كوروناۆيرۋس • 25 تامىز، 2020

قازاقستاندىق ەكپە كەلەشەگى زور 200 ۆاكتسينا قاتارىندا

239 رەت كورسەتىلدى

The Washington Post باسىلىمى قازاقستاندا ازىرلەنگەن COVID-19-عا قارسى ۆاكتسينانى كەلەشەگى زور ەكسپەريمەنتتىك 200 ۆاكتسينا تىزىمىنە قوستى، دەپ حابارلايدى Egemen.kz قازاقپاراتقا سىلتەمە جاساپ. 

The Washington Post-تا جاريالانعان ساراپتاماعا سايكەس، قازاقستان رەسپۋبليكاسى "بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتى" رمك ازىرلەگەن كوروناۆيرۋس ينفەكتسياسىنا قارسى ۆاكتسينا كەلەشەكتە بۇكىل الەمدى جايلاعان ىندەتتى جەڭۋگە كومەك بەرە الاتىن ەكسپەريمەنتتىك 200 ۆاكتسينا تىزىمىنە قوسىلعان. The Washington Post قازاقستاندىق ۆاكتسينانى ازىرلەۋگە ۇزاق ۋاقىت كەتەتىن ءالسىز جانە يناكتيۆتەلگەن ۆيرۋستىق ۆاكتسينالار ساناتىنا قوسىپ وتىر. بىراق بۇل ۆاكتسينانىڭ تيىمدىلىگىنە اسەر ەتەدى دەگەن ءسوز ەمەس.

ء"يا، ۆاكتسينانىڭ بۇل ءتۇرىن ازىرلەۋ بارىسىندا بارىنشا ەسكىرگەن ءادىس قولدانىلادى. ول كەزدە ۆيرۋس السىرەيدى. سوندىقتان ول اۋرۋ تۋدىرمايدى. بىراق، اعزانىڭ يممۋندىق جۇيەسىندە قورعانىس تەتىگىن ىسكە قوسادى. قىزىلشاعا، ەپيدەميولوگيالىق پاروتيتتە جانە قىزامىققا قارسى ۆاكتسينادا ءدال وسى ءادىس قولدانىلادى. يناكتيۆتەلگەن ۆيرۋستىق ۆاكتسينادا ادامدارعا جۇعۋعا قابىلەتسىز، الايدا يممۋندىق جۇيەگە ينفەكتسياعا قارسى قورعانىس رەاكتسياسىن قالاي ۇيىمداستىرۋدى كورسەتە الاتىن ءولى ۆيرۋستار بولادى. بۇل ءادىستى امەريكالىق ۆيرۋسولوگ دجوناس سولك پوليوميەليتكە قارسى ۆاكتسينا ازىرلەۋ بارىسىندا قولدانعان. اتاپ وتەرلىگى، سولك ۆاكتسيناسىن قولدانعاننان كەيىن اقش-تا بالالار اراسىنداعى پوليومەليتكە شالدىعۋ 96 پايىزعا تومەندەدى. سونىمەن قاتار بۇل ءادىس تۇماۋعا قارسى ۆاكتسينانى ازىرلەۋ بارىسىندا دا قولدانىلادى"، دەپ جازادى The Washington Post.

باسىلىمنىڭ اتاپ وتۋىنشە، قازىردىڭ وزىندە كوروناۆيرۋسقا قارسى 170-تەن استام ۆاكتسينا زەرتحانالاردا جانۋارلارعا، 7 ۆاكتسينا دەنى ساۋ جاس ادامدارعا، 12 ۆاكتسينا تاۋەكەل توبىنا كىرەتىن ادامدارعا سالىنىپ، سىنقتان ءوتىپ جاتىر. مۇنان بولەك، تاعى 7 ۆاكتسينا تيىمدىلىگى مەن قاۋىپسىزدىگىن انىقتاۋ ءۇشىن 1 مىڭ ادامعا سالىنعان.

وكىنىشكە قاراي، ازىرشە ءبىر دە ءبىر ۆاكتسينا تولىققاندى قولدانۋ ءۇشىن ماقۇلدانعان جوق. ەستەرىڭىزگە سالا كەتسەك، 2020 جىلدىڭ 26 شىلدەسىندە قازاقستاندىق ۆاكتسينانىڭ 5 ازىرلەۋشىسى ءتىرى ۆيرۋسپەن جۇمىس ىستەۋ بارىسىندا قاۋىپسىزدىگىن قامتاماسىز ەتۋ ءۇشىن ەرىكتى تۇردە ۆاكتسينانى وزدەرىنە سىنادى. قر دەنساۋلىق ساقتاۋ مينيسترلىگىنەن رۇقسات الىنعاننان كەيىن 2020 جىلدىڭ 20 قىركۇيەگىندە الماتى قالاسىنداعى كلينيكانىڭ بازاسىندا COVID-19-عا انتيدەنەسى جوق 44 ەرىكتىگە كلينيكالىق سىناق ء(ى فازا) باستالۋى ءتيىس. 2020 جىلدىڭ قازان ايىنىڭ ورتاسىندا دۇنيەجۇزىلىك دەنساۋلىق ساقتاۋ ۇيىمىنىڭ تالاپتارىنا ساي كەلەتىن 200 ەرىكتىگە كلينيكالىق سىناق وتكىزۋدىڭ ءىى فازاسىنا شىعۋ جوسپارلانعان.

كلينيكالىق سىناقتىڭ ءىى فازاسى 2020 جىلدىڭ جەلتوقسان ايىندا اياقتالماق. ايتا كەتكەن ءجون، بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتى ازىرلەگەن Covid-19 قارسى ەكىنشى ۆاكتسينا دۇنيەجۇزىلىك دەنساۋلىق ساقتاۋ ۇيىمىنىڭ سايتىنا تىركەلگەن بولاتىن. COVID-19 ۆاكتسيناسىن جاساۋ بويىنشا جۇمىستاردىڭ بارىسىنا قىزىعۋشىلىق تانىتقان ازاماتتار ددسۇ ۆەب-سايتىندا ۆاكتسيناعا ۇمىتكەرلەر تۋرالى جالپى شولۋدى وقي الادى.

الدىن الا بولجامعا سايكەس، قازاقستاندا كوروناۆيرۋسقا قارسى ۆاكتسينا 65 جاستان اسقان، جۇرەك-قان تامىرى اۋرۋى، قانت ديابەتى جانە سوزىلمالى وكپە اۋرۋلارى بار تاۋەكەل توبىنا كىرەتىن ادامدارعا جانە مەديتسينا قىزمەتكەرلەرىنە سالىنادى. ۆاكتسينا الاتىنداردىڭ بولجامدى سانى - 2 347 000 ادام.

 

سوڭعى جاڭالىقتار

ۇقساس جاڭالىقتار