ايماقتار • 24 قىركۇيەك، 2020

جامبىل وبلىسىندا مەشىت قىزمەتكەرلەرى تال وتىرعىزۋدا

20 رەت كورسەتىلدى

حالقىمىزدا "اتادان مال قالعانشا، تال قالسىن"، دەيتىن دانالىق بار. وزگەگە سايا بولۋ ءۇشىن ءارى قورشاعان ورتانى تازا ۇستاۋ ماقساتىندا تال ەگۋ ءداستۇرى ەلىمىزدە ەرتەدەن قالىپتاسقان. ادامزاتتىڭ ارداقتىسى مۇحاممەد پايعامبار دا "كىمدە-كىم ءبىر تال ەكسە، اللا تاعالا مىندەتتى تۇردە بۇل تال جەمىس بەرگەنشە وعان ساۋاپ جازادى" دەگەن. سوندىقتان دا تال ەگۋدىڭ پايداسى دا، ساۋابى دا مول، دەپ حابارلايدى Egemen.kz.

قازاقستان مۇسىلماندارى ءدىني باسقارماسىنىڭ 30 جىلدىعىنا وراي اتالعان باسقارمانىڭ توراعاسى، باس ءمۇفتي ناۋرىزباي قاجى تاعان ۇلىنىڭ باستاماسىمەن ەلىمىزدە "جاسىل قازاقستان" ەكو-شاراسى ۇيىمداستىرىلعان بولاتىن. شارا اياسىندا جامبىل وبلىسى بويىنشا 3651 ءتۇپ اعاش ەگىلدى. ونىڭ ىشىندە 1070 ءتۇپ جەمىس تالى، تۋيا، قارا اعاش، تەرەك جانە تاعى دا باسقا تالدار بار.

يگى شارا تاراز قالاسىنان باستاۋ الىپ، وبلىس اۋداندارىندا جالعاستى. اۋەلى قالا مەشىتتەرىنىڭ اۋلاسىنا اعاشتار ەگىلدى. ودان كەيىن جامبىل اۋدانىنىڭ بەكتوبە، ايشا ءبيبى، بايدىبەك اۋىلدارىنداعى مەشىت ماڭىنا جالپى 60 ءتۇپ تال ەگىلسە، قازاقستان مۇسىلماندارى ءدىني باسقارماسىنىڭ وبلىس بويىنشا وكىلى، وبلىستىق ورتالىق "ھيباتۋللا تارازي" مەشىتىنىڭ باس يمامى بەيبىت مىرزاگەلديەۆ باستاعان مەشىت قىزمەتكەرلەرى، يمامدار مەن مەشىت جاماعاتى مەركى اۋدانى بويىنشا 30 تال وتىرعىزدى. سونىمەن قاتار ءوڭىر يمامى "30 جىلدىققا 30 مىڭ تال وتىرعىزۋ" ناۋقانى جايىندا سۇحبات بەرىپ، ەل اماندىعى ءۇشىن دۇعا جاسادى.

 

سوڭعى جاڭالىقتار

ۇقساس جاڭالىقتار