كۇزگى ماۋسىم قارساڭىندا № 1 كوپسالالى قالالىق بالالار اۋرۋحاناسى ديرەكتورىنىڭ ورىنباسارى, پەدياتر دينات قوجەكەنوۆ نۇر-سۇلتان اكىمدىگىنىڭ Instagram پاراقشاسىندا وتكەن تىكەلەي ەفيردە اتا-انالارعا ۇسىنىستار ايتتى.
ەڭ الدىمەن, ونىڭ ايتۋىنشا, جەكە گيگيەنانى ساقتاۋ كەرەك.
"جرۆي ماۋسىمى كەزىندە ۇستانۋعا ءتيىستى نەگىزگى قاعيدالار بار. ەڭ الدىمەن, قولىڭىزدى ءجيى جۋىپ, بولمەلەردى ءجيى جەلدەتۋ كەرەك. سونداي-اق, ءسىز تۇرعان, جۇمىس ىستەيتىن نەمەسە قول تيگىزگەن زاتتار ءجيى ەرىتىندىلەرمەن وڭدەلۋى كەرەك. بولمەدە ادامدار نەعۇرلىم كوپ بولسا, سوعۇرلىم ءجيى جەلدەتۋ كەرەك", - دەدى دينات قوجەكەنوۆ.
يممۋنيتەتتى ساقتاۋ ءۇشىن بالالار مەن ەرەسەكتەر جاقسى تاماقتانىپ, جاتتىعۋ جاساپ, دەنەنى شىنىقتىرۋى كەرەك.
ەگەر بالادا جرۆي بەلگىلەرى بولسا, وندا ونى ءوز بەتىنشە ەمدەمەي, ۋچاسكەلىك دارىگەردىڭ كەڭەسىمەن ەم جاساۋ قاجەت. بالالاردا يممۋنيتەت ەندى قالىپتاسىپ جاتقاندىقتان, اۋرۋ قاۋىپتى بولۋى مۇمكىن.
"دارىگەر رەتىندە اتا-انالارعا ءوز بەتىنشە ەمدەۋگە كەڭەس بەرمەيمىن. پنەۆمونيانى جانە جرۆي – ءدى ەمدەۋدە نەگىزگى پروتسەدۋرالار بار, ولاردى ۇيدە جاساۋعا بولادى. بۇل بولمەنى ءجيى جەلدەتۋ. ەگەر تەمپەراتۋرا كوتەرىلسە, تەمپەراتۋرانى سۋمەن ءسۇرتىپ ءتۇسىرىڭىز. بالانى سپيرتپەن ءسۇرتۋ قاجەت ەمەس, ويتكەنى جاناما اسەرلەرى بولۋى مۇمكىن. سوندىقتان جاي عانا قاراپايىم سۋمەن سۇرتۋگە بولادى. تەرى ىلعالدى بولعان كەزدە جىلۋ الماسۋ جاقسارادى, ياعني سۋ بۋلانىپ, بۋمەن بىرگە دەنە قىزۋى دا تۇسەدى. ارينە, سۇيىقتىق كوپ ءىشۋ كەرەك: مورس, سورپا, سۋ", - دەپ كەڭەس بەردى پەدياتر.
جرۆي - اۋرۋدىڭ جالپىلانعان اتاۋى. ونى ءارتۇرلى ۆيرۋستار تۋدىرۋى مۇمكىن. جەدەل رەسپيراتورلى ۆيرۋستىق ينفەكتسيالار ۇزاق ۋاقىت بويى زاتتاردا نەمەسە اۋادا ساقتالۋى مۇمكىن, دەدى ول.
پنەۆمونيانىڭ قوزدىرعىشى دا ءارتۇرلى بولۋى مۇمكىن. ونى ۆيرۋستار, باكتەريالار جانە جاسۋشاىشىلىك ميكروورگانيزمدەر قوزدىرۋى مۇمكىن. نەگىزىنەن اۋا تامشىلارى ارقىلى بەرىلەتىن ميكروورگانيزمدەر وكپەنىڭ قابىنۋىنا اكەلەدى. كوبىنەسە پنەۆمونيا ۆيرۋستىق بولىپ باستالادى, سودان كەيىن باكتەريالىققا ۇلاسۋى مۇمكىن.
