فلورين يورداكە,
رۋمىنيا پارلامەنتى دەپۋتاتتار پالاتاسىنىڭ ۆيتسە-سپيكەرى
رەفورمالار مەن ۇسىنىستاردى ىسكە اسىرۋ ماقساتىندا ازاماتتارعا ارنالعان بىرىڭعاي زاڭدى ونلاين-پەتيتسيا ينستيتۋتىن قۇرۋ مىندەتى قازىرگى الەمدە اسا ماڭىزدى ماسەلە ەكەندىگى ءسوزسىز. سەبەبى بۇل حالىقپەن اشىق ديالوگقا, ازاماتتىق قوعام مەن قوعامدىق كەلىسىمدى نىعايتۋعا باعىتتالعان زاماناۋي ءتيىمدى مەملەكەتتىڭ ودان ءارى دامۋىنىڭ العىشارتى.
مەن پرەزيدەنت ق.توقاەۆتىڭ ءبىلىم بەرۋ ساپاسىن ارتتىرۋ, وتباسى ينستيتۋتىن قولداۋ, مەديتسينالىق قىزمەتتەردىڭ ساپاسىن قامتاماسىز ەتۋ, مەديتسينا قىزمەتكەرلەرىن جانە الەۋمەتتىك قولداۋ جۇيەسىن دامىتۋ قاجەتتىلىگى تۋرالى ايتقان سوزىمەن تولىقتاي كەلىسەمىن. ويتكەنى ولار بۇگىنگى تاڭدا ەڭ ماڭىزدى قۇندىلىقتار بولىپ تابىلادى.
الەكساندر رار,
نەمىس ساياساتتانۋشىسى
قازاقستان پرەزيدەنتى قاسىم-جومارت توقاەۆتىڭ پىكىرلەرى مەن ۇسىنىستارى قازىرگى زامان تالابىنا ساي. ول قازاقستان ەكونوميكاسىن جاڭعىرتۋ ءۇشىن جاساۋى ءتيىس شارالار مەن قادامداردى ءدال انىقتادى: مەملەكەتتىك شەنەۋنىكتەردى قىسقارتۋ, بيۋروكراتيامەن قۇرەس, جەكە كاسىپكەرلىكتى جان-جاقتى قولداۋ. جەرگىلىكتى باسشىلاردى سايلاۋ – وتە دۇرىس شارا. ق.توقاەۆتىڭ شەتەلدىك ينۆەستورلارعا ارناعان ۇسىنىستارى دا وتە تارتىمدى. پاندەميادان كەيىن ەكونوميكانى جاڭعىرتۋ – قازاقستاننىڭ الەمدەگى ءرولى مەن مارتەبەسىن كۇشەيتۋگە جاسالعان قيسىندى قادام.
اندرەاس يان,
بۋندەستاگتىڭ حالىقارالىق ىستەر جونىندەگى كوميتەتىنىڭ پارلامەنتتىك حاتشىسى
قازاقستانداعى مەملەكەتتىك قىزمەتكەرلەردى قىسقارتۋ جاقسى يدەيا دەپ سانايمىن. بۇل مەملەكەتتىك اپپارات جۇمىسىنىڭ تيىمدىلىگى مەن ساپاسىن ارتتىرادى. ءبىز, سونداي-اق قازاقستانداعى سىبايلاس جەمقورلىققا قارسى قابىلدانىپ جاتقان شارالاردى دا قولدايمىز. مەنىڭ ويىمشا, مەملەكەت قىزمەتكەرلەرىنىڭ ەڭبەكاقىسىن ارتتىرۋ دا دۇرىس ستراتەگيا بولىپ تابىلادى.
حادي سولەيمانپۋر,
ەكونوميكالىق ىنتىماقتاستىق ۇيىمىنىڭ باس حاتشىسى (ECO)
قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ جولداۋىندا كوڭىل بولىنگەن عىلىم مەن ءوندىرىستىڭ ءوزارا ىقپالداستىعى ارقىلى ەكونوميكانى ءارتاراپتاندىرۋدىڭ ماڭىزى ەرەكشە. پرەزيدەنتتىڭ ءبىلىم, ەكونوميكا, ەڭبەك ونىمدىلىگىن ارتتىرۋ, يننوۆاتسيالاردى دامىتۋ جانە جاساندى ينتەللەكت ەنگىزۋ تۋرالى ايتقاندارى قازىرگى كەزدە وزەكتى جانە ءتيىمدى. وسىنداي باعىتتارداعى جۇمىس قوسىمشا قۇن سالىعى قوسىلعان ونىمدەردى وندىرۋگە, ۇلتتىڭ ينتەللەكتۋالدىق الەۋەتىنىڭ وسۋىنە, سونداي-اق ادامداردىڭ ءومىرىن جاقسارتۋعا مۇمكىندىك بەرەتىن عىلىمدى قاجەت ەتەتىن وندىرىستەرگە اكەلەدى.
ۆويتەح فيليپ,
چەحيا پارلامەنتى دەپۋتاتتار پالاتاسى توراعاسىنىڭ ورىنباسارى
قازاقستان پرەزيدەنتىنىڭ حالىققا جولداۋىندا قازاقستان حالقىنا جانە وسكەلەڭ ۇرپاققا ەرەكشە كوڭىل بولىنگەن الەۋمەتتىك قولداۋلار مەنى ەرەكشە قىزىقتىردى. ارينە بۇل ماڭىزدى ينۆەستيتسيالار ەكەنى ءسوزسىز. قازاقستان ەكونوميكاسىنىڭ دامۋى تۋرالى ءسوز قوزعايتىن بولساق, پرەزيدەنت توقاەۆ ماڭىزدى قاعيدالاردىڭ قاتارىنا ادال باسەكەلەستىك, كاسىپكەرلەردىڭ جاڭا بۋىنى ءۇشىن نارىقتار مەن مۇمكىندىكتەر اشۋ قاعيدالارىن اتادى. بۇل چەحيا ءۇشىن دە ماڭىزدى.
ازاماتتاردىڭ الەۋمەتتىك ءال-اۋقاتىن قامتاماسىز ەتۋگە ەرەكشە نازار اۋدارىلدى, ول بولاشاقتىڭ باستى باسىمدىعى دەپ اتالدى.
قازىرگى تاڭدا الەمدە قارجى-ەكونوميكالىق داعدارىس ورشۋدە, حالىقارالىق ساۋدانىڭ قالىپتاسقان تەتىكتەرى قۇلدىراپ جاتقانىنا قاراماستان, قازاقستاندا ەكونوميكانىڭ ناقتى سەكتورىنىڭ ءوسۋىن بايقايمىن, مەملەكەتتىك باعدارلامالار حالىق يگىلىگى ءۇشىن جۇمىس ىستەپ جاتىر, تاۋەلسىزدىك جىلدارىنان بەرى قالىپتاسقان ۇلتارالىق كەلىسىم مەن ۇيلەسىمدىلىك ودان ءارى كۇشەيىپ كەلەدى, سوندىقتان قازاقستاندا حالىقارالىق باستامالار جۇزەگە اسىرىلۋدا.
الەكساندر تسينكەر,
يزرايلدىك ساياساتكەر –شىعىس ەۋروپا مەن تمد ەلدەرى ينستيتۋتىنىڭ ديرەكتورى
قازاقستان ەكونوميكاسىنداعى قالىپتاسقان جاعدايدى سيپاتتاي وتىرىپ, ءبىر جاعىنان – كوروناۆيرۋستىڭ اسەرى (ەلگە قىزمەت كورسەتۋ جانە ساۋدا سالاسىنداعى كاسىپورىنداردىڭ جۇمىسىن توقتاتا وتىرىپ, ەكى رەت كارانتين ەنگىزدى), ەكىنشى جاعىنان ەلدىڭ نەگىزگى ەكسپورتتىق تاۋارى – مۇناي باعاسىنىڭ قۇلدىراۋىنا قاراماستان پرەزيدەنت قاسىم-جومارت توقاەۆ بولىپ جاتقان جاعدايعا لايىقتى باعا بەردى.
پرەزيدەنت جاڭا ەكونوميكالىق ساياساتتىڭ جەتى قاعيداتىن تۇسىندىرۋگە ەگجەي-تەگجەيلى توقتالىپ, ارتاراپتاندىرىلعان ەكونوميكانى قۇرۋ – «جاي عانا قاجەتتىلىك ەمەس, بۇل بالاماسى جوق جول» – دەپ مالىمدەدى.
دجانلۋكا ەسپوزيتو,
ەۋروپا كەڭەسىنىڭ سىبايلاس جەمقورلىققا قارسى مەملەكەتتەر توبىنىڭ اتقارۋشى حاتشىسى (گرەكو)
قازاقستان پرەزيدەنتىنىڭ حالىققا ارناعان جولداۋىندا سىبايلاس جەمقورلىققا قارسى جۇيەلى كۇرەستى جانە الدىن الۋ شارالارىنىڭ ماڭىزدىلىعىن اتاپ وتكەنىن تولىقتاي قۇپتايمىن. سىبايلاس جەمقورلىقتىڭ الدىن الۋ GRECO-نىڭ باعالاۋ جۇمىسىنىڭ نەگىزى. سوت تورەلىگىنىڭ تاۋەلسىز, بەيتاراپ جانە ءادىل جۇيەسى ءوز كەزەگىندە سىبايلاس جەمقورلىققا قارسى كەز كەلگەن ءتيىمدى كۇرەستەگى زاڭ ۇستەمدىگىنىڭ نەگىزگى قۇرامداس بولىگى بولىپ ەسەپتەلەدى. مەن بۇل ماسەلەنىڭ پرەزيدەنت جولداۋىندا نازارعا الىنعانىن ەرەكشە اتاپ وتكىم كەلەدى. جالپى, سىبايلاس جەمقورلىققا قارسى ءتيىمدى كۇرەس قوعامنىڭ ينستيتۋتتارعا دەگەن سەنىمىن ارتتىرادى جانە ەكونوميكالىق دامۋ مەن وسۋگە ىقپال ەتەدى.
مۋحاممەد نياسس,
يسلام ىنتىماقتاستىعى ۇيىمى پارلامەنتتىك وداعىنىڭ باس حاتشىسى
ەڭ الدىمەن, قادىرلى قازاقستان پرەزيدەنتىنىڭ ءوز ەلىنىڭ وركەندەۋى مەن حالقىنىڭ ءال-اۋقاتى تۋرالى قامقورلىعىن ەرەكشە اتاپ وتكىم كەلەدى.
جوعارى مارتەبەلى ق.توقاەۆتىڭ كوشباسشىلىعىمەن مەملەكەت پەن ونىڭ حالقىنىڭ مۇددەلەرىن ەسكەرە, ەلدىڭ قوعامدىق-ساياسي ءومىرىن جاڭارتا وتىرىپ, ەل ءوز ماقساتتارىنا قول جەتكىزەتىنىنە سەنىمدىمىن. اتاپ كورسەتىلگەنىندەي, جالپى ماقسات ۇكىمەت پەن قوعام اراسىنداعى ۇزدىكسىز ديالوگ, ازاماتتىق قوعامدى نىعايتۋ جانە ونى تالقىلاۋعا تارتۋ ارقىلى «ەستيتىن مەملەكەت» تۇجىرىمداماسىن جۇزەگە اسىرۋعا بولادى.
جولداۋدا پرەزيدەنت مىرزانىڭ قازاقستان حالقى ءۇشىن جول كارتاسى رەتىندە قاراستىرۋعا بولاتىن سوزدەرىنەن شابىت الىپ, بۇل باستامالار كەلەشەك ۇرپاقتىڭ بەيبىتشىلىكتە, قاۋىپسىزدىك پەن وركەندەۋدە ءومىر ءسۇرۋىنىڭ كەپىلى بولا الاتىنىن اتاپ وتەمىن.
دراگومير كاريچ,
سەربيا رەسپۋبليكاسىنىڭ حالىق سكۋپششيناسىنىڭ دەپۋتاتى, اكادەميك, پروفەسسور, فيلوسوفيا عىلىمدارىنىڭ دوكتورى
قازاقستان پرەزيدەنتىنىڭ جولداۋى مەملەكەتتىڭ جانە ونىڭ اپپاراتىنىڭ, سونداي-اق بارلىق ازاماتتاردىڭ الدىندا تۇرعان ستراتەگيالىق مىندەتتەردى شەشۋدەگى كاسىبي كوزقاراس پەن جۇيەلىلىكتىڭ انىق ۇلگىسى. پرەزيدەنت ق.توقاەۆ ءوزىنىڭ جولداۋىندا قازىرگى زاماننىڭ قانداي دا ءبىر سىن-قاتەرلەرىنە قاراماستان, تەك تىنىمسىز دامۋ ارقىلى بارلىق سالالارداعى رەفورمالاردىڭ جالعاسۋى مەملەكەتكە سەنىمدى تۇردە العا جىلجۋعا مۇمكىندىك بەرەتىنىن ايقىن اتاپ كورسەتتى.
جولداۋ «ازاماتتارعا لايىقتى ءومىر, ولاردىڭ قۇقىقتارىن قورعاۋ, زاڭ ۇستەمدىگىن نىعايتۋ, سىبايلاس جەمقورلىققا قارسى كۇرەستى كۇشەيتۋ» سياقتى باعدارلاردى بەلگىلەپ بەردى. ناقتى ءىس-قيمىل جوسپارى ۇسىنىلدى.
جولداۋدا ازاماتتاردىڭ الەۋمەتتىك ءال-اۋقاتىن قامتاماسىز ەتۋ ماسەلەلەرىنە ەرەكشە كوڭىل بولىنگەن. تۇرعىن ءۇي ماسەلەسىن شەشۋدىڭ ناقتى جولدارى ۇسىنىلدى, وتباسى جانە دەموگرافيا, قولجەتىمدى جانە ساپالى ءبىلىم بەرۋ, دەنساۋلىق ساقتاۋ جۇيەسى, ەكولوگيا ماسەلەلەرى كوتەرىلدى.
«حالىق ۇنىنە قۇلاق اساتىن مەملەكەت» تۇجىرىمداماسى بارلىق جەردە ەنگىزىلۋدە. ەندى بۇل – زاماناۋي قازاقستاننىڭ نورماسى. بۇل العا باسقان قادام جانە وسى جولداعى رەفورمالار جالعاسۋدا.
مۇحامماد اسيف نۇر,
بەيبىتشىلىك جانە ديپلوماتيالىق زەرتتەۋلەر ينستيتۋتىنىڭ ديرەكتورى, پاكىستان
پرەزيدەنت ق.توقاەۆ ءوز جولداۋىندا قازاقستان ازاماتتارىنىڭ تىنىس-تىرشىلىگىن قامتاماسىز ەتۋدىڭ, ولاردىڭ قۇقىقتارىن قورعاۋدىڭ, زاڭدىلىقتى نىعايتۋدىڭ كوپتەگەن كۇردەلى مىندەتتەرىنە بايلانىستى شارالاردى قابىلداپ جاتقانىن جانە بۇل سىبايلاس جەمقورلىققا قارسى كۇرەستى دە كوزدەيتىنىن اتاپ ءوتتى.
قازىر پرەزيدەنت مينيسترلىكتەر مەن باسشىلاردىڭ الدىنا حالىقتىڭ ماسەلەلەرىن شەشۋ جانە ەكونوميكالىق دامۋدىڭ جەتى نەگىزگى قاعيداتىن ءتيىمدى ىسكە اسىرۋ ارقىلى ءوز جۇمىسىن قايتا قۇرۋعا كومەكتەسۋ مىندەتىن قويدى. ولار قازاقستان حالقىنىڭ الەۋمەتتىك جاعدايىنىڭ جاقسارۋىنا مۇمكىندىك جاساۋى ءتيىس.
يالچىن توپچۋ,
تۇركيا رەسپۋبليكاسى پرەزيدەنتىنىڭ باس كەڭەسشىسى
قازاقستان پرەزيدەنتىنىڭ حالىققا جولداۋىندا «حالىققا قىزمەت – حاققا قىزمەت» تۇسىنىگى باسشىلىققا الىنىپ, مەملەكەتتىك باسقارۋدا «جاريالىلىق», «تەڭدىك», «تيىمدىلىك», «ادىلەتتى ءبولىسۋ», «زاڭنىڭ ۇستەمدىگى», «تاريحي مۇراعا يە بولۋ» سياقتى قۇندىلىقتاردى كۇشەيتۋگە جانە زاماناۋي الەمدە ءتيىستى ءوز ورنىن الۋعا دەگەن تالپىنىس كورىنىس تاپقان.
جولداۋدا مەملەكەتتەگى ساباقتاستىق پرينتسيپىنە نەگىزدەلگەن, زامان تالابىنا ساي ساراپتامالار جانە ادىستەرمەن وتكەن مەن بولاشاقتى بايلانىستىراتىن جول سالۋعا دايىن, ءوز شەشىمىنە بەكەم مەملەكەتتىك ەرىك-جىگەردى كورىپ قۋانىپ وتىرمىز.
ءبىز ءوزىنىڭ قۇرىلۋ كەزەڭىن اياقتاعان مەملەكەتتىڭ ودان ءارى وركەندەۋگە بەل بۋعانىن بايقادىق.
قازىرگى الەمدە ەكونوميكاسىنان ساياساتىنا, مەملەكەتتىك باسقارۋ جۇيەسىنەن قورعانىسىنا, ءبىلىم بەرۋدەن دەنساۋلىققا دەيىنگى ءار سالادا ءوزىنىڭ ەركىن جانە تاۋەلسىز تىرشىلىگىمەن قازاقستاننىڭ وزىندىك ورنى بار ەكەنى ايقىن.
تسيفرلانعان ءداۋىردىڭ تالاپتارىن يگەرگەن, اقپاراتتىق تەحنولوگيالار يندۋسترياسى جاعىنان جەتىلگەن قازاقستاننىڭ وتە قىسقا مەرزىمدە بۇكىل الەم قىزىعا جانە قىزعانا قارايتىن ەلگە اينالاتىنىنا سەنىمدىمىن.
بارىنەن دە بۇرىن ەڭ ماڭىزدىسى, تاريحي سانا جانە ۇلتقا دەگەن سۇيىسپەنشىلىك نەگىزىندە ءبىرىنشى ورىنعا ادامدى قوياتىن, بارلىعى ادام ءۇشىن دەپ ايتاتىن, ءادىل باسقارۋدى ءبىزدىڭ ەڭ ۇلكەن ءتاجىمىز دەپ باعالايتىن كوشباسشىسى بار قازاقستان حالقىنىڭ راسىندا دا باعى بار.
سۆانتە كورنەلل,
قاۋىپسىزدىك ساياساتى جانە دامۋ ينستيتۋتىنىڭ ديرەكتورى جانە تەڭ قۇرىلتايشىسى (ISDP), شۆەتسيا
پرەزيدەنت ق.توقاەۆتىڭ جولداۋىندا جاريالانعان رەفورمالار مەملەكەتتىك ساتىپ الۋعا, ىسكەرلىك احۋالعا, كولەڭكەلى ەكونوميكاعا جانە بەلگىلى بولعانداي, جويىلۋى قيىن سىبايلاس جەمقورلىقتىڭ پروبلەماسىنا باعىتتالعان. ەگەر ىسكە اسىرىلسا, ق.توقاەۆتىڭ كوزقاراسى قازاقستاندى شىنىمەن زاماناۋي مەملەكەتتىڭ دامۋىنا جەتەلەيدى. ارينە بۇل وڭاي ماسەلە ەمەس, وعان تولىقتاي قول جەتكىزۋ ءۇشىن كوپتەگەن جىل قاجەت بولادى. بىراق پرەزيدەنت ۇسىنىپ وتىرعان اكىمشىلىكتىڭ جاڭا تۇرىندە ورىن الۋ مۇمكىندىكتەرىن كورگەن جاس, زاماناۋي جانە ءبىلىمدى ازاماتتاردىڭ كوپتىگىنىڭ ارقاسىندا جەتىستىكتەرگە قول جەتكىزۋ ءۇشىن قازاقستاندا وتە جاقسى مۇمكىندىكتەر بار.
پرەزيدەنت ق.توقاەۆ تەك ءسوز اراسىندا ناعىز كوپپارتيالىق جۇيەنى قۇرۋ ۇمتىلىسىن ايتىپ ءوتتى. مۇنىڭ ورنىنا ول ەنەرگياسىنىڭ ۇلكەن بولىگىن باسقارۋدىڭ ساپاسىنا باعىتتادى. وسىنداي باسىمدىقتى تۇسىنۋگە بولادى, سەبەبى رەفورمالاردىڭ بولجالدى ءتۇرى جەتىستىكتەر ءۇشىن قۋاتتى باسشىلىقتى تالاپ ەتەدى. بىراق قازاق مەملەكەتى كوبىرەك «ەستيتىن» عانا ەمەس, سونىمەن بىرگە «ادىلەتتىرەك» بولا باستاعان كەزدە, ازاماتتاردىڭ ءوزىن ساياسي ماقساتتاردا ۇيىمداستىرا الۋى دا, سونداي-اق سول پروگرەسستىڭ ءسوزسىز بولىگى جانە ۇكىمەتكە ولاردى ىنتالاندىرۋدىڭ تاسىلدەرىن تابۋ كەرەك بولادى.
لاسلو ۆاشا,
ماجارستاننىڭ سىرتقى ەكونوميكالىق بايلانىستار جانە سىرتقى ىستەر مينيسترلىگى جانىنداعى ينستيتۋتىنىڭ باس كەڭەسشىسى, اعا عىلىمي قىزمەتكەرى
قازاقستان عىلىمي-زەرتتەۋلەردى, ازىرلەمەلەردى جانە ءبىلىم بەرۋدى باسىم جانە ويلاستىرىلعان قولداۋ تۇرعىسىنان رەسۋرستىق-باعدارلانعان ەكونوميكالاردىڭ اراسىندا ارقاشان العاشقى ءىزاشار بولدى. بۇل شارالار ەكونوميكانى ءارتاراپتاندىرۋ تۇرعىسىنان قاراعاندا قازاقستاندىق عىلىمي سەكتوردىڭ ماڭىزدى ءرولى مەن مۇمكىندىكتەرىن ودان ءارى كۇشەيتەدى.
ءبىلىم بەرۋ جۇيەسىنىڭ بارلىق دەڭگەيلەرىندە كاسىپكەرلىككە وقىتۋدى ەنگىزۋ وتە جاقسى يدەيا بولىپ تابىلادى; ول ۇلتتىق ەكونوميكانىڭ دامۋىنا, شاعىن جانە ورتا بيزنەستىڭ نىعايۋىنا وتە جەمىستى اسەر ەتۋى مۇمكىن. الايدا بۇل ترەنينگتەر بيزنەس-قاۋىمداستىقتار مەن پالاتالاردىڭ ومىرلىك ماڭىزدى ءرولىن اتقارا الاتىن تاجىريبەگە باعىتتالۋى ءتيىس.
تاريق ءالي باحيت,
ەلشى, يىۇ باس حاتشىسىنىڭ گۋمانيتارلىق, مادەنيەت جانە الەۋمەتتىك ماسەلەلەر جونىندەگى ورىنباسارى
ءبىز قازاقستان رەسپۋبليكاسىنىڭ پرەزيدەنتى جوعارى مارتەبەلى قاسىم-جومارت توقاەۆتىڭ قازاقستان حالقىنا جولداۋىمەن ۇلكەن قىزىعۋشىلىقپەن مۇقيات تانىستىق. وندا جوعارى مارتەبەلى اسا ماڭىزدى تاقىرىپتاردى قوزعاپ, ءوز ەلىنىڭ ودان ءارى دامۋىنا باعىتتالعان رەفورمالار مەن جوبالاردى جالعاستىرۋ ءۇشىن ءتيىستى مىندەتتەمەلەردى بەلگىلەدى. ولاردىڭ قاتارىندا ءبىلىم بەرۋ, دەنساۋلىق ساقتاۋ, دامۋ, كەدەيلىكپەن كۇرەس, ينۆەستيتسيالار تارتۋ, ايەلدەردى كوتەرمەلەۋ, جاستاردىڭ الەۋەتىن ارتتىرۋ مەن قورشاعان ورتانى قورعاۋ جانە باسقا دا ومىرلىك ماڭىزى زور سالالار بار.
ءبىز قازاقستان حالقىنىڭ گۇلدەنۋى مەن ءال-اۋقاتىن كوتەرۋدى كوزدەگەن بۇل ماڭىزدى رەفورمالار مەن جوسپارلارىن جوعارى باعالايمىز. اتالعان جوبالار ۇيىم جارعىسىنىڭ جانە 2025 جىلعا دەيىنگى ون جىلدىق دامۋ باعدارلاماسىنىڭ ماقساتتارىنا سايكەس كەلەتىنىن اتاپ وتكىمىز كەلەدى.
جوعارى مارتەبەلى پرەزيدەنت قاسىم-جومارت توقاەۆتىڭ ساياسي, ەكونوميكالىق, الەۋمەتتىك جانە عىلىمي رەفورمالارعا قاتىستى دانا كوزقاراسى ەلدى جاڭا بەلەستەرگە جەتەلەيتىنىنە سەنەمىز. جالپى, قازاقستان حالقىنىڭ دامۋىن, ىلگەرىلەۋىن, وركەندەۋىن, قاۋىپسىزدىگى مەن تۇراقتىلىعىن قولدايتىنىمدى ماقتانا بىلدىرگىم كەلەدى.
دايىنداعان
عابيت ىسكەندەر ۇلى,
«Egemen Qazaqstan»
