وسىعان وراي سالالىق باسقارما وڭىردەگى احۋالدى نازاردا ۇستاپ وتىر. ويتكەنى باسقارما باسشىسى نۇرلىبەك قابدىقاپاروۆتىڭ ايتۋىنشا, وسى كەزگە دەيىن اۋىرعان ناۋقاستاردى وڭالتۋ شارالارىن جۇرگىزۋدىڭ ماڭىزى زور. سول سەبەپتەن, جۇمىس ىستەي باستاعان وڭالتۋ ورتالىقتارىندا ناۋقاستارعا فيزيوتەراپيا, ماسساج, تىنىس الۋ گيمناستيكاسى سەكىلدى ەم شارالارى جۇرگىزىلۋدە.
– وڭالتۋ ورتالىعى – اتىراۋ وبلىسى اكىمدىگىنىڭ قولداۋىمەن جۇزەگە اسىپ جاتقان جوبا. وندا قالا اۋماعىمەن قوسا اۋدان جۇرتشىلىعىنا دا قىزمەت كورسەتىلەدى. دەنەشىنىقتىرۋ-سپورت زالدارىنا ەم-دومعا قاجەتتى جابدىقتار اكەلىندى. جوبا ماقساتى – كوروناۆيرۋس ينفەكتسياسى مەن پنەۆمونيا اۋرۋىنا شالدىققان ناۋقاستاردى وڭالتۋ. بۇگىندە اتىراۋدا 5 مىڭعا جۋىق ناۋقاس وڭالتۋ ەمدەۋ شاراسىن قاجەت ەتەدى. بۇل مالىمەت العا قاراي وزگەرىپ تۇرادى. تۇرعىندار جەرگىلىكتى ەمحانا دارىگەرلەرىنىڭ جولداماسى ارقىلى ورتالىقتىڭ قىزمەتىنە اقىسىز نەگىزدە جۇگىنە الادى. وڭالتۋ ورتالىعىندا رەابيليتولوگ, پسيحولوگ ماماندارىمەن قوسا مەدبيكەلەر, كاسىبي سپورتتىق جاتتىقتىرۋشىلار قىزمەت كورسەتەدى, – دەيدى وبلىستىق دەنساۋلىق ساقتاۋ باسقارماسىنىڭ باسشىسى.
ورتالىققا كەلۋدىڭ وزىندىك ءتارتىبى بار. ماسەلەن, №3 اتىراۋ قالالىق ەمحاناسىنىڭ باس دارىگەرى ايمان وتەگەنوۆا ناۋقاس سىرقاتىنىڭ كۇردەلىلىگىنە قاراي جاتتىعۋلاردىڭ مامان كەڭەسىمەن تاعايىندالاتىنىن ايتادى. سەبەبى ينفەكتسيالىق اۋرۋلاردان كەيىن اعزا قالپىنا كەلۋى ءۇشىن ءبىراز ۋاقىت كەرەك. سونىڭ ىشىندە كوروناۆيرۋس ينفەكتسياسىن جۇقتىرعان سوزىلمالى اۋرۋى بار ناۋقاستاردىڭ ەم-دومى وزىندىك تارتىپپەن جۇرگىزىلەدى. ويتكەنى كەيبىر جاتتىعۋلاردىڭ ناۋقاس اعزاسىنا كەرى اسەرى ەسكەرىلەدى.
– ستاتسيونارلىق ەمدەلۋ اياقتالعاننان كەيىن ساۋىققان ادامدار ورتالىقتا وڭالتۋ شاراسىنان ءوتۋى قاجەت. بىرىنشىدەن, ينفەكتسيادان قابىنعان وكپەنى ءدارى-دارمەكسىز قالپىنا كەلتىرۋ ءۇشىن تىنىس الۋ جاتتىعۋلارى وتەدى. جاتتىعۋلار سالقىن تۇسكەنگە دەيىن اشىق الاڭقايلاردا جاسالادى. كەيىننەن سپورت زالدارىنىڭ ىشىندە جۇرگىزىلەدى. ەكىنشىدەن, اعزا وڭالۋى ءۇشىن كەم دەگەندە 7-14 كۇندىك كەشەندى ەم الۋى كەرەك, – دەيدى №3 اتىراۋ قالالىق ەمحاناسىنىڭ باس دارىگەرى.
قازىر اتىراۋ قالاسىندا 6 دەنە شىنىقتىرۋ جانە سپورت زالدارىنىڭ ارقايسىسىندا جەكە سپورت نۇسقاۋشىسى بار. ولار دارىگەرلەرمەن كەلىسىلگەن جاتتىعۋلاردى جۇرگىزەدى.
– ءبىر توپتا 15 ادامعا دەيىن جاتتىعادى. وڭالتۋ جاتتىعۋىنىڭ ۋاقىتى – 15-20 مينۋت. سپورت زالدارىنا ىڭعايلى سپورتتىق كيىمدەرىمەن كەلەدى, – دەيدى قالالىق بۇقارالىق سپورتتى دامىتۋ كلۋبىنىڭ ديرەكتورى الماس يماشەۆ.
سونداي-اق قاۋىپتى ىندەتكە شالدىققانداردى ەمدەگەن مەديتسينا قىزمەتكەرلەرىنە ۇستەمەماقى تولەۋ جۇرگىزىلىپ جاتىر. وبلىستىق دەنساۋلىق ساقتاۋ باسقارماسىنىڭ باسشىسى ن.قابدىقاپاروۆتىڭ مالىمەتىنشە, مەديتسينا قىزمەتكەرلەرىنە ۇستەمەاقى ءارتۇرلى كولەمدە ەسەپتەلگەن.
– مەملەكەت باسشىسىنىڭ تاپسىرماسىنا وراي بەرىلىپ جاتقان بۇل قارجىلاي ىنتالاندىرۋ كومەگى مەديتسينا سالاسىنىڭ ماماندارىنا ۇلكەن قولداۋ بولدى. دەنساۋلىق ساقتاۋ مينيسترلىگىنىڭ بۇيرىعىنا سايكەس, تەك وتكەن ايدا 2082 مەديتسينا قىزمەتكەرىنە 800 ملن تەڭگەدەن استام سوماعا ۇستەمەاقى تولەندى. سونىڭ ىشىندە دارىگەرلەرگە 850 مىڭ تەڭگە, ورتا بۋىن مەديتسينا قىزمەتكەرلەرىنە 450 مىڭ تەڭگە, كىشى بۋىن سالا ماماندارىنا 250 مىڭ تەڭگەدەن ناۋرىز ايىنان باستاپ اي سايىن ۇستەمەاقىنى تولەۋ جۇزەگە اسىرىلدى, – دەدى ن.قابدىقاپاروۆ.
قاۋىپتى ىندەت ىندەگەن تۇستا ءتورت اي ۇيىنە بارماعان مەيىربيكەنىڭ ءبىرى – اققانىم سادىعۇلوۆا №2 وبلىستىق ينفەكتسيالىق اۋرۋحانانىڭ جانساقتاۋ بولىمىندە جۇمىس ىستەيدى. ءوزى دە كوروناۆيرۋس ينفەكتسياسىن جۇقتىرىپ, قاۋىپتى ءساتتى باستان كەشتى.
– شىنىمدى ايتسام, باستاپقىدا قاتتى ۋايىمدادىم. وزىمە دە, وتباسىما دا قيىن بولدى. بىراق بۇل – ءوزىم تاڭداعان ماماندىعىم. سوندىقتان بارىنە دايىن بولۋ قاجەتتىگىن ءتۇسىندىم. ونىڭ ۇستىنە ەل الدىمەن مەديتسينا ماماندارىنا ءۇمىت ارتىپ وتىر. كورەر جارىعىم بار ەكەن. اۋرۋحاناداعى ارىپتەستەرىمنىڭ كومەگىمەن ىندەتتەن ەمدەلىپ شىقتىم. كەيىن ءوزىم وقشاۋلانىپ, كارانتيندە بولدىم, – دەپ قينالعان ءساتىن ەسكە الدى ول. قاۋىپتى ىندەتتەن تولىق ايىققاننان كەيىن تامىزدا جۇمىسقا قايتا قوسىلدى. جاقىندا وعان 2 ملن تەڭگە كولەمىندە وتەماقى تولەندى.
– بۇعان قوسا جالاقىمىزعا اي سايىن 850 مىڭ تەڭگە ۇستەمەاقى تولەنىپ وتىر. ماسەلە قارجىعا تىرەلىپ تۇرعان جوق. مەديتسينا ماماندارىنىڭ ءوز ىسىنە ادالدىعىنىڭ ناتيجەسىندە كوروناۆيرۋس ينفەكتسياسىن جۇقتىرعاندار ەمدەلىپ شىقتى. دەگەنمەن ءار تۇرعىن جاقىنىنا جاناشىر بولىپ, شەكتەۋ شارالارىن قاتاڭ ساقتاسا عانا بۇل ىندەتتى بىرگە جەڭەمىز, – دەيدى مەيىربيكە ا.سادىعۇلوۆا.
اتىراۋ وبلىسى
