بۇگىن نۇر-سۇلتان قالاسى اكىمدىگىنىڭ ءال-ءفارابيدىڭ 1150 جىلدىعىن مەرەكەلەۋگە ارنالعان ءىس-شارالارى اياسىندا ءال فارابي اتىنداعى وقۋشىلار سارايىندا ء"ال-فارابي الەمى" وقۋ-تاربيە ورتالىعىنىڭ اشىلۋ سالتاناتى ءوتتى.
"ورتالىقتىڭ اشىلۋى الەمدىك عىلىم مەن وركەنيەتتىڭ دامۋىنا باعا جەتپەس ۇلەس قوسقان ورتا عاسىردىڭ ۇلى ويشىلى, ەنتسيكلوپەديست جانە فيلوسوف ءابۋ ناسىر ءال-ءفارابيدىڭ رۋحاني مۇراسىنا دەگەن قۇرمەتىمىزدى كورسەتەدى. "ەكىنشى ۇستاز" اتانعان ءابۋ ناسىر ءال-ءفارابيدىڭ فيلوسوفياعا, لوگيكاعا, مەتافيزيكاعا, جاراتىلىستانۋ عىلىمىنا قوسقان ۇلەسى وراسان", دەلىنگەن حابارلامادا.
وقۋ-تاربيە ورتالىعىن قۇرۋداعى ماقسات – جەر جاھانعا ايگىلى ويشىلدىڭ زياتكەرلىك جانە شىعارماشىلىق مۇراسىن زەردەلەپ, ۇرپاق ساناسىنا ءسىڭىرۋ.
وقۋ-تاربيە ورتالىعىندا عالىمنىڭ سان ءتۇرلى قىرىن انىقتايتىن ء"ال-فارابي جانە عىلىم", ء"ال-فارابي جانە گرەك ويشىلدارى" (اريستوتەل, پلاتون), ء"ال-فارابي جانە ونەر", ء"ال-فارابي جانە تاربيە", ء"ال-فارابي جانە پوەزيا", ء"ال-فارابي جانە شەشەندىك ونەر" بولىمدەرى بار.
"بۇل باعىتتار بويىنشا وقۋشىلار عالىمنىڭ مەديتسينا, استرونوميا, ماتەماتيكا, گەومەتريا, لوگيكا, ءپالساپا, ياعني, بارلىق عىلىم سالاسىندا ەتكەن ەڭبەكتەرىن جيناقتاپ, ىزدەنەدى. كەلەشەكتە ءال-فارابي تۋرالى دەرەكتى فيلمدەر, تانىمدىق دۇنيەلەر دايىنداپ, ونىڭ ءومىر سۇرگەن كەزەڭىنە قاتىستى تىڭ دەرەكتەردى وسى ورتالىققا جيناقتاپ, ايگىلى ويشىلدىڭ قالدىرعان مول مۇراسىن ناسيحاتتاۋ بويىنشا جۇمىستى جالعاستىراتىن بولامىز", دەيدى ءال-فارابي اتىنداعى وقۋشىلار سارايىنىڭ ديرەكتورى ەربول ىرگەباي.
تۇساۋكەسەر اياسىندا عالىم ءبيۋستىنىڭ اشىلۋ ءراسىمى دە ءوتتى. ءال-فارابي اتىنداعى وقۋشىلار سارايىنىڭ اسپاپتىق مۋزىكا ءبولىمىنىڭ وقىتۋشىلارى بەلگىلى كومپوزيتور ك.كۇمىسبەكوۆتىڭ "فارابي سازى" تۋىندىسىن ورىندادى.
