مەشىت اشىق اسپان استىنداعى مۇراجايعا اينالادى

رۋحانيات • 19 قىركۇيەك، 2020

مەشىت اشىق اسپان استىنداعى مۇراجايعا اينالادى

635 رەت كورسەتىلدى

قازاقستاننىڭ كيەلى جەرلەرى كارتاسىنا ەنگىزىلگەن اقتوبە وبلىسىنداعى ون نىساننىڭ ءبىرى - دوسجان يشان مەشىتى مەن مەدرەسەسى قايتا قالپىنا كەلتىرىلىپ، اشىق اسپان استىنداعى مۇراجايعا اينالاتىن كۇنى دە جاقىن. تەمىر اۋدانىنىڭ ورتالىعى شۇبارقۇدىق كەنتىنەن 3 شاقىرىم جەردەگى ءحىح عاسىردىڭ ورتاسىنداعى ەسكى قۇرىلىس ورنىن شىلدە ايىنان باستاپ قۋانىش اليەۆ باستاعان ماڭعىستاۋلىق شەبەرلەر قايتا جاڭارتۋعا كىرىستى، دەپ حابارلايدى Egemen.kz.

بايان قۋاندىققىزى

قاشاق ۇلى دوسجان (1815-1890) اقتوبە وبلىسىنىڭ قازىرگى بايعانين اۋدانىنىڭ اۋماعىنداعى قاينار دەگەن جەرى مەن تەمىر اۋدانىنىڭ ءشيلىسۋ وزەنىنىڭ بويىندا مەشىت-مەدرەسە سالىپ، توڭىرەكتەگى اۋىلداردىڭ بالالارىن وقىتقان جان. مۇنىمەن بىرگە ەل-جۇرتىن جەر كاسىپشىلىگىنە باۋلىپ، ءوزى باس بولىپ وسى جەردەگى وزەن بويىنا جەمىس باعىن وتىرعىزعان كوزى قاراقتى، بەدەلدى ادام بولعان. ول مەككەگە قاجىلىققا ءۇش رەت ساپار شەككەن، وتارلىق جۇيەگە، كۇشپەن شوقىندىرۋ ساياساتىنا قارسى بولىپ، ەلدىڭ ىنتىماعى ءۇشىن كۇرەسكەن ءدىني قايراتكەر. ابايدىڭ اكەسى قۇنانبايمەن بىرگە قاجىلىق ساپارعا بارعاندا، مەككەدە قازاق قاجىلارىنا ارناپ تاقياجاي ءۇي تۇرعىزۋعا قارجىلاي كومەك كورسەتىپ، قۇرىلىس جۇمىستارىن باسقارعان دەگەن دەرەك تە بار.

ء"حىح عاسىردىڭ ەكىنشى جارتىسىندا تەمىر وزەنىنىڭ بويىندا ءدىني مەكتەپتىڭ نەگىزىن قالاپ، بالالاردى سول كەزدەگى زاماناۋي بىلىمگە باۋلىعان كوزى اشىق دوسجان قاشاق ۇلىنىڭ ۇرپاقتارى كەڭەس وكىمەتى كەزىندە قۋعىن-سۇرگىنگە ۇشىراپ، مەشىتتىڭ كۇمبەزى مەن بولىكتەرى تولىعىمەن قيراتىلعان. وسى كۇنگە دەيىن مەشىت-مەدرەسە عيماراتىنىڭ تەك جارتىلاي قيراعان قابىرعالارى عانا جەتكەن. ەسكى مەشىتتىڭ جانىنداعى قورىمعا اۋەلى دوسجان يشان، كەيىن بالالارى جەرلەنگەن ەكەن. بيىلعى جىلدىڭ شىلدە ايىنان باستاپ "رۋحاني جاڭعىرۋ" باعدارلاماسى اياسىندا بۇرىنعى ساۋلەتى نەگىزىندە مەشىت-مەدرەسە عيماراتى قايتا تۇرعىزىلىپ، الداعى ۋاقىتتا ونى اشىق اسپان استىنداعى مۇراجايعا اينالدىرۋ جوسپارىمىزدا بار"،- دەدى تەمىر اۋدانىنىڭ اكىمى جولداس باتىرحان.

وسى جەرگە تاياۋ ءشيلىسۋ وزەنىنىڭ جاعاسىندا دوسجان يشان وتىرعىزعان الما باعىنىڭ ورنىنا بيىلعى كوكتەمدە 300 ءتۇپ الما كوشەتتەرى وتىرعىزىلدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز