قازاقستان • 17 قىركۇيەك، 2020

قازاقستاندا قۇس تۇماۋىنىڭ وشاقتارى تابىلدى

43 رەت كورسەتىلدى

ارنايى كوميسسيانىڭ شەشىمىمەن ولگەن قۇستاردىڭ يەلەرىنە جانۋارلاردىڭ ورتاشا ايلىق نارىقتىق قۇنى مولشەرىندە وتەماقى تولەنەدى، دەپ حابارلايدى Egemen.kz اۋىل شارۋاشىلىعى مينيسترلىگىنىڭ ءباسپاسوز قىزمەتىنە سىلتەمە جاساپ.

9-16 قىركۇيەك ارالىعىندا سولتۇستىك قازاقستان وبلىسىنىڭ جەتى اۋدانىندا (تيميريازەۆ، تايىنشا، جامبىل، قىزىلجار، شال اقىن، ع.مۇسىرەپوۆ، م.جۇماباەۆ) ءارتۇرلى ءۇي قۇستارىنىڭ ءولىمى تىركەلدى.

ۇلتتىق انىقتامالىق ورتالىق قاناتتىلاردىڭ قىرىلۋىنىڭ سەبەبى جوعارى پاتوگەندى قۇس تۇماۋى ەكەنىن انىقتادى. قابىلدانعان ەرەجەلەرگە سايكەس، قازاقستان رەسپۋبليكاسى دۇنيەجۇزىلىك جانۋارلار دەنساۋلىعىن ساقتاۋ ۇيىمىنا اۋرۋدىڭ ءورشۋى تۋرالى حابارلادى.

سول سەبەپتى وڭىردە جوعارى پاتوگەندى قۇس تۇماۋىنىڭ تارالۋىنا جول بەرمەۋ ماقساتىندا كەشەندى شارالار قابىلدانىپ جاتىر: ۆاكتسينالار الىندى، ىندەت تىركەلگەن اۋماقتار زالالسىزداندىرىلۋدا، قۇستاردىڭ ولەكسەلەرى جويىلۋدا، قۇس شارۋاشىلىعى ونىمدەرىن تاسىمالداۋعا تىيىم سالىندى.

"ەلدەگى ەپيدەميالىق جاعدايدى شۇعىل قالپىنا كەلتىرۋ جانە قۇس تۇماۋىنىڭ تارالىپ كەتپەۋىنە جول بەرمەۋ ماقساتىندا قر اشم ۆەتەريناريالىق باقىلاۋ جانە قاداعالاۋ كوميتەتى 2020 جىلعى 17 قىركۇيەكتەن باستاپ سولتۇستىك قازاقستان وبلىسىنىڭ تيميريازەۆ، تايىنشا، جامبىل، قىزىلجار، شال اقىن، ع.مۇسىرەپوۆ، م.جۇماباەۆ اۋدانىنان ءتىرى قۇس جانە ينكۋباتسيالىق جۇمىرتقا، مامىق پەن قاۋىرسىن، قۇس ەتى مەن قۇس شارۋاشىلىعى ونىمدەرىنىڭ بارلىق تۇرلەرىن، قۇستارعا ارنالعان جەمشوپ پەن جەمشوپ قوسپالارىن، سونداي-اق بۇرىن پايدالانۋدا بولعان قۇستاردى كۇتىپ-باعۋعا، سويۋعا جانە مۇشەلەۋگە ارنالعان جابدىقتاردى شىعارىۋعا ۋاقىتشا شەكتەۋلەر ەنگىزدى"، دەپ مالىمدەدى قر اشم ءباسپاسوز قىزمەتى.

اسا قاۋىپتى اۋرۋدى جويۋ ءۇشىن قر اشم ۆەتەريناريالىق باقىلاۋ جانە قاداعالاۋ كوميتەتىنىڭ رەسپۋبليكالىق ەپيزووتياعا قارسى وتريادى جانە سولتۇستىك قازاقستان اۋماقتىق ينسپەكتسياسى قازىرگى ۋاقىتتا مىندەتتى ءىس-شارالار كەشەنىن، ونىڭ ىشىندە قۇستاردىڭ ولەكسەلەرىن جويۋ، ءۇي-جايلار مەن اۋلا اۋماقتاردى دەزينفەكتسيالاۋ جۇمىستارىن جۇرگىزۋدە.

رەسەي فەدەراتسياسىمەن شەكارالاس اۋماقتاردا جانۋارلاردى ۆاكتسيناتسيالاۋ ءۇشىن جوعارى پاتوگەندى قۇس تۇماۋىنا قارسى 873 مىڭ وتاندىق پرەپارات بولىندى.

ارنايى كوميسسيانىڭ شەشىمىمەن قر اشم ۆەتەريناريالىق باقىلاۋ جانە قاداعالاۋ كوميتەتىنىڭ رەسپۋبليكالىق ەپيزووتياعا قارسى وتريادى ولگەن قۇستاردىڭ يەلەرىنە جانۋارلاردىڭ ورتاشا ايلىق نارىقتىق قۇنى مولشەرىندە وتەماقى تولەيدى.

سوڭعى جاڭالىقتار

ۇقساس جاڭالىقتار