پارلامەنت • 16 قىركۇيەك، 2020

سەناتورلار ۋچاسكەلىك ينسپەكتورلار الەۋمەتتىك قامسىزداندىرۋعا مۇقتاج دەپ سانايدى

25 رەت كورسەتىلدى

سەنات دەپۋتاتتارى ۇكىمەت پەن ىشكى ىستەر مينيسترلىگىنە ۋچاسكەلىك ينسپەكتورلاردىڭ ەڭبەك جاعدايلارىن قايتا قاراۋدى، شتات كەستەسىن ۇلعايتۋدى، ەڭبەكاقىسىن كوتەرۋدى جانە وزىنە ءتان ەمەس مىندەتتەردەن بوساتۋدى ۇسىنىپ وتىر، دەپ حابارلايدى Egemen.kz پارلامەنت سەناتىنىڭ ءباسپاسوز قىزمەتىنە سىلتەمە جاساپ.

بۇگىن سەناتورلار اندرەي لۋكين، نۇرلان بەكنازاروۆ جانە سۇلتانبەك ماكەجانوۆ ينسپەكتورلاردىڭ قانداي جاعدايدا قىزمەت اتقاراتىنىن كورۋ جانە بار ماسەلەلەردى تالقىلاۋ ءۇشىن نۇر-سۇلتان قالاسىنداعى №14 جانە №22 ۋچاسكەلىك پوليتسيا پۋنكتتەرىندە بولدى.

قولدانىستاعى نورماتيۆتەر بويىنشا ءبىر ۋچاسكەلىك ينسپەكتورعا قالادا – 2300، اۋىلدىق جەرلەردە 1800 ادامنان كەلۋى ءتيىس. ال ءىس جۇزىندە بۇگىندە ورتاشا ەسەپپەن ءبىر ۋچاسكەلىك ينسپەكتورعا قالادا 4000-عا دەيىن ادام كەلەدى، اۋىلدىق جەرلەردە 5000-عا دەيىن جەتەدى.

"سوڭعى كەزدە ەلىمىزدە وتباسىلىق-تۇرمىستىق جانجالدار سانى ەكى ەسەگە جۋىق ءوسىپ وتىر. بۇل تەحنيكالىق جانە ماتەريالدىق بازاسى ناشار، ەڭبەكاقىسى تومەن ۋچاسكەلىك ينسپەكتورلارعا ەداۋىر اۋىرتپالىق جانە سونىڭ سالدارىنان كادرلار كوپ تۇراقتامايدى. ستاتيستيكا بويىنشا، ۋچاسكەلىك پوليتسيا قىزمەتكەرلەرىنىڭ جارتىسىنان ازى ءۇش جىلدان كوبىرەك ۋاقىت قىزمەت ەتەدى"، دەدى سەناتور اندرەي لۋكين.

قازىرگى تاڭدا جۇمىس ىستەپ جۇرگەن ۋچاسكەلىك پوليتسيا ينسپەكتورلارىنىڭ جۇكتەمەسى بەلگىلەنگەن نورمادان ەكى ەسە اسىپ تۇسەدى.

"قۇقىق بۇزۋشىلىقتىڭ الدىن الۋ ءرولى تومەندەپ جانە كەيبىر ايماقتارداعى جپق بولىمشەلەرىنىڭ قىزمەتى كوبىنەسە اباتتاندىرۋ ەرەجەلەرىن ساقتاۋعا، رۇقسات ەتىلمەگەن ساۋداعا جول بەرمەۋگە، سانيتارلىق جاعدايدى قامتاماسىز ەتۋگە جانە بيۋدجەتتى تولىقتىرۋعا باعىتتالعان. ۋچاسكەلىك ينسپەكتورلاردىڭ سوتقا دەيىنگى تەرگەۋ اياسىندا تەرگەۋشىلەردىڭ جەكەلەگەن تاپسىرمالارىن ورىنداۋ فاكتىلەرى انىقتالدى"، دەدى سەناتور اندرەي لۋكين.

سەنات دەپۋتاتتارىنىڭ اقپاراتى بويىنشا ۋچاسكەلىك ينسپەكتورلار كۇن سايىن سەلەكتورلىق كەڭەستەرگە قاتىسادى. كەيىننەن نۇسقاۋلىق وتكىزىلەدى، ول كوبىنەسە كۇندىزگى 11-گە دەيىن جالعاسادى. جالپى، ۋچاسكەلىك ينسپەكتورلاردى سپورتتىق، مادەني ءىس-شارالار، جوعارى لاۋازىمدى شەنەۋنىكتەردىڭ ساپارلارى كەزىندە قوعامدىق ءتارتىپتى ساقتاۋ ءۇشىن نەگىزگى جۇمىستان الشاقتاتۋ بارلىق وڭىرلەردە قالىپتى جاعدايعا اينالعان.

وسىلايشا، بۇگىندە ۋچاسكەلىك ينسپەكتور وزىنە ءتان ەمەس فۋنكتسيالاردى ورىنداۋعا ورتا ەسەپپەن 14-تەن 16 ساعاتقا دەيىن ۋاقىت جۇمسايدى. بۇل ونىڭ قاجەت كەزدە ۋچاسكەدە بولماۋىنا جانە الدىن-الۋ جۇمىستارىنىڭ جەتكىلىكسىزدىگىنە اكەلەدى. مۇنداي جاعداي اسىرەسە، ءبىر ۋچاسكەلىك ينسپەكتور ءبىر-بىرىنەن ەداۋىر قاشىقتىقتا (كەيدە 70 شاقىرىمعا دەيىن)، سونداي-اق اۋدان ورتالىعىنان (كەيدە 400-500 شاقىرىمعا دەيىن) ورنالاسقان 3-5 ەلدى مەكەنگە قىزمەت كورسەتەتىن اۋىلدىق جەرلەرگە قاتىستى.

بۇل جۇكتەلگەن مىندەتتەردى ساپالى ورىنداۋعا مۇمكىندىك بەرمەيدى، سونداي-اق، حالىقتىڭ پوليتسياعا دەگەن سەنىمىنە سەلكەۋ تۇسىرەدى. سونىڭ سالدارىنان ۋچاسكەلىك ينسپەكتورلار تىكەلەي مىندەتتەرىمەن تاۋلىگىنە 2-3 ساعات قانا اينالىسادى.

"ۋچاسكەلىك ينسپەكتورلار وتە قولايسىز جاعدايدا، جارتىلاي قيراعان عيماراتتاردا، جىلۋ، جارىق، تابيعي جارىق، سانيتارلىق توراپتار، قاجەتتى ۇيىمداستىرۋ تەحنيكاسى جوق جەرلەردە جۇمىس ىستەۋگە ءماجبۇر. ەلورداداعى جاعداي دا وسىنداي"، دەدى اندرەي لۋكين.

ءۇش مىڭعا جۋىق ۋچاسكەلىك پوليتسيا پۋنكتتەرىنىڭ 40 پايىزىندا تەلەفون بايلانىسى جوق، 1700-دەن استامى اكىمدىكتەر مەن وزگە دە ۇيىمداردىڭ عيماراتتارىندا ورنالاسقان. وندا كۇندەلىكتى جۇمىستى جۇزەگە اسىرۋ، جەتكىزىلگەن ادامداردى ۇستاۋ ءۇشىن قاجەتتى جاعدايلار جاسالماعان. ولار اكىمدىكتەر مەن باسقا دا ۇيىمداردىڭ ماماندارىمەن ءبىر كابينەتتە وتىرۋعا ءماجبۇر. ودان بولەك، 1750-گە جۋىق ۋچاسكەلىك پۋنكت ءىىم مەن قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتتىڭ اقپاراتتىق جۇيەلەرىنە قوسىلماعان، جارتىسىنان كوبى جوندەۋدى قاجەت ەتەدى.

سەنات دەپۋتاتتارى ۋچاسكەلىك ينسپەكتورلاردى تۇرعىن ۇيمەن قامتاماسىز ەتۋ ماسەلەسىنە دە نازار اۋدارىپ، جەرگىلىكتى اتقارۋشى ورگاندار مەن سالالىق مەكەمەدەن ونى وڭ شەشۋدى سۇرايدى. شالعاي اۋىلدىق اۋداندارداعى ينسپەكتورلاردىڭ جارتىسى قىزمەت ورنى بويىنشا تۇرعىن ۇيمەن قامتاماسىز ەتىلمەگەن، بۇل جەدەل ارەكەت ەتۋ ءۇشىن ايتارلىقتاي قيىندىقتار تۋعىزادى. رەسپۋبليكالىق قامتاماسىز ەتۋدەگى ءىىو باسقا قىزمەتتەرىمەن سالىستىرعاندا ۋچاسكەلىك ينسپەكتورلار مەن ولاردىڭ كومەكشىلەرىنە تۇرعىن ءۇيدى جالعا العانى ءۇشىن اقى تولەنبەيتىنىن دە اتاپ وتكەن ءجون.

قىزمەتتىك اۆتوكولىكتىڭ، راديوستانتسيالاردىڭ، كەڭسە تەحنيكاسىنىڭ جاعدايى جاقسى ەمەس. ۇيىمداستىرۋعا قاتىستى كوپ پروبلەمانىڭ بولۋى ۋچاسكەلىك پوليتسيا ينسپەكتورلارىنىڭ ءوز مىندەتتەرىن ساپالى ورىنداۋىنا مۇمكىندىك بەرمەيدى. ال پوليتسيانىڭ كەلبەتى مەن حالىقتىڭ وعان دەگەن سەنىمىن ارتتىرۋ كوبىنەسە ۋچاسكەلىك ينسپەكتورلارعا بايلانىستى.

سوڭعى جاڭالىقتار

ۇقساس جاڭالىقتار