"بىرتۋعان قازاق-قىرعىز وقىرماندارىنان ءسۇيىنشى سۇرايتىن جاڭالىعىمىز بار: ارادا الپىس جىل سالىپ "ماناس" داستانى قازاقشا سويلەدى.
ايگىلى ەپوس 1959-1962 جىلدارى اكادەميك مۇحتار اۋەزوۆتىڭ جەتەكشىلىگىمەن اۋدارىلىپ باسىلعان بولاتىن. ول كەزدە جىردى قازاقشا سويلەتكەندەر - داڭعايىر جىردى ق.جۇماليەۆ, ع.ورمانوۆ, ت.جاروكوۆ, د.ءابىلوۆ, ج.مولداعاليەۆ, ق.بەكحوجين, ءا.تاجىباەۆ, ح.ەرعاليەۆ, س.ماۋلەنوۆ, ع.قايىربەكوۆ سىندى ساڭلاقتار ەدى.
بۇل جيناقتى ءوزىمىز بالا كەزىمىزدە جاتا-جاستانا وقىدىق. جىلدار وتە ول جيناق قولعا تۇسە قويمايتىن سيرەك كىتاپقا, تاپتىرمايتىن قازىناعا اينالدى. تاۋەلسىزدىك جىلدارى دا "ماناس" قايتا جاريالانا قويماپتى.
بۇل جولى جىردى قازاقشا سويلەتكەن بەلگىلى توكپە اقىن, دارىندى ماناسشى بايانعالي ءالىمجانوۆ. ءوزى ماناسشى بولعاندىقتان بايانعالي اعانىڭ بۇل نۇسقاسى تەك قانا جىردىڭ تازا اۋدارماسى ەمەس, كوپتەگەن ۆاريانتتاردى سارالاپ, ۇلى ەپوپەيانىڭ شىتىرمان شۇيگىنىن ارالاپ, شىعارماشىلىقپەن تەرىپ العان وزگەشە نۇسقا دەۋگە بولادى.
سوندىقتان كىتاپقا العىسوز جازعان قىرعىز رەسپۋبليكاسىنىڭ پرەزيدەنتى سوورونباي جەەنبەكوۆ ەڭبەككە جوعارى باعا بەردى, ونى ءبىر تۋعان ەلدەرىمىزدىڭ ءداستۇرلى مادەني بايلانىستارىن بەكەمدەيتىن تۋىندى دەپ باعالادى.
حالىقارالىق تۇرىك اكادەمياسى بۇعان دەيىن ماناستىڭ سوزدىگىن شىعارىپ, ەنتسيكلوپەدياسىن جاريالاعان ەدى. ماناسشىلار فەستيۆالىن وتكىزىپ, موللا مەدەر مەرگەنباەۆ ۆاريانتىن لاتىن ءالىپبيى نەگىزىندە شىعارعان بولاتىن. بۇل جيناق سول ءداستۇردىڭ جالعاسى ىسپەتتى", دەپ جازدى دارحان قىدىرالى.
