وقۋلىقتاردى باسۋعا قاتىستى بايانداما جاساعان ا.ايماعامبەتوۆ مينيسترلىكتىڭ اپپارات جينالىسىندا:
«وقۋلىق – ساپالى ءبىلىم الۋدىڭ ماڭىزدى قۇرالى. وسى رەتتە وقۋلىقتاردى شىعارۋ ءتارتىبى وزگەرتىلىپ, بۇل تۋرالى نورماتيۆتىك-قۇقىقتىق اكتىلەر ادىلەت مينيسترلىگىندە تىركەلىپ, وزگەرىستەر كۇشىنە ەندى. بۇدان بىلايعى وقۋلىقتاردىڭ ساپاسى مۇلدەم بولەك بولادى. ايتالىق, وقۋلىقتاردىڭ فورماتىنا قاتىستى ورتاق تالاپ ەنگىزىلدى. وزدەرىڭىز بىلەتىندەي, وقۋلىقتاردىڭ بىرەۋى – ۇلكەن, بىرەۋى – كىشكەنتاي. 1-سىنىپتىڭ وقۋشىلارىنا ارنالعان قازىرگى وقۋلىقتار تىم كولەمدى بولعاندىقتان, مۇعالىمدەر ەكى بالانىڭ ءبىر پارتاعا كىتاپتارىن سىيعىزا الماي قينالاتىنىن جەتكىزدى. وقۋلىقتار تەك شريفت, ديزاين, جالپى بەزەندىرۋ ماسەلەسىنە عانا ەمەس, ءبىلىم الۋشىلاردىڭ جاس ەرەكشەلىگىنە ساي ازىرلەنۋى ءتيىس. سودان كەيىن كەيبىر وقۋلىقتارداعى تاپسىرمالاردا ينتەرنەتكە سىلتەمەلەر بەرىلەدى. بىراق وقۋشىلاردىڭ بارىندە بىردەي ينتەرنەت جوق ەكەنى ەسكەرىلمەگەن. جوعارىدا ەنگىزىلگەن وزگەرىستەردە وقۋلىقتاردىڭ مازمۇنىندا وسىنداي شالا تاپسىرمالاردىڭ بولماۋىن قاراستىرىپ وتىرمىز», دەدى.
ال رەسپۋبليكالىق عىلىمي-پراكتيكالىق «وقۋلىق» ورتالىعىنىڭ ديرەكتورى عاني بەكتاي ۇلى سوڭعى بىرنەشە جىلدان بەرى بيىل ءبىرىنشى رەت 3 ملن-نان اسا وقۋشىنىڭ وقۋلىقتارمەن 10 پايىز قامتاماسىز ەتىلگەنىن ايتتى.
«بۇل پاندەميا جاعدايىندا وقۋشىلارعا جاسالعان مەملەكەتتىڭ قولداۋى دەپ بىلگەن ءجون. وقۋلىقتاردى ازىرلەۋدىڭ جاڭا تارتىبىنە كەلسەك, كىتاپتاردى ساراپتامادان وتكىزۋگە پسيحو-لينگۆيستيكالىق جانە كوركەم ادەبيەت تۇرعىسىنان تەكسەرىستى قوستىق. بۇل ءبىزدىڭ مادەنيەتىمىزگە, قالىپتاسقان داستۇرىمىزگە, دىنىمىزگە قايشى كەلەتىن اقپاراتتاردى باسپاۋ ءۇشىن كەرەك. كوركەم ادەبيەت تۇرعىسىنان تەكسەرىس اۆتورلىق قۇقىقتى بۇزۋدىڭ الدىن الۋ ماقساتىندا ەنگىزىلدى», دەدى ع.بەكتاي ۇلى.
ورتالىق باسشىسىنىڭ بايانداۋىنشا, وقۋلىق اۆتورلارى بۇدان بىلاي وقۋلىقتاردى ازىرلەۋ كۋرستارىنان ءوتىپ, سەرتيفيكات الادى. وقۋلىقتاردى شىعارۋ ىسىمەن تەك وسىنداي سەرتيفيكاتى بار اۆتورلار عانا اينالىسا الادى. بۇل تالاپ پەن كۋرس وقۋلىق ساراپشىلارىنا دا قاتىستى بولىپ وتىر. سونىمەن قاتار اۆتورلار مەن ساراپشىلار قۇرامىندا تەك عالىمدار ەمەس, ادىسكەرلەر مەن بىلىكتى مۇعالىمدەر دە بولۋى ءتيىس. بۇدان بولەك ساراپشىلارعا تەكسەرىستەن وتكىزىلەتىن وقۋلىقتاردىڭ اۆتورى مەن باسپاسى كورسەتىلمەي بەرىلەدى. بۇل ءوز كەزەگىندە اشىقتىق پەن ادىلدىكتىڭ بولۋىن قامتاماسىز ەتەدى. باسپالارعا دا قاتىستى بىرقاتار وزگەرىستەر بار. №91 بۇيرىققا سايكەس, ەندى ۇلكەن قاتەلىكتەر كەتكەن جاعدايدا باسپا وقۋلىقتاردى تولىعىمەن ءوز قارجىسىنا قايتا باسىپ شىعارادى. سونداي-اق باسپالار وزدەرى باساتىن وقۋلىقتارعا باسپاىشىلىك ساراپتاما جۇرگىزۋگە مىندەتتى.
