جۇمىس ساپارى "قازاقستان اسەلسان ينجينيرينگ" جشس-نى ارالاۋدان باستالدى, وندا قر ۇكىمەتىنىڭ تاپسىرىسى بويىنشا وتاندىق ءوجج اپپاراتتارى جاسالۋدا. كاسىپورىندا 31 تامىزعا دەيىن 750 ءوجج اپپاراتىن, 20 قىركۇيەككە دەيىن قوسىمشا 750 بىرلىك ءوجج اپپاراتىن جاساپ شىعارۋ جوسپارلانعان. بۇل اپپاراتتار جەرگىلىكتى مەديتسينالىق پەرسونالدى وقىتۋمەن قوسا, ەلىمىزدىڭ 297 اۋرۋحاناسىندا ورناتىلادى. كەپىلدى سەرۆيستىك قىزمەت كورسەتۋ 37 ايعا دەيىن بولادى.
سونىمەن قاتار "قازاقستان اسەلسان ينجينيرينگ" جشس بازاسىندا دەنە قىزۋىن قاشىقتان ولشەۋگە ارنالعان وتاندىق تەپلوۆيزورلاردى ءوندىرۋ مۇمكىندىگى قاراستىرىلۋدا. سونداي-اق ە. توعجانوۆ "بولاشاق 2019" جشس-دە بولدى, مۇندا ايىنا 2 ملن-عا دەيىن ماسكا شىعاراتىن وندىرىستىك قۋاتى بار مەديتسينالىق ماسكا ءوندىرىسى جولعا قويىلعان.
ە.توعجانوۆ وندىرىستىك كاسىپورىنداردىڭ جۇمىسىنا وڭ باعا بەرىپ, ۇكىمەت وتاندىق وندىرۋشىلەردى جان-جاقتى قولدايتىنىن اتاپ ءوتتى. بۇعان قوسا قر پرەمەر-ءمينيسترىنىڭ ورىنباسارى ۇلتتىق عىلىمي ونكولوگيالىق ورتالىق قۇرىلىسى بارىسىمەن جانە ونكولوگيا بويىنشا جوبالىق كەڭسەنىڭ جۇمىسىمەن تانىستى. بۇل ورتالىق بولاشاقتا ازاماتتارعا قاتەرلى ىسىكتەردى ەرتە دياگنوستيكالاۋ جانە ەمدەۋ بويىنشا جوعارى بىلىكتى جانە جوعارى تەحنولوگيالىق مەديتسينالىق كومەك كورسەتۋگە مۇمكىندىك بەرەدى.
ۆيتسە-پرەمەر بۇل ورتالىقتىڭ ۇلتتىق دەڭگەيدە ونكولوگيالىق كومەك كورسەتۋدىڭ ينتەگراتسيالانعان مودەلىن قۇرۋدا, العاشقى مەديتسينالىق-سانيتارلىق كومەك, ونىڭ ىشىندە بارلىق وڭىرلىك ونكولوگيالىق ورتالىقتار مەن التى جوعارى تەحنولوگيالىق رادياتسيالىق ونكولوگيالىق ورتالىقتاردى ۇيلەستىرۋشى بولاتىنىن اتاپ ءوتتى. سونداي-اق كادرلاردى, دارىگەرلەر مەن تەحنيكالىق پەرسونالدى (مەديتسينالىق تەحنيكتەر) دايارلاۋ مىندەتى قويىلدى.
قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ءۇشىن Telegram جەلىسىندە بىزگە جازىلىڭىز.
