سوزىمىزگە تۇزدىق بولارداي, كۇنى كەشە وسىنداي يگى جاڭالىقتىڭ شەتىن ەستىپ قۋانىپ قالعان جايىمىز بار. ول – پاۆلودار وبلىسىندا ءۇش بىردەي اقىننىڭ كىتابى جارىق كورۋى ەدى. دالىرەك ايتساق, ايبەك ورالحاننىڭ «التى اڭعار» اتتى العاشقى جىر جيناعى مەن الپىسباي ءابدىل ۇلىنىڭ ء«ارىپتى سوتتاۋ» اتتى كىتاپتارى جازۋشىلار وداعى پاۆلودار وبلىستىق فيليالىنىڭ ارنايى جوباسى اياسىندا جانە «جومارت جۇرەك» سىيلىعىنىڭ يەگەرى, ونەر جاناشىرى اسىلبەك تۋعانبايدىڭ قارجىلاي قولداۋ كورسەتۋىمەن جارىق كورگەن.
«بۇگىنگى جاڭالىق وسى. ايبەك پەن الپىسبايدىڭ كوپتەن كۇتكەن العاشقى كىتاپتارى جارىققا شىقتى. كىتاپتاردى شىعارۋعا دەمەۋشىلىك كورسەتكەن اسىلبەك تۋعانباي اعامىزعا العىسىمىز زور. بۇيىرسا, ەرتىس-بايان ءوڭىرىنىڭ ادەبي ومىرىندە تاياۋ كۇندەرى تاعى دا بىرقاتار ايتۋلى جاڭالىق بولاتىندىعىن سۇيىنشىلەي كەتكىم كەلەدى. كەرەكۋدە كوركەمسوزدىڭ سالقار كوشىنە ىلەسكەن تالانتتى تۇستاستارىمىزدىڭ قاتارى كوبەيۋدە. بۇل كوزىقاراقتى وقىرماندى ەرەكشە قۋانتادى. ولاردىڭ الدى العاشقى جيناقتارىن شىعارىپ تا ۇلگەردى. وسى ءبىر ءۇردىس ۇزدىكسىز جالعاسسا, ءوڭىردىڭ ادەبي ءومىرى جاندانا تۇسەرى ءسوزسىز», دەيدى اقىن, جازۋشىلار وداعى پاۆلودار وبلىستىق فيليالىنىڭ ديرەكتورى جارقىنبەك امانتاي.
ال ءۇشىنشى كىتاپتىڭ يەسى – ايتىسكەر اقىن, «التىن دومبىرا» يەگەرى اسپانبەك شۇعاتاەۆ. ول كىتابىنا «جەردەگى اسپان سويلەسە...» دەپ ات قويىپتى. اۆتوردىڭ ايتۋىنشا, كىتاپقا ايتىستارى مەن ولەڭدەرى ەنگەن.
