جاۋاپتى ۆەدومستۆونىڭ وكىلى تىركەلۋگە جاتاتىن قالعان اۆتوكولىكتەر ون كۇننىڭ ىشىندە قاجەتتى راسىمدەردەن وتەدى دەگەن سەنىمدە. ويتكەنى تىركەۋ ناۋقانى 1-ءشى قىركۇيەككە دەيىن جالعاسادى. بىراق قۇزىرلى ورگان ماماندارى قايتا جابدىقتالعان كولىكتەردىڭ ەرەكشەلىكتەرى ەسكەرىلىپ, ولاردى تىركەۋ جۇمىستارىنىڭ مەرزىمىن ۇزارتۋ ماسەلەسى قارالاتىنىن جوققا شىعارمادى.
"تىركەۋ بويىنشا بەلگىلى تالاپتار بار ەكەنىن ەسكەرسەك, ۇكىمەت قاۋلىسىندا ونىڭ ناقتى مەرزىمى كورسەتىلگەن. تىركەۋ 1 قىركۇيەككە دەيىن جالعاسادى. وسى ۋاقىتقا دەيىن بەلگىلەنگەن شارتتارعا سايكەس, بارلىق كولىك قۇرالى تىركەلەدى دەپ جوسپارلانۋدا. ازاماتتاردىڭ وتىنىشتەرىن ەسەپكە الساق, تەحنيكالىق رەتتەۋ جانە مەترولوگيا كوميتەتى قايتا جابدىقتالعان اۆتوكولىكتەردى تىركەۋ ۋاقىتىن ۇزارتۋ ماسەلەسى پىسىقتالىپ جاتىر", دەدى ءىىم اكىمشىلىك پوليتسيا كوميتەتى توراعاسىنىڭ ورىنباسارى سەرىك ءتۇسىپوۆ.
اكىمشىلىك پوليتسيا كوميتەتى توراعاسىنىڭ ورىنباسارى باسقارۋ ءرۋلى وڭ جاقتا ورنالاسقان اۆتوكولىكتەر تىركەۋ ناۋقانىنا قاتىسا المايتىنىن ەسكە سالدى. بۇل كولىكتەردى تىركەۋگە قازاقستاندا 2009 جىلدان بەرى تىيىم سالىنعان. اتالعان ماسەلە ەلىمىزدەگى جول قوزعالىسىنا قاتىستى زاڭمەن قاتار, كەدەن وداعىنىڭ تەحنيكالىق رەگلامەنتىمەن رەتتەلەدى.
ساۋدا جانە ينتەگراتسيا مينيسترلىگى كولىكتىك رەتتەۋ جانە مەترولوگيا كوميتەتى توراعاسىنىڭ ورىنباسارى سەرىك قۇسايىنوۆ ارمەنيادا باسقارۋ ءرۋلى وڭ جاقتان سولعا قاراي اۋىستىرىلعان اۆتوكولىكتەردىڭ قازاقستاندا قاۋىپسىزدىك سەرتيفيكاتىن الۋى مىندەتتى ەكەنىن ەسكە سالدى. بۇل سەرتيفيكاتتى ارنايى زەرتحانالاردان الۋعا بولادى.
ەستەرىڭىزگە سالا كەتەيىك, بيىل مامىردىڭ 20-دا قازاقستان ۇكىمەتى ارمەنيادا تىركەلگەن جەكەلەگەن كولىك قۇرالدارىن ەلىمىزگە اكەلىپ, پايدالانۋ بويىنشا كەيبىر ماسەلەلەر تۋرالى قاۋلى قابىلدادى. سوعان سايكەس, وسى جىلدىڭ 1-ءشى قىركۇيەگىنە دەيىن ارمەنيانىڭ ۋاكىلەتتى ورگاندارىندا قازاقستان ازاماتتارىنا تىركەلىپ, ەلىمىزگە 1 اقپانعا دەيىن اكەلىنگەن باسقارۋ ءرۋلى سول جاقتا ورنالاسقان كولىك قۇرالدارىن مەملەكەتتىك تىركەۋ ءۇشىن الىم تولەۋ جونىندە شارالار قاراستىرىلعان.
قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ءۇشىن Telegram جەلىسىندە بىزگە جازىلىڭىز.
