ازاماتتار جەكە دەرەكتەرىنىڭ زاڭسىز جاريا بولۋ فاكتىلەرىن انىقتاعان جاعدايدا مينيسترلىككە حابارلاسىپ, ارنايى تەكسەرۋ جۇرگىزۋىن سۇراي الادى. ول ءۇشىن moap@mdai.gov.kz ەلەكتروندى پوشتاسىنا حات جولداۋىنا نەمەسە "ەلەكتروندىق ۇكىمەت" پورتالىنداعى ("ەلەكتروندىق وتىنىشتەر" ءبولىمى) ءمينيستردىڭ جەكە بلوگىنا جازۋىنا بولادى.
ءوتىنىش بەرگەن كەزدە اكىمشىلىك قۇقىق بۇزۋشىلىق بەلگىلەرى بويىنشا مالىمەتتەر جەتكىلىكتى بولۋى كەرەك: راستايتىن ماتەريالدار, قۇقىق بۇزۋشىلىق سۋبەكتىسى تۋرالى اقپارات جانە مەرزىمى. ءانونيمدى وتىنىشتەر قارالمايدى.
مينيسترلىك ءوز كەزەگىندە قۇقىق بۇزۋشىعا قاتىستى تەكسەرۋ جۇرگىزەدى. ءار تەكسەرۋ قر باس پروكۋراتۋراسىنىڭ قۇقىقتىق ستاتيستيكا جانە ارنايى ەسەپكە الۋ كوميتەتىندە تىركەۋدەن وتەدى جانە كاسىپكەرلەردىڭ قۇقىقتارىن قورعاۋ ماقساتىندا قر كاسىپكەرلىك كودەكسىنە جانە قر اقبك سايكەس جۇرگىزىلەدى.
فاكت راستالعان جاعدايدا اكىمشىلىك جازا قولدانۋ تۋرالى شەشىم شىعارىلادى.
بۇل رەتتە ۋاكىلەتتى ورگان شاعىن بيزنەسكە 2023 جىلعى 1 قاڭتارعا دەيىن جوسپاردان تىس تەكسەرۋلەرجۇرگىزبەۋ تۋرالى قابىلدانعان موراتوريگە قاراماستان, شاعىن بيزنەس سۋبەكتىلەرىنە تەكسەرۋ جۇرگىزبەي-اق اكىمشىلىك ءىس قوزعاۋعا قۇقىلى. ەڭ باستىسى, قۇقىق بۇزۋشىلىق فاكتىسىن راستايتىن قاجەتتى ماتەريالداردى تولىق ۇسىنۋ.
ەستەرىڭىزگە سالا كەتەيىك, بيىلعى ماۋسىمدا مەملەكەت باسشىسى "تسيفرلىق تەحنولوگيالاردى رەتتەۋ ماسەلەلەرى بويىنشا قازاقستان رەسپۋبليكاسىنىڭ كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ تۋرالى" زاڭعا قول قويعان بولاتىن. بۇل زاڭدا مينيسترلىك دەربەس دەرەكتەردى قورعاۋ سالاسىنداعى ۋاكىلەتتى ورگان دەپ كورسەتىلگەن.
