قىزىلقوعا اۋدانىنداعى جاسقايرات اۋىلىنىڭ 40 جاستاعى تۇرعىنى بىلتىرعى قاڭتاردا ءىز-ءتۇزسىز جوعالىپ كەتىپتى. اتا-اناسىنا ەسكەرتپەي كەتكەن ۇلىن ون ايعا جۋىق كۇتكەن اكەسى سول جىلعى 22 كازاندا قىزىلقوعا اۋداندىق پوليتسيا بولىمىنە جۇگىنىپتى.
«ارىز بويىنشا پوليتسيا قىزمەتكەرلەرى جان-جاقتى ىزدەستىرۋ شارالارىن جۇرگىزدى. اتىراۋ وبلىسىنىڭ اۋماعى مەن ەلىمىزدىڭ بارلىق وبلىسى مەن اۋداندارىنا, قالالارىنا ىزدەۋ تۋرالى اقپارات جىبەرىلىپ, ءىس-شارالار ۇيىمداستىرىلعانمەن ناتيجە بولمادى. بىراق, اۋدان پوليتسەيلەرى ىزدەستىرۋ جۇمىستارىن جالعاستىرا بەردى. وبلىستىق پوليتسيا دەپارتامەنتىنىڭ باستىعى قامزا ۇمبەتقاليەۆ جەدەل كەڭەستەردە ءىز-ءتۇزسىز جوعالعانداردىڭ جۇرگەن جەرىن انىقتاۋ, ولاردى تاۋىپ, اعايىن-تۋىستارىنا تاپسىرۋ بويىنشا اتقارىلعان ءىس-شارالاردى پىسىقتاپ, ىزدەستىرۋ جۇمىستارىنىڭ ورىندالۋىن ءوزىنىڭ باقىلاۋىنا الدى. جوعالعان قىزىلقوعالىق ازاماتتىڭ دەرەگى انىقتالماعانى تۋرالى وزگە وبلىستارداعى پوليتسيا ورگاندارىنان جاۋاپتار كەلدى. اد قىزىلقوعا اۋداندىق پوليتسيا ءبولىمىنىڭ جەدەل ۋاكىلى ىسساپارمەن كورشىلەس اقتوبە وبلىسىنا شىعىپ, سونداعى ارىپتەستەرىمەن اۋدان اۋماقتارىنا, الىس شالعايداعى ەلدى مەكەندەرگە باردى. سونداي ءىسساپار كەزىندە حابارسىز كەتكەن ازاماتتى مۇعالجار اۋدانىنىڭ قايىڭدى ەلدى مەكەنىنىڭ اۋماعىندا دالالىقتا مال باعىپ جۇرگەن جەرىنەن تاپتى» -دەپ حابارلادى دەاپرتامەنتتىڭ ءباسپاسوز قىزمەتى.
بىرەۋدىڭ مالىن باعىپ جۇرگەن ازاماتتىڭ ايتۋىنشا, اقشا تابۋ ماقساتىمەن بىلتىرعى قاڭتاردا اقتوبە قالاسىنا كەلگەن. مۇنداعى تانىسى كومەگىمەن دالالىقتا مال باعۋعا بارعان. ءموبيلدى بايلانىس تەلەفونىن جوعالتىپ, تۋىستارىنىڭ نومىرلەرىن ۇمىتىپ قالعان.
«بيىل جاسى 41-گە تولعان ازامات ۇيىنە ورالماۋ سەبەبىن كوبىرەك اقشا تاپقىسى كەلگەنىمەن بايلانىستىردى. ال ءوزىن ەشكىم باقتاشى بولۋعا كۇشتەپ ۇستاماعانىن ايتتى» -دەدى دەپارتامەنتتىڭ ءباسپاسوز قىزمەتىنەن.
ۇلىنىڭ امان-ەسەن تابىلعانىنا قۋانعان 70 جاستاعى زەينەتكەر قىزىلقوعا اۋدانىنىڭ پوليتسەيلەرىنە العىسىن ءبىلدىردى.
