ەگىنجايداعى استىق ءۇشىن ارپالىس ەرتەرەك باستالعانىمەن, كۇزگى جاۋىن-شاشىن قول بايلاپ تۇر. ازىرگە ءداندى داقىلداردىڭ 3153,7 مىڭ گەكتارى باستىرىلدى. ازىرشە گەكتار بەرەكەسى 10 تسەنتنەردەن اينالۋدا. بيىلعىداي اسا قولايسىز جىلى ءتاپ-ءتاۋىر كورسەتكىش. جاز ەرەسەن ىستىق بولدى. وڭىردەگى كەيبىر اۋدانداردا ماساق بايلانار ساتتە تابيعات قىرىن قاباق تانىتتى. ايتسە دە, ورماندى القاپتارداعى ەگىننىڭ جاي-كۇيى قاناعاتتارلىق. ەندى ۋاقىتپەن ساناسپاي, ۇتىمدى قيمىلداعان ءجون. بۇل ءۇشىن ءاربىر اشىق ءساتتى قاپىسىز, ءتيىمدى پايدالانۋ شارت.
وراق جۇمىستارىنا العاشقى لەكپەن كىرىسكەن ساندىقتاۋ, جارقايىڭ, جاقسى, ەسىل, تسەلينوگراد, ارشالى, ءبىرجان سال, اتباسار, بۋراباي, استراحان اۋداندارى باستاپقى ەكپىندى تومەندەتەر ەمەس. وبلىستىق اۋىل شارۋاشىلىعى باسقارماسىنىڭ دەرەكتەرىنە سۇيەنسەك, اتالعان ءوڭىر ديقاندارى بۇكىل ەگىستىكتىڭ 70 پايىزىنا تاياپ قالدى. جالپى وڭىرلىك كورسەتكىشتىڭ 65 پايىزعا جاقىنداۋى وزگە اۋدانداردىڭ دا قارقىنعا قارقىن قوسا باستاعانىن اڭعارتادى.
قىرمانعا جەتكىزىلگەن استىقتىڭ كولەمى دە 3153,7 مىڭ توننانى قۇراپ, بىلتىرعى سايكەس مەرزىمدەگىدەن 2192,3 مىڭ تونناعا اسىپ ءتۇستى. بۇعان قاراپ مىناداي ەسەپ جاساۋعا بولادى: جۇمىس جوسپارىنا سايكەس, مەحانيزاتورلار كەشەگى كۇنى 245,5 مىڭ گەكتاردىڭ ءونىمىن جينادى. ياعني ناۋقاندى 18 جۇمىس كۇنى ىشىندە تولىق اياقتاۋعا مۇمكىندىك بار دەپ ايتۋعا ابدەن بولادى. بۇلاي توپشىلاۋعا نەگىز دە بار. ناۋقاندىق جۇمىستارعا 8145 استىق كومباينى, ونىڭ ىشىندە 3 مىڭنان استام جوعارى ءونىمدى تەحنيكا جۇمىلدىرىلۋدا. بۇل جاي اگرارشىلاردىڭ ەگىن جيناۋ جۇمىسىنا مۇقيات دايىندالعاندىعىن كورسەتەدى. وسىنداي تالپىنىستىڭ ناتيجەسىندە وراق جۇمىستارىنىڭ كورسەتكىشى 70,9 پايىزعا جەتىپ وتىر.
ديقاندار مەملەكەت تاراپىنان ناۋقاندىق جۇمىستارعا 72,6 ملرد تەڭگە بولىنگەنىنە, مۇنىڭ 37,3 ملرد تەڭگەسى قايتارىمسىز (سۋبسيديا) قارجى ەكەندىگىنە ريزاشىلىق بىلدىرۋدە. وسىنداي قولداۋ ارقىلى اگرووندىرىستىك كەشەندەر مەن شارۋا قوجالىقتارى سوڭعى ءۇش جارىم جىلدا جالپى قۇنى 23,5 ملرد تەڭگەنىڭ 992 كومباينىن, 270 ەگىس كەشەندەرىن ساتىپ الدى.
كۇزگى دالا جۇمىستارىن جۇرگىزۋ ءۇشىن جانار-جاعارماي جەتكىلىكتى كولەمدە تاسىمالدانىپ الىندى. ارنايى ليتسەنزيالانعان 65 كاسىپورىن استىقتى قابىلداۋدا. ولاردىڭ جالپى ساقتاۋ سىيىمدىلىعى – 4,2 ملن توننا. وعان قوسا, جەرگىلىكتى اۋىل شارۋاشىلىعى قۇرىلىمدارىندا شامامەن 2,4 ملن توننالىق استىق قويمالارى بار.
سونداي-اق وبلىس ديقاندارى كەلەسى جىلدىڭ مولشىلىعىن قامداۋ ماقساتىندا قازىردىڭ وزىندە 279,1 مىڭ توننا تۇقىم قورىن, ياعني, مەجەلەنگەن كولەمنىڭ 52,7 پايىزىن قامباعا قۇيىپ ۇلگەردى. بارلىق ايماقتا كۇزگى جەر باپتاۋ جۇمىستارى جۇرگىزىلىپ جاتىر.
اقمولا وبلىسى
