ءبىلىم جانە عىلىم ۆيتسە-ءمينيسترى شولپان تاڭاتقىزى:
«ەلىمىزدە اتا-انالاردىڭ قالاۋى بويىنشا مەكتەپتە ءداستۇرلى فورماتتا وقىپ جاتقان وقۋشىلار بار. سايكەسىنشە وسىنداي وقۋشىلارعا ءبىلىم بەرۋ ءۇشىن مۇعالىمدەر مەكتەپكە قاتىناپ, شتاتتىق رەجىمدە جۇمىس ىستەپ ءجۇر. وسى رەتتە مينيسترلىككە قىزمەتىن اتقارۋ كەزىندە كوروناۆيرۋس جۇقتىرىپ العان مۇعالىمدەرگە دە دارىگەرلەرگە تولەنگەنىندەي وتەماقى قاراستىرۋ تۋرالى وتىنىشتەر مەن سۇراقتار كوپتەپ ءتۇستى. بۇگىندە مۇعالىمدەرمەن بىردەي باسقا دا قوعامدىق قىزمەت وكىلدەرى, كاسىپورىن جۇمىسشىلارى, ساتۋشىلار, جۋرناليستەر, كاسىپكەرلەر مەن ەرىكتىلەر جۇمىس ىستەپ جاتىر. سوندىقتان مۇعالىمدەردى قازىر قوعامدا ەڭبەك ەتىپ جۇرگەن باسقا ماماندىق يەلەرىنەن ءبولىپ قاراۋعا بولمايدى», دەدى.
اتالعان بريفينگتە قاشىقتان وقىتۋدىڭ قازىرگى جاعدايىندا كوپبالالى وتباسىنداعى بالالاردىڭ جايى دا ەسكەرىلگەنى ايتىلدى.
ء«بىلىم بەرۋ پروتسەسى سينحروندى (تىكەلەي ەفيردە, ونلاين رەجىمدە ساباق ءوتۋ) جانە اسينحروندى (ۇزدىكسىز بايلانىستا ءبىلىم بەرۋ) وقىتۋ فورماتىندا ۇيىمداستىرىلۋدا. سونىڭ ىشىندە اسينحروندى ءتۇرى كوبىرەك قولدانىپ وتىر. بۇل دەگەنىمىز – مۇعالىمنىڭ وقۋشىمەن قاشىقتان تۇراقتى تۇردە ۇزدىكسىز بايلانىس ورناتىپ, تاقىرىپتىق تاپسىرمالار بەرۋ, كەرى بايلانىس ورناتۋ ارقىلى ءبىلىم بەرۋى. سوندىقتان وتباسىنداعى 3 وقۋشىنىڭ ءبىر ۋاقىتتا كومپيۋتەر پايدالانۋىنا قاجەتتىلىك تۋمايدى. كەيبىر تاپسىرمالاردى تەلەفونمەن ورىنداپ, مۇعالىمىنە جاۋابىن جىبەرۋگە بولادى. بۇل جەردە ءبىر ۇيدەگى بالالاردىڭ ساباق وقۋىنا جاعداي جاساۋدى اتا-انا قولعا الۋى كەرەك», دەدى ش.تاڭاتقىزى.
سوڭعى كەزدە قاشىقتان وقىتۋدى ۇيىمداستىرۋعا مەملەكەتتەن قارجى قاراستىرىلعانى جونىندە اقپاراتتار تاراپ كەتكەن ەدى. ءباسپاسوز جيىنىندا وسى ماسەلەگە قاتىستى دا رەسمي جاۋاپ بەرىلدى.
ءبىلىم جانە عىلىم ءمينيسترىنىڭ قارجى سالاسىنا جاۋاپتى ورىنباسارى بيبىگۇل امانگەلدىقىزى:
«ەلىمىزدەگى شاعىن جيناقتى مەكتەپتەردەن باسقا وقۋ وشاقتارى قاشىقتان وقىتۋعا كوشكەن كوكتەمدەگى 4 توقساندا دا, سونداي-اق قازىر دە جاڭا فورماتتى ۇيىمداستىرۋعا مەملەكەتتەن ەشقانداي قارجى بولىنگەن جوق. رەسپۋبليكالىق, جەرگىلىكتى بيۋدجەتتەن نەمەسە قانداي دا ءبىر ۇكىمەتتىك ۇيىمنىڭ قاراجاتىنان قاشىقتان وقىتۋدى ۇيىمداستىرۋعا اقشا قاراستىرىلمادى. وتكەن توقساندا دا, جاڭا وقۋ جىلىندا دا بارلىق جۇمىستار تەك مۇعالىمدەر مەن اتا-انالاردىڭ ەڭبەگىمەن ىسكە اسىرىلىپ كەلەدى. سونىمەن قاتار 4 توقسانداعى جانە جاز ايلارىنداعى ازىرلەنگەن ۆيدەو ساباقتاردىڭ ءبارى تەگىن ءتۇسىرىلدى», دەدى.
