پرەزيدەنت • 10 قىركۇيەك، 2020

مەملەكەت باسشىسى قوستاناي وبلىسىنىڭ شارۋالارىمەن كەزدەستى

38 رەت كورسەتىلدى

مەملەكەت باسشىسى قوستاناي وبلىسىنا جۇمىس ساپارى اياسىندا ەگىس القاپتارىن ارالاپ، "زارەچنوە اۋىل شارۋاشىلىعى تاجىريبەلىك ستانساسى" جشس-نىڭ استىق جيناۋ بارىسىمەن تانىستى، دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.

پرەزيدەنتكە ەگىن وراعى ناۋقانىنىڭ سوڭعى كەزەڭى تۋرالى اقپارات بەرىلدى. بۇگىنگە دەيىن وڭىردە ءداندى داقىلداردىڭ 3،1 ملن گەكتارى نەمەسە 76% جينالعان، ونىمدىلىگى ءار گەكتاردان 10 تسەنتنەردەن اينالىپ وتىر. استىق جيناۋعا 9100  كومباين جۇمىلدىرىلعان، جۋىق ارادا ءداندى داقىلداردى جيناۋ ناۋقانى اياقتالادى.

سونىمەن قاتار مەملەكەت باسشىسىنا وڭىردە جۇزەگە اسىرىلىپ جاتقان مال شارۋاشىلىعىن دامىتۋ، اگروونەركاسىپ كەشەنىن تسيفرلاندىرۋ، اۋىلشارۋاشىلىعى تەحنيكاسىن قۇراستىرۋ جوبالارى تۋرالى مالىمەت بەرىلدى.

قاسىم-جومارت توقاەۆ اۋىل شارۋاشىلىعى تاۋارلارىن وندىرۋشىلەرمەن كەزدەسۋدە اگرارلىق سالانىڭ تابىستى دامۋى، جالپى ەل ەكونوميكاسىنىڭ باسەكەگە قابىلەتتىلىگىن ايقىندايتىن نەگىزگى فاكتور ەكەنىن اتاپ ءوتتى.

"قوستاناي وبلىسىنىڭ ەكونوميكاسى جاقسى دامىپ كەلەدى دەۋگە بولادى. بولاشاقتا بۇدان دا جاقسى بولاتىنىنا دەپ سەنەمىن. الدىمىزدا ماڭىزدى مىندەتتەر تۇر. ەكونوميكامىز پاندەميا سالدارىنان بولعان سىناققا توزە الدى. بيىل ءونىم جاقسى ەكەنى كورىنىپ تۇر"، – دەدى مەملەكەت باسشىسى.

1

ديحانشىلار پرەزيدەنتكە اۋىلداردا جۇرگىزىلىپ جاتقان جاڭعىرتۋ جۇمىستارى مەن يگى باستامالار، سونداي-اق الەۋمەتتىك ماسەلەلەردىڭ بىرتىندەپ شەشىمىن تاۋىپ جاتقانى تۋرالى ايتتى.

"وسى جىلدىڭ ىشىندە اۋىلشارۋاشىلىعىندا دا، يندۋستريادا دا ەداۋىر جەتىستىكتەرگە جەتۋىمىز كەرەك. اسىرەسە، الەۋمەتتىك-ەكونوميكالىق ماسەلەلەردى شەشۋ اسا ماڭىزدى. تۇرعىنداردىڭ ارقايسىسى بىزدەن ناقتى ماسەلەلەردىڭ شەشىمىن كۇتۋدە. مەنىڭ تاپسىرماما سايكەس ۇكىمەت قازىرگى ۋاقىتتا وسى ماسەلەلەرمەن اينالىسۋدا. ۇكىمەت جولداۋدى ىسكە اسىرۋ جونىندەگى جالپىۇلتتىق جوسپار قابىلدادى. تابىستى بولادى دەپ ەسەپتەيمىن، بىراق بىرلەسىپ جۇمىس اتقارۋ كەرەك"، – دەدى قاسىم-جومارت توقاەۆ.

كەزدەسۋدە شارۋالار وندىرىلگەن اۋىل شارۋاشىلىعى ونىمدەرىن وتكىزۋ جانە ەكسپورتتاۋ ماسەلەلەرىن كوتەردى.

ء"ونىمدى ءوندىرۋ ۇلكەن ماسەلەنىڭ ءبىرى ءارى نەگىزگىسى بولسا، ەندى ونى نارىققا شىعارۋ دا ماڭىزدى. ۇكىمەت وسى ماسەلەلەرمەن اينالىسۋى ءتيىس. قازىر ءبىز ەۋرازيالىق ەكونوميكالىق وداق اياسىندا ناقتى ماسەلەلەردى شەشۋمەن اينالىسىپ جاتىرمىز. قاراشا ايىندا پرەزيدەنتتەردىڭ باسشىلىعىمەن شەكارالاس وڭىرلەردىڭ باسشىلارىنىڭ ايماقتىق كەزدەسۋى وتەدى. پاندەمياعا بايلانىستى قانداي فورماتتا وتەتىنى بەلگىسىز، بىراق ءوتۋى ءتيىس. جالپى ەاەو اياسىنداعى ينتەگراتسيانى دامىتۋ بويىنشا ءبىزدىڭ باعىتىمىز ءوز كۇشىندە"، – دەدى پرەزيدەنت.

كوروناۆيرۋس ىندەتى سالدارىنان تۋىنداعان قيىندىقتارعا قاراماستان، ديحانشىلار ءوندىرىستى ساقتاپ قانا قويماي، ونىڭ كولەمىن ارتتىرا الدى. پرەزيدەنت ەلىمىزدىڭ ازىق-ت ۇلىك قورىن قامتاماسىز ەتۋ بويىنشا قابىلدانعان شارالار ءۇشىن اۋىل جۇمىسشىلارىنا ريزاشىلىعىن ءبىلدىرىپ، جيىن-تەرىم ناۋقانىن ۋاقىتىلى اياقتاپ، مول ءونىم الۋلارىنا تىلەكتەستىك ءبىلدىردى.

سوڭعى جاڭالىقتار

ۇقساس جاڭالىقتار