تاۋ تۇلعالى ەسكەرتكىشى بوي كوتەردى قانىشتىڭ

كەرەكۋگە جان-جاقتان, الماتى مەن استانادان عالىمدار, اكادەميكتەر, اقىن-جازۋشىلار, پارلامەنت ءماجىلىسىنىڭ دەپۋتاتتارى, باياناۋىلدان, الىستاعى ەلدى مەكەندەردەن جۇرت كوپ جينالدى. وبلىس ورتالىعىنداعى بيىك تاس تۇعىرعا ۇلى عالىم, اكادەميك, ۇلتىمىزدىڭ ءبىرتۋار ۇلدارىنىڭ ءبىرى قانىش يمانتاي ۇلى ساتباەۆتىڭ الىپ ەسكەرتكىشى ورناتىلدى. قانىش اعامىزدىڭ تاس تۇعىرعا قونعان تاۋ تۇلعالى ەسكەرتكىشىنە ايتىسكەر اقىن اسقاق ءۇندى اسىل سوزدەرىمەن شاشۋ شاشىپ, سالتاناتتى ءراسىمنىڭ قۋانىشىن مولىقتىرا ءتۇستى. قانىش اعانىڭ كوكتە قالىقتاعان رۋحى دەم بەرگەندەي مە, ەسكەرتكىشتىڭ اشىلۋىنا جينالعان بارشا حالىق ەرەكشە ءبىر كوڭىل كۇيدە جۇرگەندەي. – بۇل كۇن بىزدەر ءۇشىن قاستەرلى, تاريحي-تاعىلىم­دىق ءمانى بار ۇلكەن قۋانىش دەپ بىلەمىن. ەسكەرتكىش اشىلعان سالتاناتتى ءساتتىڭ ءبىزدىڭ جادىمىزدا جاتتالىپ, ۇرپاقتار جالعاستىعىنا اينالاتىنىنا سەنىم مول. قانىش اعامىزدىڭ عۇلاما بەينەسى ءوزىمىز تۇعىرعا قوندىرعان قىرانداي اۋەلەي بەرسىن! – دەدى وبلىس اكىمى باقىتجان ساعىنتاەۆ ءوز سوزىندە. بۇدان كەيىنگى ءسوز كەزەگىن قوعام قايراتكەرى, اقىن كاكىمبەك سالىقوۆقا بەرىلدى. ۇلى تۇلعانىڭ ءوز حالقىنىڭ ورتاسىنا قايتا ورالعانداي اسەردە قالدىرعانىن, عۇلامانىڭ عۇمىرى سوڭىندا ءوسىپ كەلە جاتقان ۇرپاقتارىمەن عاسىرلىق مۇراعا اينالاتىنىن جەتكىزدى. اكادەميك مۇرات جۇرىنوۆ ەسكەرتكىشتىڭ اشىلۋىنا جينالعان كەرەكۋ جۇرتشىلىعىن قۇتتىقتاپ: ەسكەرتكىشتەرىڭ قۇت اكەلسىن! – دەگەن جاقسى لەبىزىن ءبىلدىردى. ءبىز مۇنى پاۆلودار قالاسىندا حالقىمىزدىڭ باتىر-باعلان ۇل-قىزدارىنا ارنالعان ەسكەرتكىشتەر كوبەيە بەرسىن دەگەن تىلەك تۇرعىسىندا ۇقتىق. بۇدان كەيىن وبلىس ورتالىعىندا قۋانىشتى تويدىڭ, جاقسى اسەردىڭ جالعاسى ەستاي اقىن اتىنداعى قالالىق مادەنيەت سارايىندا جالعاستى. عۇلاما عالىمنىڭ ەسكەرتكىشى اشىلۋىنا وراي كەرەكۋگە كەلگەن ساتباەۆتانۋشى عالىم, ينجەنەر-مەتاللۋرگ, جازۋشى مەدەۋ سارسەكە, پارلامەنت ءماجىلىسىنىڭ دەپۋتاتى كەنجەعالي ساعاديەۆ, اكادەميك, فيلوسوفيا عىلىم­دارى­نىڭ دوكتورى جابايحان ءابدىلدين, سەناتور قۋانىش سۇلتانوۆ, قوعام جانە مەملەكەت قايراتكەرى مىرزاتاي جولداسبەكوۆ, كاكىمبەك سالىقوۆ اعالارى­مىز توردەن ورىن الىپ, بۇگىنگى شاراعا وراي تانىمدىق اڭگىمەلەرىمەن جينالعان جۇرتشىلىقتى باۋراپ الدى. كوپتەن بەرى قازاقى رۋحاني اڭگىمەگە شولدەگەن كەڭ زال ءىشى ءبىر ءسات ەركىن تىنىستاپ, ساليقالى, سىندارلى سۇحباتقا دەن قويىپتى. “ەسكەرتكىش قويۋ دەگەن ول كوشەنى كوركەيتۋ ەمەس, بۇل ادام جانىن كوركەيتۋ, ۇرپاققا ۇلگى بەرۋ, سىزدەردىڭ ەلدەرىڭىزدى قانىش ەلى دەپ اتاعان مەدەۋگە راحمەت”, دەدى اقىن كاكىمبەك سالىقوۆ. پاراساتتى وي, ساليقالى ءسوز ساپتاپ, جۇرتتى ۇيىتقان مىرزاتاي جولداسبەكوۆ قىرعىزستاندا بولىپ جاتقان جاعدايدى ايتا كەلىپ, “ەلدىڭ, جەردىڭ, تاۋەلسىزدىكتىڭ ءدامى ماڭگى ءتاتتى بولسىن, وسى ەلدى, جەردى كۇزەتىپ وتىرعان اسىل اعايىن, سەندەر امان بولىڭدار”, دەپ اق تىلەك ايتتى. “قانىشتىڭ ۇلى بەينەسى جاقسى ىستەرگە باستاسىن! ۇلكەن توي جالعاسىن تاپسىن!” دەدى ءوز سوزىندە قانىش اعامىز تۋرالى جاقسى ەستەلىكتەر ايتقان مەدەۋ سارسەكە. قانىش ساتباەۆ ەسكەرتكىشىنىڭ اۆتورى – ءمۇسىنشى, شوقان ءۋاليحانوۆ اتىنداعى سىيلىقتىڭ لاۋرەاتى ولگا پروكوپەۆا. ەسكەرتكىش تۇرعان تۇعىر جامبىل وبلىسىنان جەتكىزىلگەن قورداي گرانيتى. بيىكتىگى – 8,5 مەتر. وسىلايشا, پاۆلودار قالاسىندا عۇلاما عالىم قانىش ساتباەۆتىڭ جانىن كوركەيتەتىن جاقسى شارا جۇزەگە استى. فاريدا بىقاي, پاۆلودار.