باتىر كيىكبايدىڭ ەسىمى ەلىمىزدى بىلاي قويعاندا, قىتاي, موڭعوليا جەرىن جايلاعان قانداستارىمىز اراسىندا جاقسى ءمالىم. باتىر شامامەن ءحۇىى عاسىردىڭ سوڭىندا قاعبا وڭىرىندە دۇنيەگە كەلىپ, 1740 جىلدارى ارقا جەرىندە ومىردەن وتكەن. ەل جادىندا قالعان ەستەلىكتە ارقالىقتىڭ العاداي, اقوزەن اتالاتىن ولكەلەرىندە عۇمىر كەشسە كەرەك. زامانىندا ءۇش جۇزگە "كيىكباي شەشەن" دەگەن اتپەن بەلگىلى بولعان ول جاسىنان بيلىككە ارالاسىپ, قازىلىق قۇرىپتى, جەسىر داۋى مەن جەر داۋىنا ءادىل تورەلىك ەتىپتى. ءتىلى دە قىلىشتاي وتكىر بولسا كەرەك. ايبىنى اسىپ تۇرعان باتىردىڭ تاۋىپ ايتقان سوزىنە, تاباندى كەسىمىنە جالپاق جۇرت باس يگەن. ادىلدىكتەن تابان اۋدارماعان, كوپ كوڭىلىندەگى كۇپتى جايدى جالعىز اۋىز سوزىمەن تاراتاتىن كيىكباي بي ايتىپتى دەيتۇعىن شەشەندىك سوزدەر ەل جادىنان وشكەن جوق.
باتىردىڭ ارتىندا ءتورت ۇلى قالىپتى. ۇرپاعى قازىر اتباسار, سەمەي, الماتى وڭىرلەرىن جايلايدى. كەسەنەنىڭ اشىلۋىنا جامان تۇماۋعا بايلانىستى حالىق كوپ جينالا الماعانىمەن, سوناۋ تۇركيادان وڭباي اتتى بالالاسىنىڭ ۇرپاعى زەينىش اتا ريزاشىلىق حاتىن جولداپتى. قىتايداعى ۇرپاقتارىنان دا جۇرەكجاردى العىستارى جەتكەن. اشىلۋ ءراسىمى بارىسىندا اۋدان اكىمى ا.قالجانوۆ باستاعان ۇلت جاناشىرلارى ءسوز سويلەپ, ءباھادۇر بابالاردان قالعان بەلگىلەرگە قامقورلىق جاساۋ كەيىنگىنىڭ پارىزى ەكەندىگى ەگجەي-تەگجەيلى ايتىلدى. باتىردىڭ كوبەگەن ەسىمدى ءۇشىنشى ۇلىنان تارايتىن التىنشى ۇرپاعى حازى باكەي ۇلىنىڭ ايتۋىنا قاراعاندا, ۇرپاقتارى 5 ميلليون 250 مىڭ تەڭگە كولەمىندە قارجى جيناپ, كەسەنەنىڭ قاجەتىنە جۇمساعان.
وبلىستىق تاريحي-مادەني مۇرانى قورعاۋ جانە پايدالانۋ ورتالىعىنىڭ باسشىسى سەرىك ىسقاقوۆتىڭ ايتۋىنا قاراعاندا, ەل مەن جەرىن قادىرلەي بىلەتىن جالپاق جۇرت ىستەرگە ۇيىتقى بولىپ, وسىنداي يماندى شارۋالار الداعى ۋاقىتتا دا اتقارىلا بەرەدى.
