قوعام • 18 تامىز، 2020

"Nur Otan" پرايمەريزىنە قاتىسۋعا العاشقى كۇنى 1000-نان استام قازاقستاندىق ءوتىنىش بەردى

52 رەت كورسەتىلدى

كەشە ەلىمىزدە "Nur Otan" پرايمەريزى باستالدى. كانديداتتاردى تىركەۋدىڭ العاشقى كۇنى 1000-نان استام ادام ءوتىنىش بەردى. ولاردىڭ – 336-سى ايەل، ونىڭ ىشىندە 20 كوپبالالى انا، 35 جاسقا دەيىنگى – 228 جاس، سونداي-اق ەرەكشە قاجەتتىلىگى بار – 8 ازامات. باستاۋىش پارتيا ۇيىمدارىنان 322 ادام ۇسىنىلسا، 717 كانديدات ءوزىن-ءوزى ۇسىندى. بۇل تۋرالى پارتيا توراعاسىنىڭ ءبىرىنشى ورىنباسارى باۋىرجان بايبەك Facebook-تەگى پاراقشاسىندا جازدى، - دەپ حابارلايدى Egemen.kz.

ونىڭ ايتۋىنشا، پارتيا ليدەرى نۇرسۇلتان نازارباەۆتىڭ تاپسىرماسىمەن پرايمەريز تۇڭعىش رەت رەسپۋبليكالىق پارتياىشىلىك سايلاۋ اۋقىمىندا وتەدى. بۇل – ەلباسىنىڭ باستاماسىمەن قولعا الىنعان "سەنىم. ديالوگ. بولاشاققا نىق قادام" پارتيا جۇمىسىن "قايتا جانداندىرۋ" باعدارلاماسىنىڭ قورىتىندى كەزەڭدەرىنىڭ ءبىرى.

"ەلباسى نۇرسۇلتان نازارباەۆ كەشەگى ۇندەۋىندە اتاپ وتكەندەي، پارتيا ءوز ءىسىنىڭ شەبەرلەرىن، ەل تاعدىرىنا الاڭدايتىن تۇلعالاردى، شەشىم قابىلداي الاتىن جانە كونسترۋكتيۆتى ۇسىنىستار جاساي الاتىن جاڭا ازاماتتاردى بيلىككە ۇسىناتىن قاينار كوز بولۋى ءتيىس.
پارتياىشىلىك سايلاۋدىڭ اشىق ءارى ءادىل وتۋىنە پارتيا تاراپىنان قاجەتتى جاعداي جاسالعان. باستىسى – ايقىندىق پەن تازالىقتى، بارلىق قاتىسۋشىلارعا تەڭ مۇمكىندىك پەن باسەكەلەستىكتى قامتاماسىز ەتۋ.

پارتيا ليدەرى ازاماتتاردى تولعاندىرىپ جۇرگەن كوكەيتەستى ماسەلەلەردىڭ ءوزارا سەنىم مەن سىيلاستىق اياسىندا كوتەرىلەتىنىنە سەنىم ءبىلدىردى. كوتەرىلگەن ماسەلەلەردى پارتيا باقىلاۋعا الۋى ءتيىس. ءاربىر اۋداننىڭ، قالانىڭ، وبلىستىڭ سايلاۋالدى باعدارلاماسىنا ەنگىزۋ ءۇشىن بارلىق شەشىمدى بيۋدجەتتىڭ مۇمكىندىكتەرىمەن ۇيلەستىرە قاراستىرۋ قاجەت.

ەلىمىزدىڭ الدىندا پاندەميادان كەيىن ەكونوميكالىق ءوسىمدى قالپىنا كەلتىرۋ، جۇمىس ورىندارىن قۇرۋ، شاعىن جانە ورتا بيزنەستىڭ جۇمىسىن جانداندىرۋ مىندەتتەرى تۇر. سونىمەن بىرگە پاندەميامەن كۇرەس ماسەلەلەرىن تالداپ، ونىڭ ەكىنشى تولقىنى ورىن الۋى مۇمكىن جاعدايعا دايىندالۋ قاجەت. مۇنىڭ بارلىعى پارتيانىڭ سايلاۋالدى باعدارلاماسىنا ەنگىزىلىپ، نۇروتاندىقتاردىڭ الداعى 5 جىلدا اتقاراتىن ءىس-ارەكەتتەرىنە باعىت-باعدار بولادى.

تاعى دا بارلىق پارتيالىقتار مەن "Nur Otan" جاقتاستارىن ەلدەگى اسا ماڭىزدى ساياسي دوداعا بەلسەندى قاتىسۋعا شاقىرامىن!"- دەپ جازدى باۋىرجان بايبەك.

پرايمەريزگە قاتىسۋ ءۇشىن ءوتىنىشتى https://primaries.kz/ سايتىندا "پرايمەريز" اقپاراتتىق جۇيەسى ارقىلى ونلاين جولداۋعا نەمەسە اۋماقتىق ۇيىمداستىرۋ كوميتەتتەرىنە جەكە ءوتىنىش بەرۋگە بولادى. كانديداتتاردى ۇسىنۋ جانە تىركەۋ 28 تامىزعا (قوسا ەسەپتەگەندە) دەيىن جالعاسادى.

پارتيا قۇندىلىقتارىن ۇستاناتىن جانە سايلاۋ قۇقىعى بار كەز كەلگەن ازامات ۇمىتكەر بولا الادى. ول ءۇشىن پرايمەريزگە قاتىسۋشىلاردى تىركەۋ مەرزىمى اياقتالعانعا دەيىن "Nur Otan"-نىڭ قاتارىنا قوسىلۋ كەرەك.

پرايمەريزدىڭ نەگىزگى ماقساتى – الداعى ءماجىلىس پەن بارلىق دەڭگەيدەگى ءماسليحاتتار سايلاۋىنا پارتيالىق تىزىمدەرگە ەنگىزۋ ءۇشىن قوعامنىڭ سەنىمى مەن قولداۋىنا يە بولعان بەدەلدى پارتيا كوشباسشىلارىن انىقتاۋ.

سونىمەن، كانديداتتاردى ۇسىنۋ جانە تىركەۋ 17 تامىزدان باستالىپ، 28 تامىزعا (قوسا ەسەپتەگەندە) دەيىن جالعاسادى. ۇمىتكەرلەرگە ۇگىت-ناسيحات جۇمىستارىنا دايىندالۋ ءۇشىن 7 كۇن بەرىلەدى - 31 تامىزدان 6 قىركۇيەككە دەيىن.

7 قىركۇيەكتەن 3 قازانعا دەيىن ارالىقتا كانديداتتاردىڭ ۇگىت-ناسيحات جۇمىستارىن، ونىڭ ىشىندە 14-30 قىركۇيەك ارالىعىندا جاريا پىكىرسايىستار وتەدى. پىكىرسايىستار "پرايمەريز" ارنايى اقپاراتتىق جۇيەسى ارقىلى ءوتىپ، پارتيانىڭ رەسمي اككاۋنتتارىندا تاراتىلادى.

1 قازان (00-00) مەن 3 قازان (14.00) ارالىعىندا ءموبيلدى قوسىمشا جانە ارنايى ۆەب-پورتال ارقىلى ەلەكتروندى داۋىس بەرۋدى وتكىزۋ جوسپارلانىپ وتىر.

داۋىس بەرۋدىڭ سوڭعى كۇنى (3 قازان) باستاۋىش پارتيا ۇيىمدارىنىڭ بازاسىندا سايلاۋ ۋچاسكەلەرى اشىلادى. ينتەرنەت جوق ەلدى مەكەندەردە وسىنداي سايلاۋ ۋچاسكەلەرىنە كەلىپ، قاعاز بيۋللەتەندەر ارقىلى داۋىس بەرۋگە بولادى.

ۇمىتكەرلەردىڭ رەيتينگى كورسەتىلگەن پرايمەريز ناتيجەلەرى 5 قازاندا جاريالانادى.

پرايمەريز وتكىزۋ، سونداي-اق كانديداتتارعا ۇيىمداستىرۋشىلىق جانە قۇقىقتىق قولداۋ ماسەلەلەرى بويىنشا "Nur Otan" پارتياسى 8 (800) 080 4441 ارنايى جەدەل جەلىنى ىسكە قوستى.

 

قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ءۇشىن Telegram جەلىسىندە بىزگە جازىلىڭىز.

سوڭعى جاڭالىقتار

وڭىردە دامۋ ءۇردىسى بار

ايماقتار • كەشە

تاڭدايدىڭ تارلانى

تاريح • كەشە

جوعالعان سولدات

تاريح • كەشە

دومبىرانى دارىپتەدى

رۋحانيات • كەشە

ۇقساس جاڭالىقتار