ارينە, تۇرعىن ءۇي سالاسىندا قابىلدانعان باعدارلاما كوپ. سونىڭ ءبىرى – «نۇرلى جەر». بيىل وسى باعدارلاما شەڭبەرىندە وڭىردە ساتىپ الۋ قۇقىعىنسىز 157 پاتەر جالعا بەرىلەدى. مۇنداي مۇمكىندىك حالىقتىڭ از قامتىلعان توپتارى مەن كوپبالالى وتباسىلارعا ارنالىپ وتىر. ال كرەديتتىك تۇرعىن ۇيگە 500-گە جۋىق تۇرعىن قول جەتكىزبەك. بۇل باعىتتاعى باسپانا قۇرىلىسىنا 5 ملرد تەڭگە قاراجات قاراستىرىلدى.
سونداي-اق «نۇرلى جەر» مەملەكەتتىك باعدارلاماسى اياسىندا 2 پايىزدىق نەسيەمەن بەرىلەتىن «باقىتتى وتباسى» باعدارلاماسىن ىسكە اسىرۋ دا جوسپارلانعان. بۇعان رەسپۋبليكالىق بيۋدجەتتەن 239 تۇرعىن ءۇي قارىزى ءۇشىن 2,4 ملرد تەڭگە بولىنەدى. تۇرعىن ءۇي قۇرىلىسى سالىنىپ جاتقان اۋداندارعا ينجەنەرلىك-كوممۋنيكاتسيالىق ينفراقۇرىلىمدى جۇرگىزۋ ءۇشىن 39 جوبانى ىسكە اسىرۋ كوزدەلىپ وتىر. بۇل ماقساتقا 10,3 ملرد تەڭگە قاراجات قارالعان. سونىمەن قاتار اتىراۋ وبلىسىندا باسپانا قۇرىلىسى جۇمىستارىنا 2 مىڭعا جۋىق ادامدى تارتۋ جوسپارلاندى. جالپى بەس ايدا 1 467 تۇرعىن ءۇي پايدالانۋعا بەرىلدى. ونىڭ ىشىندە 975 جەكە ءۇي بار.
بىلتىردان بەرى ءوڭىر ورتالىعىنداعى اپاتتى تۇرعىن ۇيلەر مەن جاتاقحانالاردىڭ تۇرعىندارىن جاڭا پاتەرگە كوشىرۋ قولعا الىنعان ەدى. ماسەلەن, اتىراۋ قالالىق تۇرعىن ءۇي-كوممۋنالدىق شارۋاشىلىعى ءبولىمىنىڭ سەكتور مەڭگەرۋشىسى رافحات جولديەۆتىڭ دەرەگىنە سۇيەنسەك, بىلتىر ا.قۇنانباەۆ, ج.دوسمۇحامبەتوۆ كوشەلەرىندەگى ەكى جاتاقحانانىڭ تۇرعىندارى «بەرەكە» شاعىن اۋدانىنداعى جاڭا ۇيگە كوشىرىلدى. ال بيىل ەكى اپاتتى ءۇيدىڭ تۇرعىندارىنا جاڭا پاتەرلەردىڭ كىلتى تابىستالدى. اتاپ ايتقاندا, م.اۋەزوۆ كوشەسىندە ورنالاسقان №22 ءۇيدىڭ تۇرعىندارىنا «جۇلدىز» شاعىن اۋدانىنداعى ۇيدەن پاتەر بەرىلدى. ال دوستىق كوشەسىندەگى №14 ءۇيدىڭ تۇرعىندارى «بەرەكە» شاعىن اۋدانىنداعى جاڭا مەكەنگە كوشىرىلدى. سونداي-اق «بىرلىك» شاعىن اۋدانىنداعى اتپ-1, اتپ-2 مەكەن-جايىنداعى اپاتتى دەپ تانىلعان تۇرعىن ۇيلەردەن 32 وتباسى «جۇلدىز» شاعىن اۋدانىنا قونىس اۋداردى.
ەندى مىنە, 30 تامىز – كونستيتۋتسيا كۇنى قارساڭىندا 33 وتباسى جاڭا پاتەرگە يە بولىپ وتىر. جاڭا پاتەرلەر «نۇرسايا» شاعىن اۋدانىندا بوي كوتەرگەن 9 قاباتتى تۇرعىن ۇيلەردىڭ بىرىنەن بەرىلدى. باسپانالى بولعانداردىڭ دەنى – 2013 جىلدان بەرى تۇرعىن ءۇي كەزەگىندە تۇرعان كوپ بالالى وتباسىلار.
– بۇل – «نۇرلى جەر» باعدارلاماسى اياسىندا جالعا بەرىلگەن پاتەرلەر. اتالعان باعدارلامامەن بىلتىر 257 وتباسى پاتەر العان ەدى. ال بيىل جىل باسىنان بەرگى سەگىز ايدا جاڭا باسپانا العانداردىڭ سانى 250 وتباسىنا جەتتى, – دەدى اتىراۋ قالالىق تۇرعىن ءۇي-كوممۋنالدىق شارۋاشىلىق ءبولىمىنىڭ سەكتور مەڭگەرۋشىسى رافحات جولديەۆ.
ونىڭ ايتۋىنشا, بيىل قونىس تويىن تويلايتىن وتباسىلار قاتارى ارتا تۇسپەك. جىل اياعىنا دەيىن تۇرعىن ءۇي كەزەگىندەگىلەرمەن بىرگە اپاتتى جاعدايداعى جاتاقحانالاردىڭ تۇرعىندارىن دا كوشىرۋ كوزدەلىپ وتىر.
اتىراۋ وبلىسى
