جولداۋ بارىسىندا پرەزيدەنت ىقشام مەملەكەتتىك باعدارلامالارعا كوشۋ كەرەگىن ەسكەرتتى.
"ۇلكەن كورسەتكىشتەرى مەن ينديكاتورلارى بار مەملەكەتتىك باعدارلامالاردى دايىنداۋدى توقتاتۋ كەرەك. بارلىق تۇرعىنعا تۇسىنىكتى ىقشام ۇلتتىق جوبالارعا كوشەتىن ءسات كەلدى. كۇردەلى وزگەرىستەر مەملەكەتتىك اپپاراتتىڭ قىزمەتىن قايتا قاراۋدى قاجەت ەتەدى. مۇندا رەفورمانى جوسپارلاۋ مەن جۇزەگە اسىرۋ سينەرگياسى ماڭىزدى ماعىناعا يە", دەدى توقاەۆ.
سونىمەن قاتار, مەملەكەت باسشىسى شەنەۋنىكتەردى بيىل 10, كەلەسى جىلى 15 پايىزعا قىسقارتۋدى تاپسىردى.
"مەملەكەتتىك قىزمەتتىڭ جۇيەسىن قايتا قاراۋ كەرەك. پاندەميا مەن مەملەكەتتىك ورگانداعى كوپتەگەن قىزمەتكەردى قاشىقتان جۇمىس ىستەۋ رەجيمىنە اۋىستىرۋ مەماپپاراتتى قىسقارتۋ كەرەك ەكەنىن كورسەتتى. مەملەكەتتىك اپپارات پەن كۆازيمەملەكەتتىك سەكتورىن قىسقارتۋ مەرزىمىن جىلدامداتۋدى تاپسىرامىن. بيىل ولاردىڭ سانىن 10 پايىزعا قىسقارتۋ قاجەت. كەلەسى جىلى تاعى 15 پايىزعا قىسقارتۋ كەرەك. وسىلايشا, شەنەۋنىكتەردى 25 پايىزعا قىسقارتۋ تاپسىرماسىن 2021 جىلى شەشىپ بولامىز. ناتيجە مەن تسيفرلاندىرۋعا بايلانىستى تاعى دا قىسقارتۋ ماسەلەسىن قارايمىز. ۇنەمدەلگەن قاراجات ارقىلى قالعان قىزمەتكەرلەردىڭ جالاقىسى ارتتىرىلادى", دەدى ول.
