ساپار بارىسىندا كارانتين اياقتالعان سوڭ كەسەنەگە كەلۋشىلەردىڭ گيگيەنالىق-سانيتارلىق ساقتىق ءىس-شارالارىن قامتاماسىز ەتۋ باعىتىندا اتقارىلعان جۇمىستارمەن تانىستى.
قازىرگى تاڭدا كەسەنە ىشىندە ارنايى ەسكەرتپە پاراقشالارى مەن اراقاشىقتىقتى ساقتاۋعا ارنالعان بەلگىلەر جانە كەسەنە الدىندا كەلۋشىلەر ءۇشىن ارنايى شاتىر مەن ورىندىقتار جانە گيگيەنالىق قۇرالدار ورناتىلعان.
قوجا احمەت ياساۋي كەسەنەسى مەن ونىڭ ماڭىنداعى تاريحي-مادەني ورىنداردى قايتا جاڭعىرتۋ, زەرتتەۋ جۇمىستارى دا مينيسترلىكتىڭ ءجىتى نازارىندا. وسى ورايدا قوجا احمەت ياساۋي, ەسىم حان كەسەنەلەرى مەن سەگىز قىرلى ساعانا جانە بەلگىسىز ساعانانى رەستاۆراتسيالاۋ بارىسىن كورگەن مينيستر كۇلتوبە قالاجۇرتىنداعى ارحەولوگيالىق قازبا جۇمىستارىن پىسىقتادى.
ايتا كەتەيىك, قر مادەنيەت جانە سپورت مينيسترلىگىنىڭ "ازىرەت سۇلتان" مەملەكەتتىك تاريحي-مادەني قورىق-مۋزەيىن دامىتۋدىڭ 3 جىلدىق جوسپارىنا سايكەس تاريحي جانداندىرۋ جۇمىستارى كەزەڭ-كەزەڭىمەن جۇزەگە اسىرىلىپ جاتىر.
الداعى ۋاقىتتا قازاقستانعا كەلگەن تۋريستەر "ازىرەت سۇلتان" قورىق-مۋزەيى اۋماعىنداعى تاريحي ورىنداردى ارالاپ قانا قويماي كۇلتوبە قالاجۇرتىنداعى اشىق اسپان استى مۋزەيىمەن دە تانىسادى.
