شقو جارما اۋدانىنداعى "شار" سۋ قويماسى "كازگيپروۆودحوز" ينستيتۋتىنىڭ جوباسى بويىنشا 1978 جىلى سالىنعان, جالپى كولەمى 80,0 ملن. م3-ءدى قۇرايدى. سۋ قويماسى سالىنعاننان بەرى جوندەۋ جۇمىستارى جۇرگىزىلمەگەن. 2016 جىلى نىساندى كۇردەلى جوندەۋدەن وتكىزۋ ماقساتىندا رەسپۋبليكالىق بيۋدجەتتەن ءبىر ميلليارد جارىم تەڭگە قارجى بولىنگەن. الايدا بۇگىنگى كۇنگە ءتيىستى جوندەۋ جۇمىستارى جۇرگىزىلمەگەن, سۋ قويماسى ماقساتقا ساي پايدالانىلىپ تۇرعان جوق.
"قازسۋشار" شجق رمك شقو فيليالىنىڭ باسشىسى ر.نيگمەدجانوۆتىڭ ايتۋى بويىنشا جوبالاۋشى ۇيىمىنىڭ تاراپىنان جىبەرىلگەن قاتەلىكتەر سالدارىنان جوبانىڭ سمەتالىق قۇنىندا سايكەسسىزدىكتەر ورىن العان. اۋدان اكىمى "شار" سۋ قويماسى نەگىزىنەن اۋىل شارۋاشىلىعى ونىمدەرىن سۋارۋعا پايدالانىلاتىنىن, بۇل اۋداننىڭ عانا ەمەس, ءوڭىردىڭ دە ەكونوميكاسىنا تىكەلەي اسەر ەتەتىنىن جەتكىزدى.
سەناتور دۇيسەنعازى مۋسين سۋ قويماسىنىڭ تۇرالاپ, كوپتەگەن كۇردەلى ماسەلەنىڭ تۋىنداۋىنا سەبەپ بولعانى ءۇشىن شارۋاشىلىق كاسىپورىنىن سىنعا الدى. دەپۋتات جەرگىلىكتى اكىمدىك ماماندارىنا جوبالاۋ ەسەپتەرىن تالاپقا ساي كەلتىرۋ, ال مەردىگەرگە جوندەۋ جۇمىستارىن ساپالى اياقتاپ, تاپسىرۋ قاجەتتىگى تۋرالى ايتتى. دۇيسەنعازى مۋسين اۋدان جانە كاسىپورىن باسشىلارىنىڭ جاۋاپكەرشىلىگى تۋرالى ەسكەرتىپ, جاعدايدى ءوزى تۇراقتى باقىلاۋدا ۇستايتىنىن جەتكىزدى.
