پرەزيدەنت قاسىم-جومارت توقاەۆ بيىلعى جولداۋىندا «مامانداردىڭ نەگىزدەۋىنشە, مەملەكەتتىڭ تەك دارىندى وقۋشىلاردى قولداۋى بالالار اراسىندا الەۋمەتتىك اراجىكتى ۇلعايتۋى مۇمكىن. بۇعان جول بەرۋگە بولمايدى», دەگەن ەدى. شىعىس قازاقستان وبلىسىندا جەتىم جانە اتا-اناسىنىڭ قامقورىنسىز قالعان بالالارعا ەرەكشە نازار اۋدارىلىپ كەلەدى. پرەزيدەنت ايتىپ وتكەندەي, دارىندى وقۋشىلارعا عانا ەمەس, ەرەكشە ءبىلىم بەرۋ قاجەتتىلىكتەرى بار بالالاردى وقىتۋ ءۇشىن تەڭ جاعداي جاساۋدى قولعا العان.
– ينكليۋزيۆتى ءبىلىم بەرۋدى دامىتۋ – الدىمىزعا قويىلعان ماڭىزدى ءمىندەتتەردىڭ ءبىرى. وبلىس اكىمىنىڭ تاپسىرماسى بويىنشا 2018 جىلدىڭ قىركۇيەگىندە ينكليۋزيۆتى ءبىلىم بەرۋگە جاعداي جاساعان مەكتەپتەردىڭ ۇلەسىن ارتتىرۋ ماقساتىندا 2018-2020 جىلدارى اتالعان ءبىلىم بەرۋ ءتۇرىن دامىتۋ باعدارلاماسى ازىرلەنىپ, بەكىتىلدى, – دەيدى وبلىستىق ءبىلىم باسقارماسىنىڭ باسشىسى سايرانگۇل ءجۇمادىلوۆا.
بەكىتىلگەن باعدارلامادا ءتورت باستاما كوزدەلگەن ەكەن. ونى جۇزەگە اسىرۋ ءۇشىن وبلىستىق بيۋدجەتتەن جالپى 530,4 ملن تەڭگە ءبولىنىپ, جول كارتاسى شەڭبەرىندە جۇمىستار جۇرگىزىلگەن. اتاپ ايتساق, وبلىستىڭ 500 مۇعالىمى ارنايى كۋرستان ءوتتى. 38 جالپى ءبىلىم بەرۋ مەكتەبىنىڭ عيماراتى تىرەك-قيمىل اپپاراتى بۇزىلعان بالالار ءۇشىن بەيىمدەلدى. وبلىستىڭ 12 پسيحولوگيالىق-پەداگوگيكالىق تۇزەۋ كابينەتىنە قوسىمشا تاعى ءتورت اۋداندا وسىنداي كابينەت اشىلدى.
– بىزدە ازداپ كورمەيتىن بالالار بار. ولار سەمەيدەگى ارنايى مەكتەپتە وقيدى. ال كوزدەرى مۇلدەم كورمەيتىن بالالارعا جابدىقتالعان سىنىپتار كەرەك ەدى. سودان بىلتىر «دارا» قايىرىمدىلىق قورى دەمەۋشىلىك كورسەتىپ, وسكەمەندەگى №19 مەكتەپتىڭ ءبىر جاق قاناتىن جابدىقتاپ بەردى. العاشىندا اتا-انالار وتىنىشىمەن ءتورت-اق بالا كەلگەن. بيىل ون شاقتى بالا كەلىپ ءجۇر, – دەيدى ءبىلىم باسقارماسىنىڭ باسشىسى.
وبلىستا ينكليۋزيۆتى وقيتىن بالالاردان بولەك جەتىم جانە اتا-اناسىنىڭ قامقورلىعىنسىز قالعان بالالارعا ارنالعان جەتى ءبىلىم بەرۋ مەكەمەسىندە 606 بالا تۇرادى. ەلدەگى جاعدايعا بايلانىستى بالالاردىڭ تۋىستارىنا, اسىراپ الۋعا ۇمىتكەرلەردىڭ كەلۋىنە شەكتەۋ قويىلدى. بۇل مەكەمەلەر بايلانىسسىز تەرمومەترلەرمەن, انتيسەپتيكالىق زاتتارمەن قامتىلدى. قىزمەتكەرلەرى دە ەكى اپتا قاتارىنان جۇمىس ىستەۋ كەستەسىنە كوشكەن. وبلىس اكىمى دانيال احمەتوۆتىڭ تاپسىرماسىمەن, ينتەرناتتىق مەكەمەلەردىڭ تاربيەلەنۋشىلەرى, قىزمەتكەرلەرى كوروناۆيرۋستىڭ بار-جوعىن انىقتايتىن تەستەن ءوتىپ وتىر.
وسىنداي قيىن-قىستاۋ كەزدە جومارتتىق تانىتىپ, كومەك كورسەتىپ جاتقاندار از ەمەس. «جاقسىنىڭ جاقسىلىعىن ايت, نۇرى تاسىسىن» دەيدى. ايتايىق, «كازتسينك» جشس ءبىلىم بەرۋ مەكەمەلەرىنە 27 نوۋتبۋك, زالالسىزداندىراتىن توننەلدەر, ماسكالار, انتيسەپتيكتەر, سانيتارلىق كىلەمشەلەر, ەلەكتروندى تەرمومەترلەر, دوزاتورلار الىپ بەرگەن. بالالاردىڭ جازعى دەمالىستارىن ۇيىمداستىرۋعا دا كومەكتەسكەن.
«تمك» اق وسكەمەندەگى ء«ۇمىت» بالالار ءۇيىنىڭ تاربيەلەنۋشىلەرىنە 20 جاڭا كومپيۋتەر مەن نوۋتبۋك سىيلادى. «دەگدار» گۋمانيتارلىق قورى وبلىس ورتالىعىنداعى №8 بالالار ءۇيىن قاجەتتى ءدارى-دارمەكپەن قامتىدى. ال «دارا» قايىرىمدىلىق قورى №8 بالالار ءۇيىنىڭ بازاسىندا «تالىمگەر» جوباسى اياسىندا بالالارعا تەلەديدار, پرينتەرلەر, مودەمدەر, قۇلاققاپتار جانە جيىرما سمارتفون سىيلادى.
قاراپ وتىرساڭىز, كورسەتىلىپ جاتقان كومەك ۇشان-تەڭىز. نۇر-سۇلتان قالاسىنداعى «دارا» قايىرىمدىلىق قورى №19 مەكتەپتەگى زاعيپ جانە كوزى ناشار كورەتىن بالالارعا سپورتتىق كيىمدەر مەن جابدىقتار سىيلادى. ەندى مۇنداعى بالالار ەپتەپ سپورتپەن دە شۇعىلدانا الادى. قاشىقتان وقۋعا جاعدايى جوق ءبىر بالاعا نوۋتبۋك پەن روۋتەر دە بەرىلدى. ونلاين ءبىلىم الۋ ءۇشىن كومپيۋتەرلەرگە بارلىق باعدارلامالار مەن پلاتفورمالار ورناتىلدى.
– زاعيپ بالالارعا ارنالعان قۇرال-جابدىقتار وتە قىمبات تۇرادى. سونىڭ وزىنە قاراماستان, كومەك قولدارىن سوزىپ جۇرگەن «دارا» قايىرىمدىلىق قورىنا ريزامىز, – دەيدى №19 مەكتەپتىڭ ديرەكتورى قايرات فازىل ۇلى.
ءيا, «دارا» قايىرىمدىلىق قورى وڭىردەگى ەرەكشە ءبىلىم بەرۋدى قاجەت ەتەتىن وقۋشىلارعا وراسان زور كومەك كورسەتىپ كەلەدى. بۇگىنگە دەيىن اتالعان قوردىڭ كومەگىمەن وسكەمەن مەن سەمەيدە پەداگوگيكالىق-پسيحولوگيالىق تۇزەتۋ كابينەتتەرى اشىلدى. سونداي-اق وسى ەكى شاھارداعى ەكى مەكتەپتىڭ بازاسىندا ەرەكشە ءبىلىم بەرۋدى قاجەت ەتەتىن بالالار ءۇشىن وبلىستا تۇڭعىش رەسۋرستىق ورتالىق اشىلدى. ميرنىي شاعىن اۋدانىنداعى №8 مەكتەپ بازاسىنداعى رەسۋرستىق ورتالىقتا 52 بالا ەرەكشە ءبىلىم الىپ جاتىر. مۇعالىمدەر دە «دارا» قورىنىڭ قولداۋىمەن نۇر-سۇلتان مەن الماتى قالالارىندا بىلىمدەرىن جەتىلدىرىپ, كۋرستاردان ءوتىپ وتىرادى.
جالپى ءبىلىم بەرۋ مەكتەپتەرىنە ينكليۋزيانى قولداۋ كابينەتتەرىن اشۋ ءۇشىن دەمەۋشىلەر 70 ملن تەڭگە قارجى جيناعان. جازدا «دارا-ءبىلىم» اكتسياسى اياسىندا قوعام قايراتكەرلەرى, ايگىلى اكتەرلەر, سپورتشىلار بالالاردىڭ تەحنيكالىق بازاسىن نىعايتۋ ءۇشىن قارجى جيناعان. جينالعان قارجىعا №8 مەكتەپتىڭ وقۋشىلارىنا ەكى نوۋتبۋك پەن ءتورت پلانشەت الىپ بەرگەن.
مەكتەپتەردەگى ۇلگى بويىنشا پيلوتتىق رەجىمدە «نيەت ۆۋمەن» قوعامدىق قورىمەن وبلىستىڭ مەكتەپكە دەيىنگى ءۇش ۇيىمىندا ينكليۋزيانى قولداۋ كابينەتتەرىن جابدىقتاۋ جۇمىستارى جۇرگىزىلىپ جاتىر. ەرەكشە ءبىلىم بەرۋ قاجەتتىلىكتەرى بار بالالاردى تاربيەلەۋگە جاعداي جاساعان مەكتەپكە دەيىنگى ۇيىمداردىڭ ۇلەسى 45% قۇرايدى. ياعني اتالعان ساناتتاعى بالالارى بار ءار بالاباقشادا ءتيىستى جاعدايلار جاسالعان. ال تاربيەشىلەردى كۋرستاردان وتكىزۋ جۇمىستارى جالعاسىن تابا بەرمەك. جوسپار بويىنشا 2025 جىلى وبلىستاعى ءار مەكتەپكە دەيىنگى مەكەمە ەرەكشە بالانى قابىلداپ, تاربيەلەۋگە دايىن بولۋى ءتيىس.
سونىمەن قاتار قوسىمشا ءبىلىم ۇيىمدارىندا ەرەكشە ءبىلىم بەرۋ قاجەتتىلىكتەرى بار بالالارعا جاعداي جاسالىپ جاتىر. وسكەمەن مەن سەمەيدەگى مۋزىكا, ونەر مەكتەپتەرىنىڭ, جاس تەحنيك ستانساسىنىڭ, وقۋشىلاردىڭ شىعارماشىلىق سارايىنىڭ عيماراتتارى تىرەك-قيمىل اپپاراتى بۇزىلعان بالالارعا بەيىمدەلىپ قايتا جاسالدى. ەندى تىرەك-قيمىل اپپاراتى بۇزىلعان بالالار ءتۇرلى باعىتتاعى ۇيىرمەلەرگە ەش كەدەرگىسىز قاتىسا الادى.
جاڭا وقۋ جىلىندا پيلوتتىق رەجىمدە وسكەمەننىڭ ەكى مەكتەبىندە تەحنولوگيا كابينەتتەرى جابدىقتالادى. وندا پسيحيكالىق دامۋى تەجەلگەن جانە اقىل-ويى كەم بالالاردىڭ قاجەتتى داعدىلاردى مەڭگەرىپ, باسقا ورتاعا ءسىڭىسىپ كەتۋىنە كومەكتەسەدى.
ەندى قالعان 582 بالاعا جاعداي جاساۋ ءۇشىن جىلدىڭ سوڭىنا دەيىن 700 پەداگوگتى كۋرستىق دايىندىقتان وتكىزۋ كەرەك. وڭىردەگى 55 مەكتەپتە ينكليۋزيانى قولداۋ كابينەتتەرىن جابدىقتاۋ ماسەلەسى شەشىمىن تاپتى. الداعى ۋاقىتتا «قامقورلىق» رەسپۋبليكالىق باعدارلاماسى شەڭبەرىندە تاعى 2 كابينەت جابدىقتالادى. جىلدىڭ سوڭىنا قاراي ەرەكشە ءبىلىم بەرۋ قاجەتتىلىكتەرى بار بالالار وقيتىن بارلىق 489 مەكتەپتە ينكليۋزيۆتى ءبىلىم بەرۋگە جاعداي جاساۋ جۇمىستارى اياقتالادى. ءسويتىپ, ينكليۋزيۆتى ءبىلىم الۋعا مۇقتاج 8070 بالانىڭ بارلىعىنا قاجەتتى ءبىلىم بەرىلەدى.
شىعىس قازاقستان وبلىسى
