – 4،2 ملرد تەڭگە، ۇيدە ستاتسيونار قىزمەتىن كورسەتۋگە – 0،4 ملرد تەڭگە، امبۋلاتوريالىق دەڭ­گەي­دە­گى پتر-عا – 10 ملرد تەڭگە، ءموبيلدى بريگادالاردىڭ جۇ­­مى­سىنا 2،4 ملرد تەڭگە بەرى­لەدى.

بۇعان قوسا قور ەپيدەمياعا قارسى ءىس-شارالارعا تارتىلعان مەديتسينا قىزمەتكەرلەرى مەن ماماندارعا ۇستەمەاقى تولەۋدى جالعاستىرۋدا. ناۋرىز-تامىز ايلارىندا 73،7 ملرد تەڭگە ۇستەمەاقى تولەندى. سونىڭ ىشىندە تامىز ايىنىڭ قورىتىندىسى بويىنشا COVID-19، ۆيرۋستى پنەۆمونيامەن كۇرەسكە تارتىلعان 66 مىڭ مەديتسينا قىزمەتكەرىنە 17 ملرد تەڭگەگە جۋىق ۇستەمەاقى تولەم جۇرگىزىلىپ جاتىر.

 

سوڭعى جاڭالىقتار

ۇقساس جاڭالىقتار