اننا نازاروۆنا شەستوپالوۆا اۋرۋحاناعا سان سۇيەگىنىڭ كۇردەلى سۋبۆەرتيكالدى سىنۋىمەن تۇسكەن. كەيۋانانىڭ جاس ەرەكشەلىگىنە قاراماستان, تراۆماتولوگتار وعان وتا جاساۋعا شەشىم قابىلداعان. وتادان كەيىن كەلەسى كۇنى-اق اننا شەستوپالوۆا اياعىنان تىك تۇردى.
– بىزدە مۇنداي جاستاعى ناۋقاستار بولعان جوق, بىرنەشە جىل بۇرىن ءبىز 96 جاستاعى زەينەتكەرگە وتا جاساعان ەدىك, قازىر ول 103 جاستا ءارى دەنساۋلىعى جاقسى. اننا اپامىز دا وتادان كەيىن جاقىندارىن قۋانتادى دەپ ۇمىتتەنەمىز. ناۋقاستىڭ كوڭىل-كۇيى جاقسى, ءالى دە كۇرەسۋگە دايىن, دەيدى تراۆماتولوگيا بولىمشەسىنىڭ مەڭگەرۋشىسى ۆلاديمير سەميونوۆ,
"ادەتتە مۇنداي وتالار ناۋقاستىڭ جاسىنا بايلانىستى اۋرۋ بولۋىمەن قيىنداي تۇسەدى. وتا جاساۋ الدىندا ءبىز اناليزدەردى باقىلاپ, ناۋقاستى دايىنداپ, ونىڭ رۇقساتىن الدىق. ءبارى ويداعىداي ءوتتى, ەگەر ءبىزدىڭ كومەگىمىز بولماسا, ول توسەك تارتىپ جاتىپ قالار ەدى. وتانىڭ ءوزى بار-جوعى 35 مينۋتقا سوزىلدى", دەيدى تراۆماتولوگ احمەد داۆرەشوۆ.
اننا نازاروۆنا ءومىر بويى باستاۋىش مەكتەپتە مۇعالىم بولىپ جۇمىس ىستەگەن, سودان كەيىن ول الماتى وبلىسىندا بالاباقشا اشتى, اۋىلدىق وكرۋگتىڭ دەپۋتاتى, حالىق سوتىنىڭ كەڭەسشىسى بولدى. ونىڭ ءۇش قىزى, بەس نەمەرەسى مەن جەتى شوبەرەسى بار.
"مەن وتا جاساتۋدان قورىقپادىم. مەنىڭ ۇزاق ءومىر ءسۇرۋىمنىڭ سەبەبى ءاردايىم مەيىرىمدى, ەشقانداي اداممەن جانجالداسپاي, بارلىعىنا تەك جاقسىلىق تىلەپ, ءبارىن جاقسى كوردىم, دۇرىس تاماقتانىپ, تازا اۋادا كوبىرەك ۋاقىت وتكىزۋ كەرەك جانە سالاۋاتتى ءومىر سالتىن ۇستانۋ قاجەت", دەيدى كەيۋانا.
ايتا كەتەيىك, الماتى قالالىق جەدەل شۇعىل كومەك كورسەتۋ اۋرۋحاناسىنىڭ تراۆماتولوگيا بولىمشەسىندە جىلىنا ءار ءتۇرلى 1500-عا جۋىق وتا جاسالادى, دارىگەرلەر كارانتين كەزەڭىندە كۇردەلى قورعانىس شارالارىنا قاراماستان وتا جاساۋدى جالعاستىردى.
