باعدارلاما بىرنەشە باعىت بويىنشا ىسكە اسىرىلادى: قىسقا مەرزىمدى وقىتۋ كۋرستارىن وتكىزۋ; گرانتتار مەن ميكروكرەديتتەر ءبولۋ ارقىلى جاپپاي كاسىپكەرلىكتى دامىتۋ; مەملەكەت سۋبسيديالايتىن جۇمىس ورىندارىنا جۇمىسقا ورنالاستىرۋ; جۇمىس كۇشى مول وڭىرلەردەن جۇمىس كۇشى تاپشى وڭىرلەرگە ازاماتتاردى كوشىرۋ ارقىلى ەڭبەك رەسۋرستارىنىڭ ۇتقىرلىعىن ارتتىرۋ, ولارعا مەملەكەتتىك قولداۋ كورسەتۋ.
الماتى قالاسى حالىقتى جۇمىسپەن قامتۋ ورتالىعىنىڭ اقپاراتىندا باعدارلامانى ىسكە اسىرۋ شەڭبەرىندە ەلىمىزدىڭ ءىرى قالاسىندا ۋاقىتشا جۇمىس ورىندارىنا 15 560 ادام, ونىڭ ىشىندە 1116 ادام – الەۋمەتتىك جۇمىس ورىندارىنا, 992 ادام – جاستار پراكتيكاسىنا جانە 13 452 ادام – قوعامدىق جۇمىستارعا جىبەرىلگەن. تۇراقتى جۇمىس ورىندارىنا 15 015 ادام جۇمىسقا ورنالاستىرىلدى.
بيزنەس-يدەيالاردى ىسكە اسىرۋعا 200 اەك-كە دەيىنگى مولشەردە 1 306 مەملەكەتتىك گرانت جانە 43 ميكروكرەديت ءبولىندى. قىسقا مەرزىمدى كۋرستارعا 876 ادام جىبەرىلدى, ولار وقۋدى اياقتاعاننان كەيىن ءتيىستى جۇمىس ورىندارىنا ورنالاستىرىلدى. وسىلايشا, ماماندىعى بويىنشا قارجىگەر دۋمان كايۋپوۆ جۇمىس ىزدەۋدە قيىندىق كورگەن سوڭ وقۋدان ءوتىپ, بۋحگالتەر بولدى.
"بۇنداي مۇمكىندىك تۋرالى ماعان دوسىم ايتقان بولاتىن. جۇمىسپەن قامتۋ ورتالىعىنا حابارلاسۋعا بولاتىنىن, وندا قايتا وقۋعا جىبەرەتىنى تۋرالى ايتتى. مەن بۋحگالتەريا كۋرسىنان ءوتۋدى شەشتىم. ءوزىمدى جاقسى جاعىنان كورسەتىپ, كۋرستى ۇزدىك ءبىتىردىم. مەنى جۇمىسقا الدى, وسى ۇيىمدا ءالى كۇنگە دەيىن جۇمىس ىستەيمىن. وزىمە مۇندا ۇنايدى, جالاقىسى دا جاقسى", دەپ ءوز جەتىستىكتەرىمەن ءبولىستى دۋمان كايۋپوۆ.
قىسقا مەرزىمدى ءبىلىم بەرۋدىڭ ۇلكەن ارتىقشىلىعى – تالاپ ەتىلەتىن ماماندارعا جۇمىس بەرۋشىلەردىڭ وزدەرى ءوتىنىش بەرەدى.
"ازاماتتاردىڭ قاي جۇمىسقا ورنالاساتىنىن تاڭداۋى – بۇل جاقسى قۇبىلىس. بىرەۋ ماماندىق بويىنشا جۇمىس تابا الادى, ال بىرەۋ قايتا وقىپ, جاڭا بىلىكتىلىك بويىنشا كەپىلدىك بەرىلەتىن جۇمىسقا ورنالاسا الادى. الەۋمەتتىك جۇمىس ورىندارى, قوعامدىق جۇمىستار جانە جاستار پراكتيكاسى سياقتى وزگە دە بەلسەندى شارالار بار", دەپ اتاپ ءوتتى الماتى قالاسى اكىمدىگىنىڭ حالىقتى جۇمىسپەن قامتۋ ورتالىعى ديرەكتورىنىڭ ورىنباسارى نۇرجان اۋتاليف.
بۇعان دەيىن حابارلانعانداي, "ەڭبەك" مەملەكەتتىك باعدارلاماسىنا 379 مىڭ ادام قاتىسىپ, ءتۇرلى قولداۋ الدى. جۇمىسپەن قامتۋ ورتالىقتارىنىڭ جولدامالارى بويىنشا بوس جۇمىس ورىندارىنا 130 مىڭ ادام, مەملەكەت سۋبسيديالاعان جۇمىس ورىندارىنا 156 مىڭ ادام جۇمىسقا ورنالاستىرىلدى, 5 800 جەڭىلدىكتى كرەديت جانە 17 200 قايتارىمسىز گرانت بەرىلدى, 34,5 مىڭ ازامات كاسىپكەرلىك نەگىزدەرىنە قىسقا مەرزىمدى وقىتۋدان وتۋدە.
