مەملەكەت باسشىسى توتەنشە جاعدايلار مينيسترلىگىن قايتا قۇرۋدى تاپسىردى. بۇل نە ءۇشىن قاجەت؟ ء«بىز تابيعي جانە تەحنوگەندىك اپاتتار داۋىرىنە اياق باستىق», دەدى پرەزيدەنت.
قازاقستاندا تابيعي جانە تەحنوگەندىك سيپاتتاعى توتەنشە جاعدايلاردىڭ الدىن الۋ جانە ولاردى جويۋ; اپاتتان زارداپ شەككەن حالىقتى ەۆاكۋاتسيالاۋ, وعان شۇعىل مەديتسينالىق جانە پسيحولوگيالىق كومەك كورسەتۋ, ءورت سەكىلدى ءتىلسىز جاۋمەن كۇرەسۋ, ادامداردى قۇتقارۋ سەكىلدى قيىندىعى عالامات, ماسەلەسى سان-سالالى سەكتورعا جاۋاپتى مەملەكەتتىك ورگان بۇگىندە ءىىم-دە بوساعادان سىعالاعان جەتىمنىڭ كۇيىن كەشىپ جۇرگەنى جاسىرىن ەمەس. مۇندا سالالىق مينيسترلىك بۇرىن بولعان, الايدا ول 2014 جىلعى تامىزدا ىشكى ىستەر مينيسترلىگى قۇرامىنا توتەنشە جاعدايلار كوميتەتى بولىپ كىردى. ىشكى ىستەر ورگانىنىڭ باستى ماقساتى قىلمىسكەرلەرمەن كۇرەس ەكەنى ءمالىم. دەمەك, تابيعي جانە ادام قولىمەن جاسالعان اپاتتارمەن ارپالىسىپ, كەسىر-كەساپاتىن جويۋمەن جەكە مينيسترلىكتىڭ اينالىسقانى ءجون. وسىنىڭ دۇرىستىعىنا وزبەكستاننىڭ ساردوبا سۋ قويماسى جارىلۋىنان قىزىل سۋ باسقان تۇركىستان وبلىسىنىڭ ماقتاارال اۋدانىن ارالاعان كەزدە كوز جەتكىزدىم.
جولداۋدا قويىلعان مىندەتكە سايكەس شەنەۋنىكتەر سانى كەزەڭ-كەزەڭمەن 25 پايىزعا ازايتىلاتىن بولدى. قۇپتارلىق ءىس. دەگەنمەن, بۇل پاندەميا كەزىندە قاشىقتان جۇمىس ىستەۋگە كوشىرىلگەن مامانداردى اۆتوماتتى تۇردە قىسقارتا سالۋ ەسەبىنەن جۇرگىزىلمەگەنى ابزال. قىسقارتۋ ناۋقانى بىلىكسىز, ءوز ىسىنە نەمقۇرايدى, حالىقتىڭ تومەن باعاسىن العان, اتىنا كوپ شاعىم تۇسەتىن, تيىمدىلىگى تومەن مەمقىزمەتشىلەردەن ارىلۋعا سەپتەسكەنى ءجون. ودان مەملەكەتتىك قىزمەت كورسەتۋ ساپاسى زارداپ شەكپەۋى قاجەت.
جولداۋدا ايتىلعانداي, ەلىمىزدە ستراتەگيالىق جوسپارلاۋ جانە رەفورمالار جونىندەگى اگەنتتىك پايدا بولادى. ول تىكەلەي مەملەكەت باسشىسىنا باعىنادى. ايتپەسە, ستراتەگيالىق جوسپارلاۋدىڭ اقساپ جاتقانىن, رەفورمالاردىڭ دا الا-قۇلا ەكەنىن, كوبىنىڭ اياعىنا دەيىن جەتكىزىلمەيتىنىن ءماجىلىس تالاي سىنعا الدى.
پرەزيدەنت تاپسىرماسىمەن «جاۋاپتى حاتشىلار» ينستيتۋتى جويىلادى. قاسىم-جومارت كەمەل ۇلى ءار مينيسترلىك پەن ۆەدومستۆودا جاۋاپتى حاتشى لاۋازىمى ەنگىزىلگەندە, ولار مينيسترلەردى اكىمشىلىك-كادرلىق جۇمىستان بوساتادى دەپ كۇتىلگەنىن, بىراق ولاي بولماعانىن اتاپ ءوتتى.
جاۋاپتى حاتشى لاۋازىمى كەزىندە كوماندامەن كوشىپ ءجۇرۋ سەكىلدى تەرىس قۇبىلىستى توقتاتۋ ءۇشىن دە ەنگىزىلگەن-ءتىن. ويتكەنى ول ءىستىڭ ساباقتاستىعىن جانە مەماپپاراتتىڭ تۇراقتىلىعىن ساقتاۋدى ءوز موينىنا الۋى كەرەك ەدى. مىسالى, ۇكىمەت مۇشەلەرى تولىعىمەن وتستاۆكاعا كەتىپ جاتقاندا, جاۋاپتى حاتشى ۇجىممەن بىرگە جۇمىستى جالعاستىرا بەرۋى ءتيىس-ءتىن. شىنىندا, بۇلار جاڭا باسشىمەن بىرگە بۇكىل ۇجىمنىڭ اۋىسۋىنا توقتاۋ بولا المادى. ونىڭ ۇستىنە جاۋاپتى حاتشىنىڭ ساياسي ماسەلەلەرگە ارالاسپاۋى تالاپ ەتىلدى. ءىس جۇزىندە ءبىر ماسەلەگە قاتىستى بۇل ەكەۋىنىڭ ۇستانىمى مەن شەشىمى ءوزارا قايشى كەلەتىن كەزدەر دە ۇشىراسادى. ءمينيستردى دە, جاۋاپتى حاتشىنى دا پرەزيدەنت ءوز جارلىعىمەن تاعايىندايتىندىقتان, ەكەۋىنىڭ جاعدايى ءاۋ باستان تەڭ. سوندىقتان ونىڭ ءبىرى ەكىنشىسىنە باعىنعىسى كەلمەي, ولاردىڭ اراسىندا تەكەتىرەس بولاتىن. ەندى بارلىق سۇراۋ ءبىر تۇلعادان – پرەزيدەنتتىڭ ءوزى تاعايىندايتىن مينيستردەن بولۋى ءتيىس.
ەل پرەزيدەنتى ۇسىنعان رەفورمالاردى جۇزەگە اسىرۋ ماقساتىندا پارلامەنت جىل سوڭىنا دەيىن مەملەكەتتىك قىزمەت تۋرالى زاڭناماعا تۇزەتۋلەر توپتاماسىن قابىلدايدى دەپ جوسپارلانىپ وتىر.
باقىتبەك سماعۇل,
ءماجىلىس دەپۋتاتى, Nur Otan فراكتسياسىنىڭ مۇشەسى
