داۋ بىلاي باستالدى. تانىمال Fortnite ويىنى باعدارلاماسىن جاساعان Epic Games كومپانياسى Google جانە Apple-ءدىڭ تولەم جۇيەسىندەگى كوميسسيالىق اقىنىڭ قىمبات ەكەنىنە نارازىلىق تانىتىپ جۇرگەن. قازىرگى تاڭدا بۇل ۇستەمەاقى 30 پايىزدى قۇرايدى. كەيىننەن كومپانيا ءوزىنىڭ تولەم جۇيەسىن جاساپ شىعاردى. ءسويتىپ, Epic Games ەكى كومپانيانى تاقىرعا وتىرعىزىپ كەتتى. بۇعان قارسى قادام رەتىندە Apple ءوزىنىڭ دۇكەنىنەن Fortnite ويىنىن مۇلدەم ءوشىرىپ تاستادى.
The Guardian باسىلىمىنىڭ حابارلاۋىنشا, Microsoft-تىڭ باسشىلىق قىزمەتىندەگى كەۆين گامميل ارنايى مالىمدەمە جاساپ, Epic Games-ءدى قولدايتىنىن جەتكىزگەن.
«Epic Games-ءتىڭ Unreal Engine تەحنولوگياسى كوپتەگەن ويىن جاساۋشىلار ءۇشىن ماڭىزدى. ولاردىڭ قاتارىندا مايكروسوفت تا بار. Apple-ءدىڭ كومپانيامەن كەلىسىمدى بۇزۋى جانە تەحنولوگيانى قولداماۋى كەلەشەكتە ويىن جاساۋشىلارعا دا, وينايتىن تۇرعىندارعا دا كەرى اسەرىن تيگىزەدى», دەپ جازدى ك.گامميل.
Apple-ءدىڭ اشۋى قاتتى. كومپانيا 28 تامىزدان باستاپ Epic Games-ءدىڭ App Store-داعى اككاۋنتىن جويىپ تاستاۋدى جوسپارلاپ وتىر. بىراق ەكىجاقتى كەلىسسوز جۇرگىزىپ, مامىلەگە كەلسە, Apple باسشىلارى ۇستانىمدارىن وزگەرتۋى مۇمكىن.
جالپى, Microsoft-تىڭ رەسمي تۇردە Apple-عا قارسى شىعۋى بەكەر ەمەس. تاياۋدا «ەپپل» باسشىلىعى «مايكروسفوتقا» تيەسىلى xCloud ستريمدىك قىزمەتىن بۇعاتتاپ تاستاعان ەدى. بۇل ارينە, بيلل گەيتستىڭ كومپانياسىنا ۇناعان جوق. قىسقاسى, IT سالاسىنداعى الپاۋىت ەكى كومپانيانىڭ اراسىنان قارا مىسىق جۇگىرىپ ءوتتى.
