سقو پوليتسيا دەپارتامەنتىنىڭ باستىعى, پوليتسيا پولكوۆنيگى مارات تولەباەۆ ءىس-شارا قارساڭىندا سولتۇستىكقازاقستاندىق پوليتسيانىڭ بارلىق جەكە قۇرامىن ەگىن ورۋعا قاتىساتىن ديقانشىلار مەن اۋىل تۇرعىندارىنا كومەك كورسەتۋگە باعدارلادى. وبلىستا 4 ميلليون گەكتارعا جۋىق ەگىستىك القابى بار. پوليتسەيلەردىڭ مىندەتى – قوعامدىق ءتارتىپتى جانە جول قاۋىپسىزدىگىن قامتاماسىز ەتۋ, استىق پەن استىق ونىمدەرىنىڭ, جانار-جاعارماي, اۋىل شارۋاشىلىق تەحنيكاسى مەن قوسالقى بولشەكتەردىڭ ۇرلىعىن انىقتاۋ جانە جولىن كەسۋ.
ءىس-شارا باستالعالى وبلىس بويىنشا 5 قىلمىس تىركەلىپ, ولاردىڭ ءبارى دە جەدەل تۇردە اشىلدى. سونىڭ ءبىرى ءۋاليحانوۆ اۋدانىندا جاسالعان ەدى. اۋدانداعى قوجالىقتاردىڭ بىرىنەن ۇنەمى ديزەلدى وتىن ۇرلاناتىنى تۋرالى دابىل تۇسكەن. ول اقبۇلاق جانە كىشكەنەكول اۋىلدارىنىڭ اراسىندا وراق جۇمىستارىنا تارتىلعان تەحنيكادان ۇرلانعان. جەدەل-ىزدەستىرۋ ءىس-شارالارى جۇرگىزىلىپ, ناتيجەسىندە سول شارۋا قوجالىعىنىڭ مەحانيزاتورى ۇرلىق جاساۋ كەزىندە اشكەرەلەندى. 58 جاستاعى ەر ادام ءوزىنىڭ "ك-701" تراكتورىنا جانار-جاعارمايدى تولتىرىپ قۇيىپ الىپ, ونى كاماز جۇرگىزۋشىلەرىنە ساتۋدى ادەت قىلعان. ونىڭ وسىنداي ءۇش ۇرلىققا قاتىستىلىعى انىقتالدى. ۇرلانعان جانار-جاعارمايدىڭ كولەمى – 160 ليتر. ونىڭ 80-ءى الىندى, استىق ەگەتىن كەشەندە جاسىرىلعان جانار-جاعارمايدىڭ ءبىر بولىگى كانيستردە بولعان. قازىرگى ۋاقىتتا اتالعان فاكتىلەر بويىنشا سوتقا دەيىنگى تەرگەۋ جۇرگىزىلۋدە.
قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ءۇشىن Telegram جەلىسىندە بىزگە جازىلىڭىز.
