ودان بولەك, جەكەلەگەن كاسىپكەر ازاماتتار دا كەڭدىك تانىتىپ, قاۋىپتى كەسەلمەن كۇرەستە بەلسەندىلىك تانىتۋدا.
مۇنداي اتىمتاي جومارت ازاماتتار اۋليەاتا وڭىرىندە دە از ەمەس. جامبىل وبلىسى, جۋالى اۋدانىندا دۇنيەگە كەلگەن بەلگىلى كاسىپكەر تالعات تۇرىمباەۆ اۋداندىق ورتالىق اۋرۋحاناعا جالپى قۇنى 100 ميلليون تەڭگەدەن اساتىن قاجەتتى قۇرال-جابدىقتار ساتىپ الىپ بەردى. ونىڭ ىشىندە 30 وتتەگى باللونى, 3000 دانا جەكە قورعانىش كيىمدەرى, 5000 دانا №95 رەسپيراتورلار جانە 10 دانا وتتەگى كونتسەنتراتورلارى بار.
سونداي-اق, اۋدانداعى ورتالىق اۋرۋحانانىڭ مامانداندىرىلعان جىلجىمالى كولىكتەر پاركى جاڭا زاماناۋي كوپفۋنكتسيونالدى رەانيموبيلمەن دە تولىقتى. اتالعان جىلجىمالى رەانيموبيلدىڭ ءوزى 40 ميلليون تەڭگە تۇرادى. سونىمەن قاتار, بولاشاقتا قوسىمشا ءموبيلدى تسيفرلىق دياگنوستيكالىق جابدىقتى ورناتۋ جوسپاردا بار. تاعى دا ماڭىزدىسى, اتالعان كومپانيا الداعى ۋاقىتتا وڭىردەگى از قامتىلعان وتباسىلارعا ارناپ ەكى تۇرعىن ءۇيدى پايدالانۋعا بەرەتىن بولدى. كاسىپكەرمەن جۋالى اۋدانىنىڭ اكىمى نارباي ەرگەبەكوۆ كەزدەسىپ, تۋعان جەرىنە قولداۋ كورسەتىپ وتىرعان ازاماتقا اۋدان تۇرعىندارىنىڭ اتىنان العىس ايتتى. جۋالىلىقتاردى قۇتتىقتاپ, ءوزىنىڭ يگى تىلەگىن جەتكىزدى. سالتاناتتى جيىنعا اۋدان تۇرعىندارىمەن قاتار, مەديتسينا قىزمەتكەرلەرى دە قاتىستى. ءوز سوزىندە كاسىپكەر تالعات تۇرىمباەۆ وسىنداي قاۋىپتى كەزەڭدە باسىن قاتەرگە تىگىپ, ادام ءومىرىن اراشالاپ قالۋ ءۇشىن ەڭبەك ەتىپ جۇرگەن مەديتسينا قىزمەتكەرلەرىنە ريزاشىلىعىن ءبىلدىردى.
جالپى, تالعات تۇرىمباەۆ حالىقارالىق "Kusto Group" كومپانياسىنىڭ نەگىزىن قالاۋشىلاردىڭ ءبىرى رەتىندە تانىمال. 2002 جىلى قۇرىلعان اتالعان كومپانيا قازاقستان, يزرايل, كانادا, گرۋزيا, رەسەي, سينگاپۋر, تۇركيا, ۆەتنام, ۋكراينا جانە قىتاي مەملەكەتتەرىندە جۇمىس ىستەيدى. توپ قۇرامىندا 30 كومپانيا بار بولسا, وندا 8000-نان استام ادام جۇمىس ىستەيدى. كومپانيانىڭ باستى باعىتتارىنىڭ ءبىرى قايىرىمدىلىق جاساۋ بولعاندىقتان, كومپانيا اۋەلى حالىقتىڭ وسال توپتارىنا كومەك كورسەتىپ كەلەدى. تالعات تۇرىمباەۆ تا وسى ۋاقىتقا دەيىن ءوزى دۇنيەگە كەلگەن جۋالى توپىراعىنداعى بىرقاتار كوپبالالى وتباسىلار مەن مەكتەپتەرگە كومەك كورسەتكەن بولاتىن.
جامبىل وبلىسى
