ء"امىر جانە د" جشس بازاسىندا وتكەن كەزدەسۋگە قاتىسۋشىلار وڭىردەگى فارماتسەۆتيكا سالاسىن دامىتۋعا قاتىستى ويلارىن ورتاعا سالدى.
جامبىل وبلىسىنىڭ اكىمى بەردىبەك ساپارباەۆ ءوز سوزىندە فارماتسەۆتيكا ونەركاسىبى ستراتەگيالىق ماڭىزى بار باعىتتاردىڭ ءبىرى بولىپ قالا بەرەتىندىگىن اتاپ ءوتتى.
"پرەزيدەنت قاسىم-جومارت توقاەۆ "جاڭا جاعدايداعى قازاقستان: ءىس-قيمىل كەزەڭى" اتتى جولداۋىندا فارماتسەۆتيكا سالاسىن اياققا تۇرعىزاتىن ۋاقىت جەتكەنىن باسا ايتتى. بەس جەرگىلىكتى كومپانيا ءدارى-دارمەك وندىرۋمەن اينالىسادى. مەملەكەتتىك قولداۋدى پايدالانا وتىرىپ, فارماتسەۆتيكا نارىعىنداعى جامبىلدىق پرەپاراتتار ۇلەسىن ارتتىرۋعا جاعداي جاساۋ قاجەت", دەدى ايماق باسشىسى.
بۇگىنگى تاڭدا فارمبيزنەس ماماندار مەن يننوۆاتسيالىق جوبالاردىڭ تاپشىلىعى سالدارىنان بەلگىلى ءبىر قيىندىقتاردى باستان وتكەرۋدە. تارازدا س. اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنىڭ فيليالىنىڭ اشىلۋى وسى ماسەلەلەردى شەشۋگە كومەكتەسپەك. ۋنيۆەرسيتەت رەكتورى تالعات نۇرعوجيننىڭ ايتۋىنشا, ۋنيۆەرسيتەت العاشقىلاردىڭ ءبىرى بولىپ فارماتسيا مەكتەبىن اشقان.
"مەكتەپ – ۋنيۆەرسيتەتتىڭ اجىراماس بولىكتەرىنىڭ ءبىرى. ونىڭ نەگىزىندە جاسالعان عىلىمي جوبالار فارماتسەۆتيكا سالاسىن جاڭعىرتۋ جانە دامىتۋ ءۇشىن بەلسەندى قولدانىلادى. ءبىز جەرگىلىكتى فارماتسەۆتيكالىق كومپانيالارمەن ىنتىماقتاستىق ورناتۋعا جانە عىلىمي ازىرلەمەلەر بويىنشا بىرلەسىپ جۇمىس ىستەۋگە دايىنبىز", دەدى تالعات نۇرعوجين.
سونداي-اق وبلىس اكىمى الەمنىڭ ۇزدىك تاجىريبەلەرىنە سۇيەنۋدىڭ تيىمدىلىگىن العا تارتتى. وعان تەك وتاندىق قانا ەمەس, شەتەلدىك عالىمدار دا تارتىلماق. كەزدەسۋگە بەينەبايلانىس ارقىلى لۋند ۋنيۆەرسيتەتىنىڭ پروفەسسورى كەننەت پەرسون (شۆەتسيا) قاتىستى.
ول شۆەتسيانىڭ فارماتسەۆتيكا نارىعىنداعى زاماناۋي ترەندتەر, جەرگىلىكتى وندىرۋشىلەردىڭ ءرولى تۋرالى ايتىپ بەردى. شۆەتسيادا ءىرى كومپانيالار عىلىمي ينستيتۋتتارمەن قاتار جۇمىس ىستەيدى. ولاردىڭ تاجىريبەسى جاڭا كومپانيالارعا بەرىلەدى. بۇل بايلانىستى ورناتۋعا جانە قولداۋعا قۇرامىنا بيزنەس-ترەنەرلەر كىرەتىن ارنايى توپ كومەكتەسەدى. وسىلايشا, ەۋروپا ەلىندە فارماتسەۆتيكالىق كومپانيالاردى كەز-كەلگەن قاۋىپ-قاتەردەن قورعاۋعا كومەكتەسەتىن جۇيە قالىپتاسقان.
كاسىپكەرلىك جانە يندۋستريالىق-يننوۆاتسيالىق دامۋ باسقارماسىنىڭ باسشىسى اسپانديار سەيسەباەۆ بۇل سالانى دامىتۋ ءۇشىن وبلىستىڭ الەۋەتى زور ەكەندىگىن سەنىممەن ايتتى. قازىرگى تاڭدا قورداي اۋدانىندا ءبىلىم جانە عىلىم مينيسترلىگى عىلىم كوميتەتى بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتىنىڭ جانىنان ۆاكتسينا وندىرەتىن بيوفارماتسەۆتيكالىق زاۋىت سالىنۋدا. جوبالىق قۋاتى بيوفارماتسەۆتيكالىق پرەپاراتتاردىڭ 60 ميلليون دوزاسىن وندىرۋگە قاۋقارلى زاۋىتتا 65 جاڭا جۇمىس ورنى قۇرىلماق.
وسى سالاداعى ءىرى كومپانيالاردىڭ ءبىرى ء"امىر جانە د" جشس دە ءىرى جوبانى قولعا الۋدا. كومپانيا ديرەكتورى قارلىعاش قايمولداەۆا ساقتاۋ قويمالارى بار فارماتسەۆتيكالىق ءوندىرىس كەشەنىنىڭ قۇرىلىسى تۋرالى ايتىپ بەردى. وندا ەكسپرەسس-تەستىلەر مەن مەديتسينالىق بۇيىمدار شىعارىلاتىن بولادى. جوسپار بويىنشا ونىڭ قۇرىلىسى بيىل اياقتالۋى ءتيىس. جوبانىڭ جىلدىق قۋاتى – 15 ميلليون ەكسپرەسس-تەست, 1,5 ميلليون باقىلاۋ ەرىتىندىسى جانە 50 مىڭعا جۋىق زارارسىزداندىرۋعا ارنالعان وراما.
جاڭا ءوندىرىس كەشەنىندە 200-دەن استام جۇمىس ورنى اشىلادى دەپ كۇتىلۋدە.
"SuperPharm" جشس دە ءوندىرىسىن كەڭەيتۋدى جوسپارلاپ وتىر. سەرىكتەستىك ديرەكتورى قايرات قايمولداەۆتىڭ ايتۋىنشا, شىعارىلاتىن ءونىم تۇرلەرىنىڭ سانى ارتپاق.
كەزدەسۋ بارىسىندا قارلىعاش قايمولداەۆا فارماتسەۆتيكا نارىعىنداعى جاعدايدى جاقسارتۋ بويىنشا ۇسىنىستارىن ورتاعا سالدى. بەردىبەك ساپارباەۆ اتالعان ماسەلەلەردىڭ بارلىعى رەسپۋبليكالىق دەڭگەيدە كوتەرىلەتىنىنە سەندىردى.
"بۇگىن ءبىز فارماتسەۆتيكا ونەركاسىبىن دامىتۋ ءۇشىن بارلىق العىشارتتاردىڭ بار ەكەنىنە كوز جەتكىزدىك. وسى ورايدا "قاراپايىم زاتتار ەكونوميكاسى", "بيزنەستىڭ جول كارتاسى – 2025" باعدارلامالارىن پايدالانۋ كەرەك. دەگەنمەن, بۇل تۇرعىداعى وزەكتى ماسەلەلەردىڭ ءبىرى – ەشكىم يننوۆاتسيالىق جوبالاردى ۇسىنبايدى. فارماتسەۆتيكالىق كلاستەردىڭ دامۋى جاڭا تەحنولوگيالاردى قولدانۋ مەن بىلىكتى كادرلاردى تاربيەلەۋدى كوزدەيدى. شەتەلدىك ارىپتەستەرمەن تاجىريبە الماسا وتىرىپ, تەلەمەديتسينانى دامىتۋعا دەن قويىڭىزدار", دەپ ءسوزىن تۇيىندەدى بەردىبەك ساپارباەۆ.
كەزدەسۋ قورىتىندىسى بويىنشا وبلىس اكىمى جامبىل وبلىسىندا فارماتسەۆتيكا ونەركاسىبىن دامىتۋ باعدارلاماسىن ازىرلەۋدى تاپسىردى.
