تەننيسشىلەر اراسىندا «ۇلكەن دۋلىعا» ساناتىنا جاتاتىن تۋرنيرلەردىڭ مارتەبەسى اسا جوعارى. اقش پەن اۋستراليانىڭ اشىق بىرىنشىلىكتەرى, رولان گارروس پەن ۋيمبلدوندا تابىستى ونەر كورسەتۋ وسى سپورت ءتۇرىن سەرىك ەتكەن ءار ويىنشىنىڭ ارمانى. سونىمەن قاتار ولاردىڭ جۇلدە قورى دا وتە قوماقتى. ال ەڭ باستىسى, ايتۋلى جارىستاردا تابىستى ونەر كورسەتسەڭ, الەمدىك رەيتينگتەگى جاعدايىڭ دا كۇرت جاقسارادى.
وتكەنگە زەر سالساق, «ۇلكەن دۋلىعا» دودالارىندا قازاقستاننىڭ ساناۋلى عانا تەننيسشىلەرى اۋىز تولتىرىپ ايتارلىقتاي تابىستارعا قول جەتكىزگەنىن انىق اڭعارۋعا بولادى. ماسەلەن, ياروسلاۆا شۆەدوۆا (2010, 2012) مەن يۋليا پۋتينتسەۆا (2016, 2018) ەكى رەتتەن رولان گارروستىڭ شيرەك فينالىنا شىقتى. 2018 جىلى ۋيمبلدوندا شۆەدوۆا ءدال سول مەجەگە دەيىن جەتتى. مىنە, بار تابىسىمىز وسىمەن عانا شەكتەلەدى.
كۇنى كەشە عانا اياقتالعان اقش-تىڭ اشىق بىرىنشىلىگىندە پۋتينتسەۆانىڭ جوعارىداعى ناتيجەنى جاقسارتۋىنا جاقسى مۇمكىندىگى بولدى. نيۋ-يوركتەگى جارىستىڭ العاشقى اينالىمدارىندا امەريكالىق روبين مونتگومەري, بەلورۋسسيالىق ۆەرا لاپكو مەن الەكساندرا ءسوسنوۆيچتى سان سوقتىرعان جەرلەسىمىز ءتورتىنشى كەزەڭدە الەمنىڭ 15 راكەتكاسى, حورۆاتيالىق پەترا مارتيچتەن مەرەيى ۇستەم بولدى. ءسويتىپ يۋليا العاش رەت US وpen ءتۋرنيردىڭ شيرەك فينالىنا جولداما الدى.
شيرەك فينالدا يۋليانىڭ جولى امەريكالىق دجەننيفەر برەديمەن قيىستى. ەكەۋى دە 1995 جىلى دۇنيەگە كەلگەن. وسى مەجەدەن سۇرىنبەي وتكەن جاعدايدا پۋتينتسەۆانىڭ ەسىمى «ۇلكەن دۋلىعا» ساناتىنداعى جارىستاردىڭ جارتىلاي فينالىندا ونەر كورسەتكەن تۇڭعىش قازاقستاندىق تەننيسشى رەتىندە تاريحتا قالاتىن ەدى. ءدال سولاي بولاتىنىنا ءبىز دە كامىل سەندىك. سەبەبى سوعان دەيىن اقش وكىلىمەن ەكى مارتە شەبەرلىك بايقاسقان وتانداسىمىز ەكەۋىندە دە باسىم ءتۇستى جانە دە دجەننيفەردىڭ باعىندىرعان پالەندەي بەلەستەرى دە جوق. كادىمگى قاتارداعى كوپ ويىنشىلارىنىڭ ءبىرى. قازىرگى كەزدە WTA رەيتينگىندە برەدي پۋتينتسەۆادان التى ساتى تومەن تۇر. بىراق بۇل جولى يۋلياعا تاريحتا ءىز قالدىرۋ باقىتى بۇيىرمادى. قوس قۇربى اراسىنداعى باسەكە امەريكالىقتىڭ پايداسىنا شەشىلدى.
وزگە ويىنشىلارىمىز جايىندا ايتساق, تۇساۋكەسەر كەزدەسۋدە الەكساندر بۋبليك ۇلىبريتانيالىق كايل ەدمۋنتەن جانە زارينا دياس امەريكالىق بەرناردا پەرادان ۇتىلدى. العاشقى اينالىمدا ۋكراينالىق كاتارينا زاۆاتسكايانىڭ تاس-تالقانىن شىعارعان ەلەنا رىباكينا كەلەسى ويىندا اقش-تىڭ وكىلى شەلبي رودجەرستەن جەڭىلدى. ولارعا قاراعاندا ميحايل كۋكۋشكين ءبىراز ءتاۋىر وينادى. باستاپقىدا ول ماجارستاندىق اتيللا بالاج بەن چيليلىك كريستيان گاريننەن باسىم ءتۇستى. الايدا ءۇشىنشى كەزەڭدە اۋستراليالىق دجوردان تومپسوننىڭ وسال تۇسىن تابا المادى.
اقش-تىڭ اشىق بىرىنشىلىگىنىڭ جۇلدە قورى بيىل 53 400 000 دوللاردى قۇرادى. قازاقستاننىڭ تەننيسشىلەرى اراسىندا ەڭ ۇزدىك ناتيجەگە قول جەتكىزىپ, شيرەك فينالدا ونەر كورسەتكەن يۋليا پۋتينتسەۆانىڭ ەسەپشوتىنا 425 000 دوللار اۋدارىلدى. ەگەر جەرلەسىمىز جانكەشتىلىك تانىتىپ, تاعى ءبىر كەزدەسۋدە جەڭىسكە جەتكەندە 800 مىڭ دوللاردى ء«اميانىنا» سالاتىن ەدى. بۇل – جارتىلاي فينالعا جەتكەن سپورتشىلارعا بەرىلەتىن سىياقى مولشەرى. ال فينالعا شىققاندارى 1,2 ميلليوندى ەنشىلەسە, جەڭىمپاز اتانعانداردىڭ بايلىعى 3 ميلليون دوللارعا ارتادى. سونداي-اق جارتى جولدا قالىپ قويعاندار بىلاي تۇرسىن, باستاپقى باسەكەلەردە سۇرىنگەندەردىڭ وزدەرى اقش-تان قۇر قول قايتپايدى. ولار مىناداي كولەمدە قارجىعا يەلىك ەتەدى: ءبىرىنشى كەزەڭ – 61 مىڭ, ەكىنشى كەزەڭ – 100 مىڭ, ءۇشىنشى كەزەڭ – 163 مىڭ جانە ءتورتىنشى كەزەڭ – 250 مىڭ دوللار.
سونىمەن, 15 كۇنگە سوزىلعان US وpen ءتۋرنيرى ءوز مارەسىنە جەتتى. بۇل جارىستا ايەلدەر اراسىندا اقتىق سىندا بەلورۋسسيالىق ۆيكتوريا ازەرەنكو مەن جاپونيالىق ناومي وساكا كەزدەستى. بۇل باسەكە 1:6, 6:3, 6:3 ەسەبىمەن كۇنشىعىس ەلى وكىلىنىڭ پايداسىنا شەشىلدى. بۇل – ونىڭ اقش-تىڭ اشىق بىرىنشىلىگىندەگى ەكىنشى جەڭىسى. وساكا وسىدان ەكى جىل بۇرىن ءدال وسى تۋرنيردە توپ جاردى. ال اسا تارتىستى وتكەن ەرلەر سايىسىندا اۋستريالىق دومينيك تيم گەرمانيالىق الەكساندر زۆەرەۆتەن 2:6, 4:6, 6:4, 6:3, 7:6 ەسەبىمەن ايلاسىن اسىرىپ, ءوزىنىڭ سپورتتىق كارەراسىندا تۇڭعىش رەت «ۇلكەن دۋلىعا» دوداسىنىڭ جەڭىمپازى اتاندى.
