ايماقتار • 17 تامىز، 2020

جۇرگىزۋشىلەر ءتارتىپ ساقشىلارىنا پارا بەرمەك بولعان

13 رەت كورسەتىلدى

تۇركىستان وبلىسىنىڭ پوليتسەيلەرى تارتىپ ساقشىلارىنا پارا بەرۋگە تىرىسقان جۇرگىزۋشىلەردى ۇستادى. بۇل تۋرالى Polisia.kz-كە سىلتەمە جاساي وتىرىپ Egemen.kz حابارلايدى.

شىمكەنت-سامارا تاس جولىندا تۇركىستان وبلىسى پد وزىندىك قاۋىپسىزدىك باسقارماسىنىڭ قىزمەتكەرلەرى اكىمشىلىك جاۋاپكەرشىلىككە تارتىلماۋ ۇشىن پوليتسەيگە پارا بەرمەك بولعان "كاماز" اۆتوكولىگىنىڭ جۇرگىزۋشىسىن ۇستادى. "پارا بەرۋ" رەتىندە قارالاتىن قۇقىققا قارسى ارەكەتتەر تۋرالى پاترۋلدىك پوليتسيا تاراپىنان بىرنەشە رەت ەسكەرتۋلەرگە قاراماستان، زاڭ بۇزۋشى پارا بەرگەن. مۇنىڭ ءبارى پاترۋلدىك پوليتسيا باتالونى پوليتسەيلەرىنىڭ بەينەجەتوندارىنا تۇسىرىلگەن. ەر ادام ءوز ءىسىن تولىق مويىندادى.

سونىمەن قاتار جۇرگىزۋشىگە قاتىستى قر اقبتك-ءنىڭ ەكى بابى بويىنشا اكىمشىلىك حاتتاما تولتىرىلدى: 590-باپ (مەملەكەتتىك نەمەسە مىندەتتى تەحنيكالىق بايقاۋدان وتپەگەن كولىك قۇرالىن باسقارۋ) جانە 602-باپ (كولىك قۇرالدارى جۇرگىزۋشىلەرىنىڭ تاۋلىكتىڭ جارىق ۋاقىتىندا سىرتقى جارىق قۇرالدارىن جانە (نەمەسە) دىبىس سيگنالدارىن پايدالانۋ ەرەجەلەرىن بۇزۋى). ءدال وسى كۇنى سارىاعاش اۋدانىندا وقب قىزمەتكەرلەرى، ءتارتىپ ساقشىلارىنا جول قوزعالىسى ەرەجەلەرىن بۇزىپ، ونى جاسىرۋ ءۇشىن پارا بەرمەك بولعان تاعى ءبىر كۇدىكتىنى ۇستادى. سارىاعاش اۋدانىنىڭ تۇرعىنى “ۆاز” اۆتوكولىگىنىڭ جۇرگىزۋشىسى وزىنىڭ قۇقىق بۇزعان ارەكەتتەرى ءۇشىن پوليتسەيلەر تاراپىنان قىلمىستىق جاۋاپكەرشىلىككە تارتىلاتىنىن بىلە تۇرا، ونى بولدىرماۋ ماقساتىندا پاترۋلدىك پوليتسيا باتالونىنىڭ قىزمەتكەرلەرىنە اقشا ۇسىنعان.

"ۆاز" جۇرگىزۋشىسىنىڭ بۇل زاڭسىز ارەكەتتەرى ءتارتىپ ساقشىلارىنىڭ ۆيدەوجەتوندارىنا تىركەلگەن. قۇقىقبۇزۋشى ءوز كىناسىن تولىق مويىنداپ، وعان قاتىستى قر اقبتك-ءنىڭ ءۇش بابى بويىنشا اكىمشىلىك قۇقىق بۇزۋشىلىق تۋرالى حاتتاما تولتىرىلدى: 230-باپ (قازاقستان رەسپۋبليكاسىنىڭ مىندەتتى ساقتاندىرۋ تۋرالى زاڭناماسىن بۇزۋ)، 593-باپ (جول قوزعالىسى ەرەجەلەرىندە كوزدەلگەن جولاۋشىلار مەن جۇكتەردى تاسىمالداۋ، قاۋىپسىزدىك بەلدىكتەرىن نەمەسە موتوشلەمدەردى پايدالانۋ جونىندەگى تالاپتاردى ساقتاماۋ) جانە 612-باپ (قۇجاتسىز جانە كولىك قۇرالىن باسقارۋ قۇقىعى جوق ادامنىڭ كولىك قۇرالىن باسقارۋى).

قازىرگى ۋاقىتتا ەكى كۇدىكتىگە قاتىستى قر قك-ءنىڭ 367-بابى 1-بولىگى (پارا بەرۋ) بويىنشا سوتقا دەيىنگى تەرگەۋ امالدارى جۇرگىزىلۋدە. ءوز كەزەگىندە تۇركىستان وبلىسىنىڭ پوليتسەيلەرى قىزمەتتىك مىندەتتەرىن اتقارۋ كەزىندە لاۋازىمدى تۇلعالارعا پارا بەرگەنى ءۇشىن قىلمىستىق جاۋاپكەرشىلىك قاراستىرىلعانىن  تاعى دا ەسكەرتەدى. سونىمەن قاتار، پوليتسيا قىزمەتكەرلەرى جۇرگىزۋشىلەردى جانە باسقا دا جول قوزعالىسىنا قاتىسۋشىلاردى جقە قاتاڭ ساقتاۋعا شاقىرادى: جىلدامدىق رەجىمىن جانە مانەۆر جاساۋ ەرەجەلەرىن بۇزباۋعا، قارسى قوزعالىس جولاعىنا شىقپاۋعا، قاشىقتىقتى ساقتاۋعا جانە ەڭ باستىسى، ماس كۇيدە كولىك باسقارماۋعا كەڭەس بەرەدى.

سوڭعى جاڭالىقتار

ۇقساس جاڭالىقتار