قوعام • 24 قىركۇيەك، 2020

سىرتقى ىستەر مينيسترلىگى قازاقستاننىڭ ءولىم جازاسىنان باس تارتۋىنا قاتىستى تۇسىنىكتەمە بەردى

34 رەت كورسەتىلدى

سىرتقى ىستەر مينيسترلىگىنىڭ ءباسپاسوز قىزمەتى قازاقستاننىڭ ءولىم جازاسىن جويۋعا باعىتتالعان ازاماتتىق جانە ساياسي قۇقىقتار تۋرالى حالىقارالىق پاكتىنىڭ ەكىنشى فاكۋلتاتيۆتىك حاتتاماسىنا قول قويۋىنا قاتىستى ءتۇرلى تۇسىنىسپەۋشىلىكتەردىڭ پايدا بولۋىنا بايلانىستى تۇسىنىكتەمە بەردى، دەپ حابارلايدى Egemen.kz.

«قازاقستان رەسپۋبليكاسىنىڭ حالىقارالىق شارتتارى تۋرالى» 2005 جىلعى 30 مامىرداعى قازاقستان رەسپۋبليكاسى زاڭىنىڭ 11-بابىنىڭ 1) جانە 2) تارماقتارىنا سايكەس ءولىم جازاسىن جويۋعا باعىتتالعان ازاماتتىق جانە ساياسي قۇقىقتار تۋرالى حالىقارالىق پاكتىگە فاكۋلتاتيۆتىك ەكىنشى حاتتامانى قر پارلامەنتى مىندەتتى تۇردە راتيفيكاتسيالاۋى ءتيىس، ويتكەنى ول ادامنىڭ جانە ازاماتتىڭ قۇقىقتارى جانە بوستاندىقتارىمەن بايلانىستى، سونداي-اق قازاقستان رەسپۋبليكاسىنىڭ زاڭدارىندا كوزدەلگەننەن وزگە ەرەجەلەردى بەلگىلەيدى.

وسىلايشا، اتالعان حالىقارالىق شارت قر پارلامەنتىمەن راتيفيكاتسيادان وتكەننەن كەيىن عانا كۇشىنە ەنەدى.

راتيفيكاتسيالاۋ كەزىندە ەكىنشى فاكۋلتاتيۆتىك حاتتامانىڭ 2-بابىنىڭ 1-تارماعىنا سايكەس مەملەكەت اسكەري سيپاتتاعى نەعۇرلىم اۋىر قىلمىستار جاساۋداعى كىناسىن مويىنداعاننان كەيىن سوعىس ۋاقىتىندا ولىم جازاسىن قولدانۋدى كوزدەيتىن جالعىز ەسكەرتپە جاساي الادى.

قر كونستيتۋتسياسىنىڭ 15-بابىنىڭ 2-تارماعىنا سايكەس ء«ولىم جازاسى ادامداردىڭ قازا بولۋىمەن بايلانىستى تەرروريستىك قىلمىستار جاساعانى ءۇشىن، سونداي-اق سوعىس ۋاقىتىندا ەرەكشە اۋىر قىلمىستار جاساعانى ءۇشىن ەڭ اۋىر جازا رەتىندە زاڭمەن بەلگىلەنەدى». تيىسىنشە حاتتامانىڭ كۇشىنە ەنۋى ءۇشىن ەلدىڭ نەگىزگى زاڭىنا ءتيىستى تۇزەتۋلەر، سونداي-اق ۇلتتىق زاڭناماعا وزگەرىستەر ەنگىزۋ قاجەت.

سوڭعى جاڭالىقتار

ۇقساس جاڭالىقتار