اتالمىش وقۋ-جاتتىعۋلارعا 30-دان استام اسكەري تەحنيكا مەن 200-گە جۋىق اسكەري قىزمەتشى تارتىلعان.
"وقۋ-جاتتىعۋ بارىسىندا ءبىز بايلانىس بولىمشەلەرىنىڭ اسكەري بايلانىس جۇيەسىن قۇرۋ, ورىستەتۋ جانە پايدالانۋ جونىندەگى ناقتى مۇمكىندىكتەرىن باعالاي الامىز. اسكەري قىزمەتشىلەر ءوز ءىس – ارەكەتتەرى مەن مىندەتتەرىن تاجىريبەدە تاعى دا پىسىقتايدى. بۇل كەزەڭدە بايلانىسشىلار دالالىق جانە ستاتسيونارلىق باسقارۋ پۋنكتتەرى مەن اسكەري بولىمدەردەگى ابونەنتتەر اراسىندا ءارتۇرلى راديو جانە سپۋتنيكتىك تاراتقىشتاردى قولدانا وتىرىپ, تۇراقتى قورعالعان بايلانىستى ءساتتى ۇيىمداستىردى", دەپ اتاپ ءوتتى "باتىس" وڭىرلىك قولباسشىلىعىنىڭ بايلانىس اسكەرلەرىنىڭ باستىعى پودپولكوۆنيك يۋري كورولەۆ.
بۇدان بولەك, ماماندار قىسقا تولقىندى جانە ۋلتراقىسقا تولقىندى راديوستانتسيالاردا بايلانىستى ۇيىمداستىرۋ جانە بەينەكونفەرەنتسيا بايلانىسىن باسقارۋ پۋنكتتەرىن قامتاماسىز ەتۋ بويىنشا نورماتيۆتەردى تاپسىردى.
وقۋ-جاتتىعۋلار ناقتى ۋاقىت اۋقىمىندا, شارتتى قارۋلى قاقتىعىستار جاعدايىندا وتەدى. بۇل بولىمشەلەردىڭ بەلگىلەنگەن مەرزىمدە مىندەتتەردى ورىنداۋعا جاۋىنگەرلىك ازىرلىگىنىڭ ناقتى جاي-كۇيىن باعالاۋعا مۇمكىندىك بەرەدى.
وسى جازدا بايلانىس بولىمشەلەرىن تولىقتىرعان جاس وفيتسەرلەر ءۇشىن پراكتيكالىق ءىس-شارالار كاسىبي دەڭگەيدى ارتتىرۋعا ارنالعان ەمتيحان بولدى.
