كەزدەسۋگە قاتىسۋشىلارعا بۇۇ باس حاتشىسى انتونيۋ گۋتەرريش, بۇۇ باس اسسامبلەياسىنىڭ 75-ءشى سەسسياسىنىڭ توراعاسى ۆولكان بوزكير, بۇۇ-نىڭ ەڭ وسال دامۋشى ەلدەر ءۇشىن جوعارى وكىلى فەكيتاموەلوا ۋتويكامانۋ ءسوز سويلەدى.
وتىرىستى اشقان مينيستر پاندەميادان نەعۇرلىم زارداپ شەككەن وسال ەلدەردىڭ وسى توبى حالىقارالىق ارىپتەستەر مەن دونورلار تاراپىنان بارابار قولداۋدى تالاپ ەتەتىنىن اتاپ ءوتتى. قازاقستان 2020-2021 جىلدارعا ارنالعان تشجدە توبىنىڭ جاھاندىق توراعاسى بولا وتىرىپ, توپ ەلدەرىنىڭ مۇددەلەرىن بارلىق ءتيىستى الاڭداردا قورعاۋدى جانە ىلگەرىلەتۋدى جالعاستىرادى.
كەزدەسۋ قورىتىندىسى بويىنشا توپ ەلدەرىنىڭ پروبلەمالارىن, ونىڭ ىشىندە الەمدىك نارىقتاردان الىستىعىمەن جانە ترانزيتتىك ەلدەرگە تاۋەلدىلىگىمەن بايلانىستى پروبلەمالاردى شەشۋدەگى پروگرەستى جەدەلدەتۋ جونىندەگى جول كارتاسى قابىلداندى. قازاقستان توراعالىعىنىڭ باستاماسىمەن جاسالعان قۇجات 2024 جىلعا دەيىنگى كەزەڭدە وسى مىندەتتەردى جەدەل ىسكە اسىرۋ ءۇشىن بارلىق مۇددەلى تاراپتاردىڭ كۇش-جىگەرىن بىرىكتىرۋگە ىقپال ەتەتىن بولادى.
ءىس-شاراعا 200-دەن استام دەلەگات, ونىڭ ىشىندە تشجدە قاتارىنا كىرەتىن 32 ەلدىڭ جانە سەرىكتەس ەلدەردىڭ سىرتقى ساياسي ۆەدومستۆولارىنىڭ باسشىلارى, حالىقارالىق ۇيىمدار مەن بۇۇ اگەنتتىكتەرىنىڭ باسشىلارى, سونىڭ ىشىندە ەسكاتو, ەەك, بۇۇ ءودۇ, حەبو, دكۇ, يۋنەپ جانە ت.ب. قاتىستى.
