ۆەدومستۆو تاراتقان حابارلامادا: «2021 جىلدان باستاپ ەلىمىزدەگى جوعارى وقۋ ورىندارىنىڭ تۇلەكتەرىنە جاڭارتىلعان قوسىمشالارى بار ديپلوم بەرىلەدى. اتالعان قوسىمشادا ەلىمىزدە العان جوعارى ءبىلىم بىلىكتىلىگىنىڭ ەۋروپالىق بىلىكتىلىك ساناتىمەن سايكەس كەلەتىنى مىندەتتى تۇردە كورسەتىلەدى. بولون پروتسەسىنىڭ حاتشىلىعى قازاقستاننىڭ جوعارى ءبىلىم بەرۋ ۇلتتىق بىلىكتىلىك شەڭبەرىنىڭ وزدىگىنەن سەرتيفيكاتتاۋ بويىنشا ەسەبىن قابىلدادى. ەندى ەلىمىزدەگى جوعارى وقۋ ورىندارىنىڭ ديپلومدارى ەۋروپا ەلدەرىندە جارامدى بولادى. بۇل شەتەلدىك ازاماتتار تاراپىنان قازاقستاندىق جوعارى بىلىمگە دەگەن قىزىعۋشىلىقتى ارتتىرادى», دەلىنگەن.
بولون پروتسەسىنىڭ حاتشىلىعى قابىلداعان ءوزىن-ءوزى سەرتيفيكاتتاۋ بويىنشا ەسەپتى دايىنداۋ ءۇشىن ءبىلىم جانە عىلىم ءمينيسترىنىڭ بۇيرىعىمەن ۆەدومستۆوارالىق جۇمىس توبى قۇرىلعان. ونىڭ قۇرامىنا ءبىلىم جانە عىلىم مينيسترلىگى, ەڭبەك جانە حالىقتى الەۋمەتتىك قورعاۋ مينيسترلىگى, «اتامەكەن» ۇلتتىق كاسىپكەرلەر پالاتاسى, سالالىق قاۋىمداستىقتار جانە قازاقستاندىق جوعارى وقۋ ورىندارىنىڭ وكىلدەرى كىردى.
مينيسترلىكتىڭ مالىمدەۋىنشە, ءوزىن-ءوزى سەرتيفيكاتتاۋ بويىنشا ەسەپ جوعارى ءبىلىم بەرۋ ءۇشىن ۇلتتىق بىلىكتىلىك شەڭبەرىنىڭ ەۋروپالىق جوعارى ءبىلىم بەرۋ كەڭىستىگىمەن (ەجبك) ۇيلەسىمدىلىگى, سونداي-اق سالىستىرمالىلىعىن كورسەتتى. بۇل – قازاقستاننىڭ جوعارى جانە جوعارى وقۋ ورنىنان كەيىنگى ءبىلىم بەرۋ جونىندەگى ۇلتتىق جۇيەنىڭ ەۋروپالىق جوعارى ءبىلىم بەرۋ كەڭىستىگىنىڭ ءبىلىم بەرۋ جۇيەلەرىمەن ءساتتى ۇيلەسىمدىلىگىنىڭ ايقىن دالەلى.
ايتا كەتەيىك, بولون پروتسەسى ەڭبەك نارىعىندا ازاماتتاردىڭ ۇتقىرلىعىن دامىتۋ, ەۋروپالىق جوعارى ءبىلىمنىڭ باسەكەگە قابىلەتتىلىگىن ارتتىرۋ, جوعارى ءبىلىمنىڭ ۇلتتىق جۇيەلەرىن ۇيلەستىرۋ ماقساتىندا 1999 جىلى 29 ەلدىڭ ءبىلىم مينيسترلەرىنىڭ باستاماسىمەن قۇرىلدى.
