رەنوۆاتسيا باعدارلاماسى بويىنشا قالاداعى ەسكى ۇيلەردى ءسۇرۋ جولىمەن "ەسكى" اۋماقتار كەشەندى جاڭارىپ, تۇرعىندار جاڭا ۇيلەرگە كوشەدى.
ب.ساعىنتاەۆ حابارلاعانداي, رەنوۆاتسيا باعدارلاماسى مىڭداعان قالالىقتاردىڭ ءومىر ءسۇرۋ ساپاسىن جاقسارتۋعا جانە قۇرىلىس سالاسىنا ينۆەستيتسيا تارتۋعا باعىتتالعان.
"قالادا 1444 ەسكى ۇيلەر بار. سونىڭ 609-ى تۇركسىب اۋدانىنا تيەسىلى. مۇندا "الماتى اكىمدىگىنىڭ كۇردەلى قۇرىلىس كاسىپورنى" 62 پاتەرگە ارنالعان 5 قاباتتى ەكى ءۇي تۇرعىزدى. ءۇش ەسكى ءۇيدىڭ (42 پاتەر) ورنىنا ينۆەستورلاردىڭ كۇشىمەن 152 پاتەرلىك 7 ءۇي بوي كوتەرەدى. وسيپەنكو كوشەسىندە 59 پاتەرلى ەكى ءۇيدىڭ قۇرىلىسى باستالادى. سونداي-اق جەكە ينۆەستوردىڭ ەسەبىنەن 30 ەسكى ەكى قاباتتى ءۇيدىڭ ورنىنا 1252 پاتەرگە ارنالعان 26 زاماناۋي بەس قاباتتى عيمارات سالۋ جوسپارلانۋدا", دەپ جازدى الماتى اكىمى.
"الماتى اكىمدىگىنىڭ كۇردەلى قۇرىلىس كاسىپورنى" تۇركسىب اۋدانىندا رەنوۆتسيا جوباسىن ساۋرانباەۆ – مولداعاليەۆ – چەرنىشەۆسكي – تولستوي كوشەلەرى اۋماعىندا ىسكە اسىراتىن بولادى. جەكە ينۆەستور اۋقىمدى جوبا بويىنشا جاڭا ۇيلەردى وسىدان 60 جىل بۇرىن سالىنعان ەكىقاباتتى ەسكى ۇيلەر تۇرعان سەيفۋللين داڭعىلى – اقان سەرى – كاسسين – كوتەلنيكوۆ كوشەلەرىنىڭ اۋماعىندا سالاتىن بولادى.
بۇلاردان وزگە, الماتى اكىمىنىڭ مالىمەتى بويىنشا, مەدەۋ اۋدانىندا 21 پاتەرگە ارنالعان ەسكى ءۇش ءۇيدىڭ ورنىندا 303 پاتەرلى 6 ءۇيدىڭ قۇرىلىسى اياقتالىپ قالدى. جەتىسۋ اۋدانىندا 70 پاتەرلى 8 ەسكى ءۇيدىڭ ورنىنا ينۆەستورلارمەن بىرگە 489 پاتەرلى 7 ءۇيدىڭ قۇرىلىسىن باستاۋ جوسپارلانعان.
