وسى جىلدىڭ 8 ايىندا 134,8 مىڭ جاس ازامات جۇمىسپەن قامتىلدى, ونىڭ ىشىندە 76,1 مىڭنان استام ادام الەۋمەتتىك جۇمىس ورىندارىنا, جاستار پراكتيكاسىنا جانە قوعامدىق جۇمىستارعا جىبەرىلدى. 4,5 مىڭ جاس ازامات ەڭبەك نارىعىندا سۇرانىسقا يە داعدىلار مەن ماماندىقتار بويىنشا قىسقا مەرزىمدى وقۋعا جىبەرىلدى, ال 6,4 مىڭ ادام جەڭىلدەتىلگەن ميكروكرەديتتەر مەن قايتارىمسىز گرانتتارعا يە بولدى.
سونىمەن قاتار جۇمىس بەرۋشىلەردى ەڭبەك تاجىريبەسى جوق جاستاردى قابىلداۋعا ىنتالاندىرۋ جانە ەڭبەك نارىعىندا جاستاردىڭ باسەكەگە قابىلەتتىلىگىن ارتتىرۋ ماقساتىندا "ەڭبەك" مەملەكەتتىك باعدارلاماسى اياسىندا العاش رەت جۇمىس ىزدەپ جۇرگەن تۇلەكتەرگە بارلىق مەنشىك نىسانىنداعى ۇيىمداردا قاجەتتى ەڭبەك داعدىلارىن ۇيرەتۋ ءۇشىن ولاردى جۇمىسقا ورنالاستىرۋدى كوزدەيتىن "العاشقى جۇمىس ورنى" جوباسى ىسكە اسىرىلۋدا.
"كوپبالالى جانە تابىسى از وتباسىلاردان شىققان كوللەدجدەر مەن جوعارى وقۋ ورىندارىنىڭ تۇلەكتەرى, سونداي-اق وقۋىن اياقتاعان ءارى ەڭبەككە قابىلەتتى مۇگەدەكتەر "العاشقى جۇمىس ورنى" جوباسى بويىنشا باسىم قۇقىققا يە", - دەدى ەڭبەك جانە حالىقتى الەۋمەتتىك قورعاۋ مينيسترلىگى حالىقتى جۇمىسپەن قامتۋ دەپارتامەنتى ديرەكتورىنىڭ ورىنباسارى ازيز يبراگيموۆ.
جالپى ەلىمىز بويىنشا وسى جىلى "ەڭبەك" باعدارلاماسىنا 430 مىڭ ادام قاتىسىپ, ولارعا ءتۇرلى قولداۋ شارالارى كورسەتىلدى. 279,8 مىڭ ادام جۇمىسپەن قامتىلسا, ونىڭ ىشىندە 146,7 مىڭ ادام تۇراقتى جۇمىسقا كىردى. 159,8 مىڭنان استام ادام سۋبسيديالاناتىن جۇمىس ورىندارىمەن قامتىلدى. بيزنەس-يدەيالاردى دامىتۋعا 6 984 ميكروكرەديت جانە 20,4 مىڭ گرانت بەرىلدى. 28,4 مىڭ ازامات كاسىپكەرلىك نەگىزدەرىنە قىسقا مەرزىمدى وقۋدان وتۋدە.
