ء«بىز الەۋمەتتىك مەديتسينالىق ساقتاندىرۋ قورىنا كەلىپ تۇسكەن وتىنىشتەرگە تالداۋ جاسادىق جانە ازاماتتاردىڭ ساقتاندىرىلعان مارتەبەسىنىڭ بولماۋىنىڭ نەگىزگى سەبەپتەرىن انىقتادىق. قازاقستاندىقتاردىڭ ءبىر بولىگى قاتاڭ كارانتين مەن توتەنشە جاعداي كەزىندە ءمامس جۇيەسىنە جارنا تولەۋ مۇمكىندىگىنەن ايىرىلدى. ولاردىڭ مەديتسينالىق كومەككە قول جەتكىزۋىنە قولداۋ قاجەت بولدى. قور دەنساۋلىق ساقتاۋ مينيسترلىگى مەن ۇكىمەت قولداعان وسىنداي ۇسىنىستاردى ازىرلەدى», دەدى الەۋمەتتىك مەديتسينالىق ساقتاندىرۋ قورىنىڭ باسقارما توراعاسى بولات توكەجانوۆ.
تالداۋ كورسەتكەندەي, «ساقتاندىرىلعان» مارتەبەسى بولماۋىنىڭ نەگىزگى سەبەبى 42,5 مىڭ تەڭگە مولشەرىندە بىرجولعى الەۋمەتتىك تولەم الۋ ءۇشىن جەڭىلدىكتى ساناتتاعى وكىلدەرمەن بجت تولەنۋى بولدى. وسىعان بايلانىستى اقپاراتتىق جۇيەلەر ولاردى اۆتوماتتى تۇردە بجت تولەۋشىلەر ساناتىنا اۋىستىردى. تيىسىنشە ولار Saqtandyry بازاسىندا جەڭىلدەتىلگەن ساناتتاردان «شىعارىلدى». سونداي-اق توتەنشە جاعداي كەزىندە تولەمدەرىندە ۇزىلىستەر تۋىنداعان جالدامالى قىزمەتكەرلەر, جەكە كاسىپكەرلەر, جەكە پراكتيكامەن اينالىساتىن تۇلعالار ءمامس جۇيەسىنەن تىس قالدى.
وسىعان بايلانىستى, ۇكىمەت كەلەسى شارالاردى قولدادى:
- جالدامالى قىزمەتكەرلەر سوڭعى 3 ايدا كەمىندە 1 تولەم بولعان كەزدە جانە ەگەر تولەمدەر بويىنشا بەرەشەك جىل باسىنان بەرى 2 ايدان اسپاسا, ءمامس جۇيەسىندە قالپىنا كەلتىرىلەدى;
- جەكە كاسىپكەرلەر, جەكە پراكتيكامەن اينالىساتىن ادامدار, سونداي-اق سوڭعى 3 ايدا تولەم بولعان جاعدايدا, جىل باسىنان باستاپ 2 ايدان اسپايتىن بەرەشەگى بارلار (مەملەكەتتىك كىرىستەر كوميتەتىنىڭ رەسمي اقپاراتىنا سايكەس, ولار قىزمەتىن توقتاتقان جاعدايدا) ساقتاندىرىلعان ادامداردىڭ مارتەبەسىن الادى;
- تج كەزەڭىندە جەڭىلدىك ساناتىمەن بجت تولەگەندەردىڭ تولەمى ەسەپكە الىنبايدى جانە ساقتاندىرۋ مارتەبەسى اۆتوماتتى تۇردە قايتارىلادى;
- COVID-19-عا قارسى كۇرەس شەڭبەرىندەگى شەكتەۋ ءىس-شارالارىنا بايلانىستى قىزمەتكەرلەردىڭ ءماجبۇرلى دەمالىستاردا كۇتىمسىز بولعان كەزەڭدەرى بەرەشەك رەتىندە ەسەپكە الىنبايدى. بۇل رەتتە تابىستى جوعالتۋدىڭ دالەلى تابىستىڭ جوعالۋىنا بايلانىستى بىرجولعى الەۋمەتتىك تولەم الۋ بولىپ تابىلادى (42500 تەڭگە).
«بۇل شارالار مەديتسينالىق ساقتاندىرۋ جۇيەسىنە 740 مىڭعا جۋىق ادامدى قايتاردى. بۇل ساناتتاردى قوسۋ جۇمىستارى ءالى دە جۇرگىزىلۋدە جانە ۇكىمەت ءىس-شارالارى ارقىلى ساقتاندىرىلعاندار سانى ءالى دە ارتا تۇسەدى. وسىلايشا كوروناۆيرۋستىق پاندەمياعا بايلانىستى تابىسىنان ايىرىلعان نەمەسە بەنەفيتسيارلاردىڭ اراسىنان شىققان ازاماتتار مەديتسينالىق ساقتاندىرۋ جۇيەسىنە قايتارىلادى جانە مەديتسينالىق كومەكتىڭ بارلىق كولەمىن الا الادى», دەدى قور باسشىسى.
مارتەبەنى الۋ ءۇشىن ازاماتتارعا قانداي-دا ءبىر جەرگە بارۋدىڭ قاجەتى جوق. بارلىق دەرەكتەر اقپاراتتىق جۇيەلەردە اۆتوماتتى تۇردە جاڭارتىلادى. سونداي-اق قور ۋاكىلەتتى مينيسترلىكتەرمەن بىرلەسىپ, 2020 جىلدىڭ 1 قازانىنا دەيىن ءمامس جارنالارى مەن اۋدارىمدارىنان بوساتىلعان شوب-تىڭ ساقتاندىرىلعان قىزمەتكەرلەرىنە مارتەبە بەرۋ بويىنشا جۇمىس جۇرگىزۋدە. بۇل 800 مىڭنان استام جۇمىسكەرگە اسەر ەتەدى.
ساقتاندىرۋ مارتەبەسى بويىنشا سۇراقتار تۋىنداعان جاعدايدا, Play Market جانە App Store-دا ورناتۋعا بولاتىن Qoldau 24/7 ءموبيلدى قوسىمشاسى ارقىلى الەۋمەتتىك مەديتسينالىق ساقتاندىرۋ قورىنا جۇگىنۋ قاجەت.
