مۇعالىمدەر اراسىنداعى قالالىق دەڭگەيدە وتكەن كىشىگىرىم ءبىر جارىستا جۇلدە العان ۇستازدىڭ: «ماعان ارادا بىرنەشە اي وتكەسىن ويلاماعان جەردەن اقتاۋ قالاسىنىڭ مەرەيتويلىق مەدالىن تاپسىردى, بەكەر-اق العان ەكەنمىن, قالاي الدىم, سولاي داۋ, ءارتۇرلى اڭگىمە, كورەالماۋشىلىق, تانىس ارقىلى الدى دەپ كۇستانالاۋ كوبەيدى. بىراق مەن وسى جارىس ءۇشىن بىلدەي قالانىڭ مەدالىن بەرەدى دەپ ويلاماپپىن جانە قاجەتى دە جوق ەدى», دەپ كۇيىنگەنى بار. بىردە ماعان وبلىستىق اكىمدىكتىڭ بىلدەي قىزمەتكەرى ادەمى قوراپتاعى سولكەبايدى قولىما ماساتتانا ۇستاتقانى ەسىمدە. كۋالىگىن سۇراعانىمدا, «مەدالدا كۋالىك بولا ما؟ بىلمەيدى ەكەنمىن, قازىر سۇراستىرايىن», دەپ تەلەفونعا جارماستى. كوشەدەن تاۋىپ الماعاندىعىن, نە كورشىنىڭ توسبەلگىسىن سۇراپ تاعىپ الماعاندىعىن دالەلدەيتىن ءاربىر مەدالدىڭ ارنايى كۋالىگىنىڭ بولۋ-بولماۋىن كەڭسەدە وتىرعان مەملەكەتتىك قىزمەتكەردىڭ بىلمەۋى – مەدالدىڭ قادىرىنىڭ كەتكەنى مە, الدە مەملەكەتتىك قىزمەتكەردىڭ ورەسىنىڭ ولشەمى مە؟
مەدال بەرۋدە, مەيلى ول مەرەكەلىك بولسىن, جاسىنا, ەڭبەك وتىلىنە, وڭىردەگى ەڭبەك ەتكەن جىلدارىنا قاتىستى بەلگىلى ءبىر تالاپتار بولمايتىنى قىزىق. كەڭەستىك كەزەڭدە كۇن ۇزاعىنا ءۇي شارۋاسى, بالا قامىمەن قاباتتاستىرىپ قي اۋدارىپ, سۋ تاسىپ, قوي جايىپ, بوتا ارقانداپ, تۇيە ساۋىپ, قوي قىرقىپ, تۇيە كۇزەپ, جۇكتەرىن بۋىپ-ءتۇيىپ جىلىنا 4-5 رەت كوشىپ-قونىپ, مال شارۋاشىلىعىنا ەسەپسىز ەڭبەك ەتىپ, ءتۇنى بويى كىرپىگىن بىردە ءىلىپ, بىردە ىلمەي قوي كۇزەتكەن اكە-انالارىمىزدىڭ بۇگىندە كوزى ءتىرىسى از. سول كىسىلەردەن مەدال تۇگىلى ءبىر قاتىرما قاعاز كورمەيمىز, بۇگىنگى اركىمگە ۇلەستىرىلىپ جاتقان سان-ساپات مەدال مەن العىس حاتتاردان دا ادا. ول ءۇشىن بۇلدانىپ جاتقان ولار دا جوق, تىلەگى – ەلدىڭ, جەردىڭ, ۇرپاقتىڭ اماندىعى! ولاردىڭ نەمەرەلەرىمەن قاتار جانداردىڭ الدى مەملەكەتتىك, سوڭى بىرنەشە مەرەكەلىك مەدالدى جارقىراتا تاعىپ جاتقانىنا ۇيالاسىڭ...
مىسالى, ءبىر ايتۋلى ءساتتىڭ 25-30 جىلدىق مەرەيتويى دەلىك, ونىڭ يەگەرى سول داتادان ءسال ۇلكەن. قانداي تەرى توگىلىپ, قانداي ەڭبەك سىڭىرگەنى بەلگىسىز... وتكەن جىلى ماڭعىستاۋدا ءبىر اۋداننىڭ 40 جىلدىق مەرەيتويى تويلاندى. كەزىندە اۋداننىڭ اۋدان بولۋىنا ۇلەس قوسقان, كەڭشاردىڭ بۇكىل اۋىرتپالىعىن ارقالاعان ۇلكەندەر جاعى ەلەۋسىز قالىپ, اكىمدىكتە جۇرگەن وندىردەي ۇل مەن قىز توستەرى جارقىراپ شىعا كەلدى. دۇرىس پا, جوق!
جۋىردا ماڭعىستاۋدا مەرەكەلىك مەدالعا قاتىستى داۋ تاعى بۇرق ەتە قالدى. بۇل جولى مۇعالىم, دارىگەر نەمەسە قاراپايىم حالىق اراسىنان ەمەس, بىلدەي ماڭعىستاۋ وبلىسى اكىمى اپپاراتىنان. قازاقستان رەسپۋبليكاسىنىڭ كونستيتۋتسياسىنا 25 جىل تولۋىنا وراي دايىندالعان توسبەلگى اكىم اپپاراتىنداعى 9 ءبولىمنىڭ باسشىلارىنا عانا تيەسىلى بولادى. مەملەكەتتىك قىزمەتتەگى ءوتىلى كوپ بولعانىمەن باسشىلىققا قولى جەتپەگەندەر بار, قاتارداعى مامان بولعانىمەن, باسشىدان بەتەر بىلەك سىبانا ەڭبەك ەتەتىندەر بار, ايتەۋىر «داۋدىڭ باسى دايرابايدىڭ كوك سيىرى» ەمەس, كونستيتۋتسيانىڭ كورىكتى مەدالى بولادى دا شىعادى. تۋىنداعان داۋعا قاراپ «اكىم اپپاراتى باسشىلىعى مەرەكەلىك مەدالداردى بەلگىلى ءبىر تالاپتارعا سۇيەنبەي تەك باسشىلارعا وڭدى-سولدى تاراتا سالعان با؟» دەگەن سۇراق تۋىندايدى. ەكىنشىدەن, وزگەلەرگە ۇلگى بولىپ, مەملەكەتتىك قىزمەتكەر دەگەن اتىنا ساي مەملەكەتتىك رامىزدەردى, قۇندىلىقتار مەن بەلگىلەردى قۇرمەتتەۋگە ءتيىس اپپارات قىزمەتكەرلەرىنىڭ مەدال ءۇشىن الاۋىز بولۋى ۇيات-اق. كىنا – باسشىلىقتا, اقىرى مەدالدى بەرگەن ەكەن, بەلگىلى تالاپتار ساقتالۋى ءتيىس, ايتپەسە جۇمىس ىستەيتىن, تەك مەرەكە سايىن مەدال الىپ, ومىراۋى ەكىنشى دۇنيەجۇزىلىك سوعىس ارداگەرلەرىنىڭ ومىراۋىنان دا ارتىق بولىپ سولكەبايعا سىقاي تولعان ءبولىم باسشىلارى عانا ما؟ ولاردىڭ قاراماعىندا قانشا مامان قانشا جىلدان بەرى قالىس قالىپ كەلەدى؟
ەڭبەكتىڭ ەلەنگەنى جاقسى, الايدا ءوزى جاقسى, ءسوزى مەن كوزى جاقسى, سونداي-اق قىزمەتى جاقسىلارعا ۋىستاي ۇلەستىرىلىپ, سوڭى ايقاي-شۋعا اپاراتىن, كەي جاعدايلاردا ءوزىنىڭ شىن يەسىن تاپپاي, كىم كورىنگەننىڭ كەۋدەسىندە مۇڭايىپ تۇراتىن مەرەكەلىك مەدالدارعا جانىم اشيدى...
ال مەملەكەتتىك ماراپاتتار تۋرالى اڭگىمە ءوز الدىنا ۇلكەن تاقىرىپ.
ماڭعىستاۋ وبلىسى
